ਬਜਟ ਤੋਂ ਪਹਿਲਾਂ ਪੀ.ਐਮ.ਕਾਰਨੀ ਨੇ ਪ੍ਰੀਮੀਅਰਜ਼ ਤੇ ਫਸਟ ਨੇਸ਼ਨ ਆਗੂਆਂ ਨਾਲ ਕੀਤੀ ਅਹਿਮ ਬੈਠਕ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਅਗਾਮੀ ਬਜਟ ਤੋਂ ਪਹਿਲਾਂ ਅੱਜ ਪ੍ਰੀਮੀਅਰਜ਼ ਅਤੇ ਫਸਟ ਨੇਸ਼ਨ ਦੇ ਲੀਡਰਸ ਨਾਲ ਔਟਵਾ ਵਿਚ ਉੱਚ-ਪੱਧਰੀ ਬੈਠਕ ਕੀਤੀ, ਇਸ ਦਾ ਮਕਸਦ ਵੱਡੇ ਪ੍ਰੋਜੈਕਟਾਂ ਨੂੰ ਸ਼ੁਰੂ ਕਰਨ ਵਿਚ ਆਉਣ ਵਾਲੀਆਂ ਰੁਕਾਵਟਾਂ ਅਤੇ ਵਿਰੋਧਾਂ ਨੂੰ ਠੱਲ੍ਹ ਪਾਉਣਾ ਸੀ। ਪ੍ਰਧਾਨ ਮੰਤਰੀ ਨੇ ਬੈਠਕ ਦੌਰਾਨ Indigenous communities ਨੂੰ ਵੱਧ ਤੋਂ ਵੱਧ ਸਹਿਯੋਗ ਦੇਣ ਅਤੇ ਉਨ੍ਹਾਂ ਨਾਲ ਨਵੇਂ ਸਿਰੇ ਤੋਂ ਮਜ਼ਬੂਤ ਸਾਂਝੇਦਾਰੀ ਬਣਾਉਣ ਦਾ ਭਰੋਸਾ ਦਿੱਤਾ।

ਪਿਛਲੇ ਦੋ ਦਹਾਕਿਆਂ ਵਿਚ ਇਹ ਪਹਿਲੀ ਵਾਰ ਹੈ ਜਦੋਂ ਕੇਂਦਰੀ, ਸੂਬਾਈ ਅਤੇ ਫਸਟ ਨੇਸ਼ਨ ਲੀਡਰ ਦੇਸ਼ ਦੇ ਅਹਿਮ ਮੁੱਦਿਆਂ 'ਤੇ ਸਿੱਧੀ ਗੱਲਬਾਤ ਕਰਨ ਲਈ ਇੱਕ ਮੇਜ਼ 'ਤੇ ਇਕੱਠੇ ਹੋਏ। ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਉਨ੍ਹਾਂ ਦੀ ਸਰਕਾਰ 5 ਨਵੰਬਰ ਨੂੰ ਪੇਸ਼ ਹੋਣ ਵਾਲੇ ਫੈਡਰਲ ਬਜਟ ਵਿਚ ਫਸਟ ਨੇਸ਼ਨ ਲਈ ਨਵੇਂ ਕਦਮ ਦਾ ਐਲਾਨ ਕਰੇਗੀ ਅਤੇ ਨਿਵੇਸ਼ ਦੇ ਮੌਕੇ ਲੈ ਕੇ ਆਵੇਗੀ।

ਇਹ ਬੈਠਕ ਇਸ ਲਈ ਅਹਿਮ ਸੀ ਕਿਉਂਕਿ ਬਹੁਤ ਸਾਰੇ ਪ੍ਰੋਜੈਕਟਸ ਸਿੱਧੇ ਤੌਰ 'ਤੇ ਫਸਟ ਨੇਸ਼ਨ ਦੇ ਖੇਤਰ ਨਾਲ ਜੁੜੇ ਹੋਏ ਹਨ ਅਤੇ ਕੁਝ ਇਹ ਚਿੰਤਾ ਜਤਾ ਰਹੇ ਸਨ ਕਿ ਪ੍ਰੋਜੈਕਟਸ ਨੂੰ ਤੇਜ਼ੀ ਨਾਲ ਮਨਜ਼ੂਰੀ ਦੇਣ ਨਾਲ ਵਾਤਾਵਰਣ ਦੀ ਸੁਰੱਖਿਆ ਨਾਲ ਜੁੜੇ ਨਿਯਮਾਂ ਅਤੇ ਫਸਟ ਨੇਸ਼ਨ ਦੇ ਅਧਿਕਾਰਾਂ ਨੂੰ ਅਣਦੇਖਿਆ ਕੀਤਾ ਜਾ ਸਕਦਾ ਹੈ।