15.51C Vancouver 15.51C VancouverAug 7, 2026 1:42 PM - Connect Newsroom - Ramandeep Kaur with files from The Canadian Press
ਕੈਨੇਡੀਅਨ ਅਰਥਵਿਵਸਥਾ ਨੇ ਜੁਲਾਈ ਮਹੀਨੇ ਵਿਚ 75,000 ਨਵੀਆਂ ਨੌਕਰੀਆਂ ਜੋੜੀਆਂ ਹਨ, ਜਿਸ ਨਾਲ ਦੇਸ਼ ਦੀ ਬੇਰੁਜ਼ਗਾਰੀ ਦਰ ਘੱਟ ਕੇ 6.4 ਫੀਸਦੀ 'ਤੇ ਆ ਗਈ ਹੈ, ਇਹ ਬੇਰੁਜ਼ਗਾਰੀ ਦਰ ਦਾ ਪਿਛਲੇ ਦੋ ਸਾਲਾਂ ਦਾ ਸਭ ਤੋਂ ਹੇਠਲਾ ਪੱਧਰ ਹੈ। ਸਟੈਟਿਸਟਿਕਸ ਕੈਨੇਡਾ ਵੱਲੋਂ ਜਾਰੀ ਰਿਪੋਰਟ ਅਨੁਸਾਰ, ਇਹ ਲਗਾਤਾਰ ਤੀਜਾ ਮਹੀਨਾ ਹੈ ਜਦੋਂ ਬੇਰੁਜ਼ਗਾਰੀ ਦਰ ਵਿਚ ਗਿਰਾਵਟ ਦਰਜ ਕੀਤੀ ਗਈ ਹੈ, ਜੋ ਕਿ ਅਪ੍ਰੈਲ ਤੋਂ ਲੈ ਕੇ ਹੁਣ ਤੱਕ ਅੱਧਾ ਫੀਸਦੀ ਪੁਆਇੰਟ ਹੇਠਾਂ ਆ ਚੁੱਕੀ ਹੈ।
ਇਸ ਵਾਰ ਨੌਕਰੀਆਂ ਵਿਚ ਹੋਇਆ ਇਹ ਵਾਧਾ ਮਾਹਰਾਂ ਦੇ ਅਨੁਮਾਨਾਂ ਨਾਲੋਂ ਕਿਤੇ ਜ਼ਿਆਦਾ ਹੈ, ਅਰਥਸ਼ਾਸਤਰੀਆਂ ਨੇ ਸਿਰਫ਼ 15,000 ਨੌਕਰੀਆਂ ਜੁੜਨ ਦਾ ਅਨੁਮਾਨ ਲਗਾਇਆ ਸੀ। ਜੁਲਾਈ ਦੇ ਇਸ ਵਾਧੇ ਵਿਚ ਫੁੱਲ-ਟਾਈਮ ਅਤੇ ਪਾਰਟ-ਟਾਈਮ ਦੋਵਾਂ ਖੇਤਰਾਂ ਵਿਚ ਕਰੀਬ ਬਰਾਬਰ ਦਾ ਯੋਗਦਾਨ ਰਿਹਾ, ਜਿਸ ਵਿਚ ਸਭ ਤੋਂ ਵੱਧ ਮਜਬੂਤੀ ਹੋਲਸੇਲ ਅਤੇ ਰਿਟੇਲ ਵਪਾਰ, ਵਿੱਤ ਅਤੇ ਇਨਸ਼ੌਰੈਂਸ ਵਰਗੇ ਨਿੱਜੀ ਖੇਤਰਾਂ ਵਿਚ ਦੇਖੀ ਗਈ।
ਸੂਬਿਆਂ ਦੇ ਹਿਸਾਬ ਨਾਲ ਓਨਟਾਰੀਓ ਨੇ ਸਭ ਤੋਂ ਵੱਧ 52,000 ਨੌਕਰੀਆਂ ਜੋੜੀਆਂ, ਜਦੋਂ ਕਿ ਬੈਂਕ ਔਫ ਕੈਨੇਡਾ ਲਈ ਰਾਹਤ ਦੀ ਗੱਲ ਇਹ ਰਹੀ ਕਿ ਸਾਲਾਨਾ Average hourly wages ਦੀ ਵਾਧਾ ਦਰ ਪਿਛਲੇ ਮਹੀਨੇ ਦੇ 3.3 ਫੀਸਦੀ ਤੋਂ ਘਟ ਕੇ 2.8 ਫੀਸਦੀ ਰਹੀ, ਜੋ ਮਹਿੰਗਾਈ ਦੇ ਕੰਟਰੋਲ ਵਿਚ ਹੋਣ ਦਾ ਸੰਕੇਤ ਹੈ।
