ਡੀਅਰ ਲੇਕ ਪਾਰਕ 'ਚ ਔਰਤਾਂ ਨਾਲ ਗਲਤ ਇਸ਼ਾਰੇ ਤੇ ਟਿੱਪਣੀਆਂ ਕਰਨ ਵਾਲੇ ਸ਼ੱਕੀ ਦਾ ਸਕੈਚ ਕੀਤਾ ਜਾਰੀ: ਬਰਨਬੀ ਆਰ.ਸੀ.ਐਮ.ਪੀ.

ਬਰਨਬੀ ਆਰ.ਸੀ.ਐਮ.ਪੀ. ਵੱਲੋਂ ਇੱਕ ਸ਼ੱਕੀ ਦਾ ਸਕੈਚ ਜਾਰੀ ਕੀਤਾ ਗਿਆ ਹੈ।

ਪੁਲਿਸ ਦਾ ਕਹਿਣਾ ਹੈ ਕਿ ਲੋਕਾਂ ਨੂੰ ਸਾਵਧਾਨ ਕਰਨ ਲਈ ਸਕੈਚ ਜਾਰੀ ਕੀਤਾ ਗਿਆ ਹੈ ਅਤੇ ਤਸਵੀਰ 'ਚ ਵਿਖਾਈ ਦਿੰਦੇ ਆਦਮੀ ਨੇ 13 ਅਕਤੂਬਰ ਨੂੰ ਡੀਅਰ ਲੇਕ ਪਾਰਕ ਕੋਲ 3 ਔਰਤਾਂ 'ਤੇ ਭੱਦੀਆਂ ਟਿੱਪਣੀਆਂ ਅਤੇ ਹਰਕਤਾਂ ਨੂੰ ਅੰਜਾਮ ਦਿੱਤਾ ਸੀ।

ਇਹ ਤਿੰਨੇ ਔਰਤਾਂ ਇਕੱਠੀਆਂ ਤੁਰ ਕੇ ਜਾ ਰਹੀਆਂ ਸਨ ਜਦ ਇੱਕ ਆਦਮੀ ਨੇ ਉਨ੍ਹਾਂ ਤਕ ਪਹੁੰਚ ਕੀਤੀ ਅਤੇ ਟਿੱਪਣੀਆਂ ਕਰਨ ਤੋਂ ਇਲਾਵਾ ਹੱਥ ਨਾਲ ਇਸ਼ਾਰਾ ਕੀਤਾ।

ਹਾਲਾਂਕਿ ਪੁਲਿਸ ਅਨੁਸਾਰ ਔਰਤਾਂ ਨਾਲ ਕੋਈ ਫਿਜੀਕਲ ਸੰਪਰਕ ਨਹੀਂ ਬਣਾਇਆ ਗਿਆ ਸੀ।

ਪੁਲਿਸ ਦਾ ਕਹਿਣਾ ਹੈ ਕਿ ਮਾਮਲੇ 'ਚ ਲੋਕਾਂ ਨੂੰ ਸਾਵਧਾਨ ਕਰਨਾ ਜਰੂਰੀ ਹੈ ਅਤੇ ਜੇਕਰ ਕਿਸੇ ਨਾਲ ਇਸੇ ਪ੍ਰਕਾਰ ਦੀ ਘਟਨਾ ਵਾਪਰੇ ਤਾਂ ਪੁਲਿਸ ਨੂੰ ਸੂਚਨਾ ਦਿੱਤੀ ਜਾਵੇ।

ਪੁਲਿਸ ਦਾ ਕਹਿਣਾ ਹੈ ਕਿ ਇਸੇ ਹੁਲੀਏ ਵਾਲੇ ਇੱਕ ਵਿਅਕਤੀ ਬਾਰੇ ਇਸੇ ਇਲਾਕੇ 'ਚ 26 ਸਿਤੰਬਰ ਤੋਂ 17 ਅਕਤੂਬਰ ਵਿਚਾਲੇ ਔਰਤਾਂ 'ਤੇ ਭੱਦੀਆਂ ਟਿੱਪਣੀਆਂ ਦੀ ਰਿਪੋਰਟ ਕੀਤੀ ਗਈ ਹੈ।

ਪੁਲਿਸ ਜਾਂਚ ਕਰ ਰਹੀ ਹੈ ਕਿ ਮਾਮਲੇ ਆਪਸ 'ਚ ਸੰਬੰਧਤ ਹਨ ਜਾਂ ਨਹੀਂ।