ਕੈਨੇਡਾ ਸਰਕਾਰ ਨੇ ਆਇਰਿਸ਼ ਰੈਪ ਗਰੁੱਪ ਕੀਨਕੈਪ ਨੂੰ ਦੇਸ਼ ਵਿਚ ਦਾਖ਼ਲ ਹੋਣ ਤੋਂ ਰੋਕਿਆ

ਕੈਨੇਡਾ ਸਰਕਾਰ ਨੇ ਆਇਰਿਸ਼ ਰੈਪ ਗਰੁੱਪ ਕੀਨਕੈਪ ਨੂੰ ਦੇਸ਼ ਵਿਚ ਦਾਖ਼ਲ ਹੋਣ ਤੋਂ ਰੋਕ ਦਿੱਤਾ ਹੈ। ਇਹ ਜਾਣਕਾਰੀ ਟੋਰੌਂਟੋ ਤੋਂ ਐਮਪੀ ਵਿੰਸ ਗੈਸਪਾਰੋ ਨੇ ਇੱਕ ਪੋਸਟ ਵਿਚ ਦਿੱਤੀ। ਉਨ੍ਹਾਂ ਕਿਹਾ ਕਿ ਮੈਂ ਕੈਨੇਡਾ ਸਰਕਾਰ ਵਲੋਂ ਇਹ ਐਲਾਨ ਕਰ ਰਿਹਾ ਹਾਂ ਕਿ ਸਾਡੇ ਅਧਿਕਾਰੀਆਂ ਦੀ ਸਲਾਹ 'ਤੇ ਅਸੀਂ ਕੀਨਕੈਪ ਗਰੁੱਪ ਨੂੰ ਸਾਡੇ ਦੇਸ਼ ਵਿਚ ਦਾਖਲ ਹੋਣ ਲਈ ਅਯੋਗ ਕਰਾਰ ਦਿੱਤਾ ਹੈ।

ਗੈਸਪਾਰੋ ਨੇ ਕਿਹਾ ਕਿ ਸਾਡੀ ਸਰਕਾਰ ਰਾਜਨੀਤਿਕ ਹਿੰਸਾ,ਅੱਤਵਾਦ,ਯਹੂਦੀ ਭਾਈਚਾਰੇ ਵਿਰੋਧੀ ਭਾਵਨਾ ਅਤੇ ਨਫ਼ਰਤ ਨੂੰ ਬਿਲਕੁਲ ਬਰਦਾਸ਼ਤ ਨਹੀਂ ਕਰਦੀ। ਉਨ੍ਹਾਂ ਕੀਨਕੈਪ ਵਲੋਂ ਖਾਸ ਤੌਰ 'ਤੇ ਰਾਜਨੀਤਿਕ ਹਿੰਸਾ ਨੂੰ ਵਧਾਉਣ ਅਤੇ ਹਿਜ਼ਬੁੱਲਾ ਤੇ ਹਮਾਸ ਵਰਗੇ ਸੰਗਠਨਾਂ ਲਈ ਜਨਤਕ ਤੌਰ 'ਤੇ ਸਮਰਥਨ ਕਰਨ ਦਾ ਹਵਾਲਾ ਦਿੱਤਾ,ਜਿਨ੍ਹਾਂ ਨੂੰ ਕੈਨੇਡਾ ਵਲੋਂ ਅੱਤਵਾਦੀ ਸੰਗਠਨ ਮੰਨਿਆ ਜਾਂਦਾ ਹੈ।

ਕੀਨਕੈਪ ਗਰੁੱਪ ਨੇ ਅਕਤੂਬਰ ਵਿਚ ਟੋਰੌਂਟੋ ਵਿਚ ਅਤੇ ਵੈਨਕੂਵਰ ਵਿਚ ਦੋ-ਦੋ ਸ਼ੋਅ ਕਰਨੇ ਸਨ। ਕੈਨੇਡਾ ਦਾ ਇਹ ਕਦਮ ਇਸ ਗਰਮੀਆਂ ਦੇ ਸ਼ੁਰੂ ਵਿਚ ਹੰਗਰੀ ਦੇ ਇਸੇ ਤਰ੍ਹਾਂ ਦੇ ਫੈਸਲੇ ਤੋਂ ਬਾਅਦ ਆਇਆ ਹੈ।