15.1C Vancouver 15.1C VancouverJun 17, 2020 7:12 PM -
ਇਹ ਪਤਾ ਲਗਾਉਣ ਲਈ ਕਿ ਅਜੇ ਤੱਕ ਕਿੰਨੇ ਲੋਕ ਕੋਵਿਡ-19 ਤੋਂ ਪ੍ਰਭਾਵਿਤ ਹੋ ਚੁੱਕੇ ਹਨ, ਫ਼ੈਡਰਲ ਸਰਕਾਰ ਵੱਲੋਂ ਹਜ਼ਾਰਾਂ ਕੈਨੇਡਾ ਵਾਸੀਆਂ ਦੇ ਖੂਨ ਵਿੱਚ ਸੰਬੰਧਿਤ ਐਂਟੀਬੌਡੀਜ਼ ਦੀ ਪਹਿਚਾਣ ਕਰਨ ਲਈ ਟੈਸਟ ਕੀਤੇ ਜਾਣਗੇ।
ਕੈਨੇਡਾ ਦੀ ਪ੍ਰਮੁੱਖ ਸਿਹਤ ਅਧਿਕਾਰੀ, ਡਾ. ਥੈਰੇਸਾ ਟੈਮ ਨੇ ਦੱਸਿਆ ਕਿ ਸਰਕਾਰ ਦੀ ਇਮਿਊਨਿਟੀ ਟਾਸਕ ਫ਼ੋਰਸ ਵੱਲੋਂ ਇਹ ਕਾਰਜ, ਕਨੇਡੀਅਨ ਬਲੱਡ ਸਰਵਿਸਿਜ਼ ਅਤੇ ਹੇਮਾ-ਕਿਊਬੇਕ ਦੇ ਸਹਿਯੋਗ ਨਾਲ ਕੀਤਾ ਜਾਵੇਗਾ।
ਫ਼ੈਡਰਲ ਸਰਕਾਰ ਨੇ ਅੱਜ ਐਲਾਨ ਕੀਤਾ ਕਿ ਇਸ ਕਾਰਜ ਲਈ 1 ਲੱਖ, 40 ਹਜ਼ਾਰ ਸੇਰੋਲੌਜਿਕਲ ਟੈਸਟ ਖਰੀਦਣ ਲਈ, ਐਬੱਟ ਲੈਬੋਰੇਟੋਰੀਜ਼ ਨਾਲ ਇਕਰਾਰਨਾਮਾ ਕੀਤਾ ਗਿਆ ਹੈ।
ਇਹ ਬਲੱਡ ਟੈਸਟ, ਸ਼ਰੀਰ ਵਿੱਚ ਉਹਨਾਂ ਐਂਟੀਬੌਡੀਜ਼ ਦੀ ਪਹਿਚਾਣ ਕਰ ਸਕਦੇ ਹਨ ਜੋ ਕੋਵਿਡ-19 ਦੀ ਇਨਫ਼ੈਕਸ਼ਨ ਹੋਣ ਤੋਂ ਬਾਅਦ ਪੈਦਾ ਹੁੰਦੀਆਂ ਹਨ।
ਹੈਲਥ ਕੈਨੇਡਾ ਵੱਲੋਂ ਐਬੱਟ ਲੈਬੋਰੇਟੋਰੀਜ਼ ਦੇ ਸੇਰੋਲੌਜਿਕਲ ਟੈਸਟਾਂ ਨੂੰ 21 ਮਈ ਨੂੰ ਮਾਨਤਾ ਦਿੱਤੀ ਗਈ ਸੀ, ਪਰ ਇਹਨਾਂ ਦੀ ਖਰੀਦ ਨਾਲ ਸੰਬੰਧਿਤ ਗੱਲਬਾਤ ਵਿੱਚ ਕਈ ਹਫ਼ਤੇ ਲੱਗ ਗਏ ਹਨ।
ਕਿਉਂਕਿ ਕਈ ਮਹੀਨਿਆਂ ਲਈ ਕੋਵਿਡ-19 ਦੇ ਟੈਸਟ ਸੀਮਿਤ ਜਨਸੰਖਿਆ ਨੂੰ ਹੀ ਮੁਹੱਈਆ ਕਰਵਾਏ ਗਏ, ਅਤੇ ਕਿਉਂਕਿ ਲੱਛਣ ਸਾਹਮਣੇ ਆਉਣ ਤੋਂ ਬਿਨਾਂ ਵੀ ਕਿਸੇ ਨੂੰ ਇਨਫ਼ੈਕਸ਼ਨ ਹੋ ਸਕਦੀ ਹੈ, ਕੋਵਿਡ-19 ਤੋਂ ਪ੍ਰਭਾਵਿਤ ਲੋਕਾਂ ਦੀ ਅਸਲ ਸੰਖਿਆ ਪਤਾ ਕਰਨ ਲਈ ਇਮਿਊਨਿਟੀ ਟੈਸਟਾਂ ਦੀ ਜ਼ਰੂਰਤ ਹੈ।
