15.52C Vancouver 15.52C VancouverJul 28, 2026 6:52 PM - Connect Newsroom - Ramanpreet kaur with files from The Canadian Press
ਕੈਨੇਡਾ ਦੀ ਇਮੀਗ੍ਰੇਸ਼ਨ ਮੰਤਰੀ ਲੀਨਾ ਡਾਇਬ ਨੇ ਆਨਲਾਈਨ ਪਾਸਪੋਰਟ ਰੀਨਿਊ ਕਰਵਾਉਣ ਦੀ ਲਿਮਟ ਹਟਾਉਣ ਦਾ ਐਲਾਨ ਕੀਤਾ ਹੈ। ਵੈਨਕੂਵਰ ਵਿਚ ਇੱਕ ਪ੍ਰੈੱਸ ਕਾਨਫਰੰਸ ਦੌਰਾਨ ਡਾਇਬ ਨੇ ਕਿਹਾ ਹੁਣ ਦੇਸ਼ ਵਿਚ ਔਨਲਾਈਨ ਪਾਸਪੋਰਟ ਨਵੀਨੀਕਰਨ ਸਰਵਿਸ 16 ਸਾਲ ਤੋਂ ਵੱਧ ਉਮਰ ਦੇ ਸਾਰੇ ਯੋਗ ਬਾਲਗ ਕੈਨੇਡੀਅਨਜ਼ ਲਈ ਉਪਲਬਧ ਹੋਵੇਗੀ।
ਇਸ ਨਵੇਂ ਡਿਜੀਟਲ ਸਿਸਟਮ ਤਹਿਤ ਕੈਨੇਡਾ ਵਿਚ ਰਹਿਣ ਵਾਲੇ ਬਿਨੈਕਾਰ ਹੁਣ ਬਿਨਾਂ ਕਿਸੇ ਖਾਲੀ ਸਪੋਟ ਦੀ ਉਡੀਕ ਕੀਤੇ ਕਿਸੇ ਵੀ ਸਮੇਂ ਔਨਲਾਈਨ ਅਪਲਾਈ ਕਰ ਸਕਦੇ ਹਨ। ਇਸ ਪ੍ਰਕਿਰਿਆ ਦੀ ਸਭ ਤੋਂ ਵੱਡੀ ਰਾਹਤ ਇਹ ਹੈ ਕਿ ਹੁਣ ਅਸਲੀ ਦਸਤਾਵੇਜ਼ ਨੂੰ ਡਾਕ ਰਾਹੀਂ ਭੇਜਣ ਦੀ ਲੋੜ ਨਹੀਂ ਪਵੇਗੀ। ਸਰਕਾਰ ਨੇ ਭਰੋਸਾ ਦਿੱਤਾ ਹੈ ਕਿ ਔਨਲਾਈਨ ਪ੍ਰੋਸੈਸਿੰਗ ਸਮਾਂ 20 ਕਾਰੋਬਾਰੀ ਦਿਨ ਦਾ ਹੋਵੇਗਾ।
ਇਸ ਦੇ ਨਾਲ ਹੀ ਜਿਹੜੇ ਲੋਕ ਪੁਰਾਣੇ ਤਰੀਕੇ ਦੀ ਵਰਤੋਂ ਕਰਨਾ ਚਾਹੁੰਦੇ ਹਨ, ਉਨ੍ਹਾਂ ਲਈ ਖੁਦ ਦਫ਼ਤਰ ਜਾ ਕੇ ਜਾਂ ਮੇਲ ਰਾਹੀਂ ਅਪਲਾਈ ਕਰਨ ਦੇ ਵਿਕਲਪ ਪਹਿਲਾਂ ਵਾਂਗ ਹੀ ਉਪਲਬਧ ਰਹਿਣਗੇ। ਇਹ ਔਨਲਾਈਨ ਅਪਲਾਈ ਸਿਰਫ਼ ਕੈਨੇਡਾ ਦੇ ਅੰਦਰ ਰਹਿ ਕੇ ਹੀ ਕੀਤਾ ਜਾ ਸਕਦਾ ਹੈ, ਜਿਸ ਲਈ ਬਿਨੈਕਾਰਾਂ ਨੂੰ ਕਿਸੇ ਵਪਾਰਕ ਫੋਟੋਗ੍ਰਾਫਰ ਤੋਂ ਖਿਚਵਾਈ ਡਿਜੀਟਲ ਪਾਸਪੋਰਟ ਸਾਈਜ਼ ਫੋਟੋ ਅਤੇ ਆਪਣੇ ਜ਼ਰੂਰੀ ਦਸਤਾਵੇਜ਼ ਡਿਜੀਟਲ ਰੂਪ ਵਿਚ ਅਪਲੋਡ ਕਰਨੇ ਹੋਣਗੇ।
