ਕੈਲਗਰੀ ’ਚ $6.8 ਮਿਲੀਅਨ ਦੇ ਨਸ਼ੇ ਜ਼ਬਤ, 4 ਸ਼ੱਕੀ ਗ੍ਰਿਫ਼ਤਾਰ

ਕੈਲਗਰੀ ਪੁਲਿਸ ਨੇ ਇਤਿਹਾਸ ਦੀਆਂ ਸਭ ਤੋਂ ਵੱਡੀਆਂ ਡਰੱਗ ਬਰਾਮਦਗੀਆਂ ਵਿੱਚੋਂ ਇੱਕ 6.8 ਮਿਲੀਅਨ ਡਾਲਰ ਦੇ ਨਸ਼ੇ ਜ਼ਬਤ ਕਰਦਿਆਂ 4 ਸ਼ੱਕੀਆਂ ਨੂੰ ਗ੍ਰਿਫ਼ਤਾਰ ਕੀਤਾ ਹੈ। ਇਸ ਜਾਂਚ ਦੀ ਸ਼ੁਰੂਆਤ ਜੂਨ 2026 ਵਿੱਚ ਹੋਈ ਸੀ, ਜਦੋਂ ਪੁਲਿਸ ਨੇ ਡਰੱਗ ਤਸਕਰੀ ਨਾਲ ਜੁੜੇ ਇੱਕ ਘਰ ਦੀ ਪਛਾਣ ਕੀਤੀ ਸੀ।

ਕੈਲਗਰੀ ਪੁਲਿਸ ਦੇ ਕਾਰਜਕਾਰੀ ਮੁਖੀ ਆਸਿਫ ਰਾਹਿਦ ਮੁਤਾਬਕ ਇਹ ਕੈਲਗਰੀ ਪੁਲਿਸ ਇਤਿਹਾਸ ਦੀਆਂ ਸਭ ਤੋਂ ਵੱਡੀਆਂ ਡਰੱਗ ਜ਼ਬਤੀਆਂ ਵਿੱਚੋਂ ਇੱਕ ਹੈ। ਜਾਂਚਕਾਰਾਂ ਦਾ ਦੋਸ਼ ਹੈ ਕਿ ਇਹ ਸ਼ੱਕੀ ਕੈਲਗਰੀ ਅਤੇ ਐਡਮਿੰਟਨ ਵਿੱਚ ਨੈੱਟਵਰਕ ਚਲਾ ਰਹੇ ਸਨ। ਅਧਿਕਾਰੀਆਂ ਨੇ ਕੈਲਗਰੀ ਵਿੱਚ ਚਾਰ ਅਤੇ ਕੋਕਰੇਨ ਵਿੱਚ ਇੱਕ ਸਮੇਤ ਕੁੱਲ ਪੰਜ ਰਿਹਾਇਸ਼ਾਂ 'ਤੇ ਛਾਪੇਮਾਰੀ ਕੀਤੀ।

ਉਨ੍ਹਾਂ 40.3 ਕਿਲੋਗ੍ਰਾਮ ਕੋਕੀਨ,6.9 ਕਿਲੋਗ੍ਰਾਮ ਐਮ.ਡੀ.ਐਮ.ਏ., 4.3 ਕਿਲੋਗ੍ਰਾਮ ਮੈਥਾਮਫੇਟਾਮਾਈਨ, 1.6 ਕਿਲੋਗ੍ਰਾਮ ਫੈਂਟਾਨਿਲ ਸਣੇ ਹੋਰ ਨਸ਼ੇ ਬਰਾਮਦ ਕੀਤੇ ਹਨ।ਸ਼ੱਕੀਆਂ ਨੂੰ ਜਲਦ ਹੀ ਅਦਾਲਤ ਵਿਚ ਪੇਸ਼ ਕੀਤਾ ਜਾਣਾ ਹੈ।