ਬ੍ਰਿਟੇਨ ਦੇ ਕਿੰਗ ਚਾਰਲਸ ਨੇ ਬੈਂਗਲੁਰੂ ਦਾ ਤਿੰਨ ਦਿਨਾਂ ਦਾ ਕੀਤਾ ਨਿੱਜੀ ਦੌਰਾ

ਬ੍ਰਿਟੇਨ ਦੇ ਕਿੰਗ ਚਾਰਲਸ ਇੱਕ ਨਿੱਜੀ ਯਾਤਰਾ ’ਤੇ ਭਾਰਤ ਗਏ ਹੋਏ ਸਨ, ਜਿੱਥੇ ਉਹ ਆਪਣੀ ਪਤਨੀ ਕੈਮਿਲਾ ਨਾਲ ਬੈਂਗਲੁਰੂ ਦੇ ਵਾਈਟਫੀਲਡ ਕੋਲ ਇੱਕ ਮੈਡੀਕਲ ਸਹੂਲਤ ਹੋਲਿਸਟਿਕ ਹੈਲਥ ਸੈਂਟਰ ਵਿਚ ਠਹਿਰੇ। ਕਿੰਗ ਬਣਨ ਤੋਂ ਬਾਅਦ ਇਹ ਉਨ੍ਹਾਂ ਦਾ ਪਹਿਲਾ ਭਾਰਤ ਦੌਰਾ ਹੈ। ਰਿਪੋਰਟਸ ਮੁਤਾਬਕ, ਉਹ 27 ਅਕਤੂਬਰ ਤੋਂ ਭਾਰਤ ਵਿਚ ਸਨ ਅਤੇ ਤਿੰਨ ਦੀ ਭਾਰਤ ਯਾਤਰਾ ਦੌਰਾਨ ਯੋਗਾ, ਮੈਡੀਟੇਸ਼ਨ ਸੈਸ਼ਨ ਅਤੇ ਥੈਰੇਪੀ ਲੈ ਰਹੇ ਸਨ।

ਇਸ ਦੌਰਾਨ ਉਹ ਸਪੈਸ਼ਲ ਡਾਈਟ ਵੀ ਫਾਲੋ ਕਰ ਰਹੇ ਸਨ। ਸੈਸ਼ਨ ਪੂਰਾ ਹੋਣ ਤੋਂ ਬਾਅਦ ਬੁੱਧਵਾਰ ਸਵੇਰ ਦੋਵੇਂ ਲੰਡਨ ਲਈ ਵਾਪਸ ਰਵਾਨਾ ਹੋ ਗਏ। ਇਹ ਪਹਿਲੀ ਵਾਰ ਨਹੀਂ ਹੈ ਜਦੋਂ ਕਿੰਗ ਚਾਰਲਸ ਬੈਂਗਲੁਰੂ ਦੇ ਇਸ ਹੈਲਥਕੇਅਰ ਸੈਂਟਰ ਵਿਚ ਪਹੁੰਚੇ।

ਇਸ ਤੋਂ ਪਹਿਲਾਂ 2019 ਵਿਚ ਉਨ੍ਹਾਂ ਨੇ ਇੱਥੇ ਆਪਣਾ 71ਵਾਂ ਜਨਮਦਿਨ ਵੀ ਮਨਾਇਆ ਸੀ। ਮੀਡੀਆ ਰਿਪੋਰਟਸ ਮੁਤਾਬਕ ਚਾਰਲਸ ਹੁਣ ਤੱਕ ਕੁੱਲ 9 ਵਾਰ ਇਸ ਸਥਾਨ ਦਾ ਦੌਰਾ ਕਰ ਚੁੱਕੇ ਹਨ। ਉਨ੍ਹਾਂ ਦਾ ਬੈਂਗਲੁਰੂ ਦੇ ਇਸ ਤੰਦਰੁਸਤੀ ਹੈਲਥ ਸੈਂਟਰ ਦਾ ਦੌਰਾ ਕਾਫੀ ਗੁਪਚੁੱਪ ਰਿਹਾ।