ਕੈਲਗਰੀ ਦੇ ਡੀਅਰਫੁੱਟ ਟ੍ਰੇਲ 'ਤੇ ਸ਼ਨੀਵਾਰ ਵਾਪਰੇ ਹਾਦਸੇ ਦੌਰਾਨ ਇਕ ਵਿਅਕਤੀ ਦੀ ਹੋਈ ਮੌਤ

ਸਾਊਥ ਈਸਟ ਕੈਲਗਰੀ ਦੇ ਡੀਅਰਫੁੱਟ ਟ੍ਰੇਲ 'ਤੇ ਸ਼ਨੀਵਾਰ ਵਾਪਰੇ ਹਾਦਸੇ ਦੌਰਾਨ ਇਕ ਵਿਅਕਤੀ ਦੀ ਮੌਤ ਹੋ ਗਈ। ਔਫੀਸਰਜ਼ ਮੁਤਾਬਕ ਰਾਤ ਕਰੀਬ 11 ਵਜੇ ਨੌਰਥ ਬਾਊਂਡ ਡੀਅਰਫੁੱਟ ਟ੍ਰੇਲ ਦੇ 7900 ਬਲਾਕ ਦੇ ਐਗਜ਼ਿਟ 248 ਨੇੜੇ ਨਿਸਾਨ ਅਲਟੀਮਾ ਬੇਕਾਬੂ ਹੋ ਕੇ ਕੰਸਟਰਕਸ਼ਨ ਬੈਰੀਅਰ ਨਾਲ ਜਾ ਟਕਰਾਈ। ਟੱਕਰ ਇੰਨੀ ਜ਼ਬਰਦਸਤ ਸੀ ਕਿ ਗੱਡੀ ਦਾ ਇੰਜਣ ਨਿਕਲ ਕੇ ਸੜਕ 'ਤੇ ਜਾ ਡਿੱਗਿਆ।

ਉਸੇ ਸਮੇਂ ਪਿੱਛੋਂ ਆ ਰਹੀ ਟੋਇਟਾ ਸੜਕ 'ਤੇ ਪਏ ਉਸ ਇੰਜਣ ਨਾਲ ਜਾ ਟਕਰਾਈ। ਨਿਸਾਨ ਨੂੰ ਚਲਾ ਰਹੇ 50 ਸਾਲਾ ਵਿਅਕਤੀ ਦੀ ਮੌਕੇ 'ਤੇ ਹੀ ਮੌਤ ਹੋ ਗਈ।ਟੋਇਟਾ ਦੇ ਡਰਾਈਵਰ ਨੂੰ ਗੰਭੀਰ ਪਰ ਸਥਿਰ ਹਾਲਤ ਵਿੱਚ ਫੁੱਟਹਿਲਜ਼ ਹਸਪਤਾਲ ਲਿਜਾਇਆ ਗਿਆ।

ਪੁਲਿਸ ਅਨੁਸਾਰ ਤੇਜ਼ ਰਫ਼ਤਾਰ, ਸ਼ਰਾਬ ਅਤੇ ਡਰੱਗਜ਼ ਇਸ ਹਾਦਸੇ ਦੇ ਮੁੱਖ ਕਾਰਨ ਹੋ ਸਕਦੇ ਹਨ। ਜੇਕਰ ਕਿਸੇ ਕੋਲ ਇਸ ਬਾਰੇ ਕੋਈ ਜਾਣਕਾਰੀ ਹੈ, ਤਾਂ ਉਹ ਪੁਲਿਸ ਨਾਲ ਸੰਪਰਕ ਕਰਕੇ ਮਦਦ ਕਰ ਸਕਦਾ ਹੈ।