20.21C Vancouver 20.21C VancouverMar 5, 2024 3:56 PM - The Canadian Press
ਕੈਨੇਡਾ ਦੇ ਸਾਬਕਾ ਪ੍ਰਧਾਨ ਮੰਤਰੀ ਬ੍ਰਾਇਨ ਮਲਰੋਨੀ ਦਾ ਅੰਤਿਮ ਸੰਸਕਾਰ 23 ਮਾਰਚ ਨੂੰ ਮਾਂਟਰੀਆਲ ਵਿਚ ਹੋਵੇਗਾ। ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਨੇ ਅੱਜ ਇੱਕ ਰਿਲੀਜ਼ ਵਿਚ ਇਸ ਦੀ ਜਾਣਕਾਰੀ ਦਿੱਤੀ। ਮਲਰੋਨੀ ਕੈਨੇਡਾ ਦੇ 18ਵੇਂ ਪ੍ਰਧਾਨ ਮੰਤਰੀ ਸਨ। ਉਨ੍ਹਾਂ 84 ਸਾਲ ਦੀ ਉਮਰ ਵਿਚ 29 ਫਰਵਰੀ ਨੂੰ ਫਲੋਰੀਡਾ ਦੇ ਇੱਕ ਹਸਪਤਾਲ ਵਿਚ ਅੰਤਿਮ ਸਾਹ ਲਏ ਸਨ। ਉਨ੍ਹਾਂ 1984 ਤੋਂ 1993 ਤੱਕ ਕੈਨੇਡਾ ਦੇ ਪ੍ਰਧਾਨ ਮੰਤਰੀ ਵਜੋਂ ਸੇਵਾ ਨਿਭਾਈ ਸੀ।
ਅਮਰੀਕਾ ਅਤੇ ਮੈਕਸੀਕੋ ਨਾਲ ਫਰੀ ਟਰੇਡ ਡੀਲ ਦਾ ਸਿਹਰਾ ਉਨ੍ਹਾਂ ਨੂੰ ਜਾਂਦਾ ਹੈ। ਮਲਰੋਨੀ ਸਰਕਾਰ ਨੇ 1992 ਵਿਚ ਉੱਤਰੀ ਅਮਰੀਕੀ ਮੁਕਤ ਵਪਾਰ ਸਮਝੌਤੇ ’ਤੇ ਦਸਤਖਤ ਕੀਤੇ ਸਨ। ਏਅਰ ਕੈਨੇਡਾ ਦਾ ਨਿੱਜੀਕਰਨ ਵੀ ਉਨ੍ਹਾਂ ਦੀ ਸਰਕਾਰ ਸਮੇਂ ਹੋਇਆ ਸੀ।
ਉਨ੍ਹਾਂ ਦੀ ਸਰਕਾਰ ਦੇ ਸਭ ਤੋਂ ਵਿਵਾਦਪੂਰਨ ਕਦਮਾਂ ਵਿਚੋਂ ਇੱਕ 1991 ਵਿਚ ਦੇਸ਼ ਭਰ ਵਿਚ 7 ਫੀਸਦੀ ਜੀ.ਐੱਸ.ਟੀ. ਲਾਗੂ ਕਰਨਾ ਸੀ ਪਰ ਇਸ ਨੇ ਸੂਬਿਆਂ ਦੀ ਮਾਲੀ ਹਾਲਤ ਨੂੰ ਸਥਿਰ ਕਰਨ ਵਿਚ ਮਦਦ ਕੀਤੀ।
ਮਲਰੋਨੀ ਕੰਜ਼ਰਵੇਟਿਵ ਪਾਰਟੀ ਦੇ ਲੀਡਰ ਸਨ, ਪੀਅਰੇ ਪੋਲੀਵਰੇ ਮੁਤਾਬਕ, ਬ੍ਰਾਇਨ ਮਲਰੋਨੀ ਇੱਕ ਇਲੈਕਟਰੀਸ਼ੀਅਨ ਦੇ ਪੁੱਤ ਸਨ ਜਿਨ੍ਹਾਂ ਨੇ ਆਪਣੇ ਜ਼ਿੰਦਗੀ ਵਿਚ ਕਈ ਸਫਲਤਾਵਾਂ ਹਾਸਲ ਕੀਤੀਆਂ ਅਤੇ ਫਿਰ ਸਿਆਸਤ ਵਿਚ ਵੀ ਕਾਮਯਾਬੀ ਦੇ ਮੁਕਾਮ ਹਾਸਲ ਕੀਤੇ।
