ਕੈਲਗਰੀ ਦੇ ਪੁਲਿਸ ਔਫੀਸਰ ਨੂੰ ਗੋਲੀ ਮਾਰ ਕੇ ਸ਼ੱਕੀ ਨੇ ਕੀਤੀ ਆਤਮ ਹੱਤਿਆ, ਅਪਰਾਧਕ ਸੰਗਠਨ ਨਾਲ ਜੁੜੀ ਤਾਰ

ਕੈਲਗਰੀ ਵਿੱਚ ਬੀਤੇ ਕੱਲ੍ਹ ਐਡਵਰਥੀ ਪਾਰਕ ਨੇੜੇ ਹੋਈ ਘਟਨਾ ਦੇ ਸੰਬੰਧ ਵਿੱਚ ਇੱਕ ਪੁਲਿਸ ਔਫੀਸਰ ਨੂੰ ਗੋਲੀ ਮਾਰਨ ਦੀ ਪੁਸ਼ਟੀ ਹੋਈ ਹੈ। ਇਹ ਹਿੰਸਕ ਘਟਨਾ ਦੁਪਹਿਰ ਦੇ ਕਰੀਬ 11:45 ਵਜੇ ਵਾਪਰੀ। ਪੁਲਿਸ ਅਧਿਕਾਰੀ ਇੱਕ ਕਾਲੇ ਰੰਗ ਦੇ ਟਰੱਕ ਨੂੰ ਰੋਕ ਕੇ ਆਮ ਚੈਕਿੰਗ ਕਰ ਰਹੇ ਸਨ, ਜਦੋਂ ਗੱਡੀ ਵਿੱਚ ਸਵਾਰ ਇੱਕ ਸ਼ੱਕੀ ਵਿਅਕਤੀ ਨੇ ਬਾਹਰ ਨਿਕਲ ਕੇ ਗੋਲੀਆਂ ਚਲਾ ਦਿੱਤੀਆਂ, ਜਿਸ ਵਿੱਚ ਇੱਕ ਔਫੀਸਰ ਨੂੰ ਦੋ ਗੋਲੀਆਂ ਲੱਗੀਆਂ।

ਜ਼ਖਮੀ ਔਫੀਸਰ ਨੂੰ ਹਸਪਤਾਲ ਲਿਜਾਇਆ ਗਿਆ ਅਤੇ ਫਿਲਹਾਲ ਉਸ ਦੀ ਹਾਲਤ ਸਥਿਰ ਦੱਸੀ ਜਾ ਰਹੀ ਹੈ। ਗੋਲੀ ਚਲਾਉਣ ਤੋਂ ਬਾਅਦ ਸ਼ੱਕੀ ਪੈਦਲ ਐਡਵਰਥੀ ਪਾਰਕ ਵੱਲ ਭੱਜ ਗਿਆ, ਜਿੱਥੇ ਉਸ ਨੇ ਪਿੱਛਾ ਕਰ ਰਹੇ ਪੁਲਿਸ ਮੁਲਾਜ਼ਮਾਂ ਅਤੇ ਆਮ ਲੋਕਾਂ 'ਤੇ ਵੀ ਫਾਇਰਿੰਗ ਜਾਰੀ ਰੱਖੀ। ਫਰਾਰ ਹੋਣ ਦੌਰਾਨ ਉਸ ਨੇ ਇੱਕ ਗੱਡੀ ਵੀ ਖੋਹੀ ਪਰ ਪਾਰਕ ਵਿੱਚ ਗੱਡੀ ਫਸ ਜਾਣ ਕਾਰਨ ਉਹ ਫਿਰ ਪੈਦਲ ਭੱਜਣ ਲੱਗਾ।

ਪੁਲਿਸ ਨੇ ਹੈਲੀਕਾਪਟਰ ਦੀ ਮਦਦ ਨਾਲ ਸ਼ੱਕੀ ਦੀ ਲੋਕੇਸ਼ਨ ਨੂੰ ਟਰੈਕ ਕੀਤਾ ਅਤੇ ਔਫੀਸਰ ਦੇ ਪਹੁੰਚਣ 'ਤੇ ਉਹ ਬੋਅ ਰਿਵਰ ਵਿੱਚ ਮ੍ਰਿਤਕ ਪਾਇਆ ਗਿਆ। ਪੁਲਿਸ ਮੁਤਾਬਕ ਉਸ ਨੇ ਆਪਣੇ ਆਪ ਨੂੰ ਗੋਲੀ ਮਾਰ ਲਈ ਅਤੇ ਖੁਲਾਸਾ ਕੀਤਾ ਗਿਆ ਕਿ ਸ਼ੱਕੀ organized crime ਨਾਲ ਜੁੜਿਆ ਹੋਇਆ ਸੀ। ਇਸ ਪੂਰੇ ਮਾਮਲੇ ਦੀ ਜਾਂਚ ਅਲਬਰਟਾ ਦੀ ਪੁਲਿਸ ਵਾਚਡੌਗ ਏਜੰਸੀ ASIRT ਵੱਲੋਂ ਕੀਤੀ ਜਾ ਰਹੀ ਹੈ।