ਕੈਨੇਡਾ ਦਾ ਖਸਰਾ ਰਹਿਤ ਦੇਸ਼ ਵਜੋਂ ਦਰਜਾ ਹੋ ਸਕਦਾ ਹੈ ਰੱਦ

ਕੈਨੇਡਾ 2025 ਵਿਚ ਖਸਰੇ ਦੇ ਵਾਇਰਸ ਦੇ ਇੱਕ ਵੱਡੇ ਉਭਾਰ ਕਾਰਨ 25 ਸਾਲਾਂ ਤੋਂ ਵੱਧ ਸਮੇਂ ਬਾਅਦ ਆਪਣਾ ਖਸਰਾ-ਮੁਕਤ ਇੰਟਰਨੈਸ਼ਨਲ ਸਟੇਟਸ ਗੁਆ ਸਕਦਾ ਹੈ। 1998 ਤੋਂ ਕੈਨੇਡਾ ਨੂੰ ਖਸਰਾ ਮੁਕਤ ਦੇਸ਼ ਦਾ ਦਰਜਾ ਮਿਲਿਆ ਹੋਇਆ ਸੀ ਪਰ ਇਸ ਸਾਲ ਨਿਊ ਬਰੰਜ਼ਵਿਕ ਤੋਂ ਸ਼ੁਰੂ ਹੋਏ ਅਤੇ ਦੂਜੇ ਸੂਬਿਆਂ ਵਿਚ ਫੈਲੇ ਖਸਰੇ ਦੇ ਮਾਮਲਿਆਂ ਨੇ ਇਸ ਸਟੇਟਸ ਲਈ ਨਿਰਧਾਰਤ ਸਟੈਂਡਡ ਨੂੰ ਪਾਰ ਕਰ ਲਿਆ ਹੈ।

ਵਿਸ਼ਵ ਸਿਹਤ ਸੰਸਥਾ ਦੀ ਨੌਰਥ ਅਤੇ ਸਾਊਥ ਅਮਰੀਕਾ ਲਈ ਖੇਤਰੀ ਏਜੰਸੀ ਪੀ.ਏ.ਐਚ.ਓ.ਯਾਨੀ ਪੈਨ-ਅਮਰੀਕਨ ਹੈਲਥ ਆਰਗੇਨਾਈਜ਼ੇਸ਼ਨ ਨਵੰਬਰ ਵਿਚ ਇੱਕ ਮੀਟਿੰਗ ਦੌਰਾਨ ਕੈਨੇਡਾ ਦੇ ਖਸਰਾ ਖ਼ਤਮ ਹੋਣ ਦੀ ਸਥਿਤੀ ਦਾ ਰੀਵਿਊ ਕਰੇਗੀ। 27 ਅਕਤੂਬਰ 2024 ਤੋਂ ਇਸ ਵਾਇਰਸ ਨਾਲ ਕੈਨੇਡਾ ਵਿਚ 5,000 ਤੋਂ ਵੱਧ ਲੋਕ ਸੰਕ੍ਰਮਿਤ ਹੋ ਚੁੱਕੇ ਹਨ,ਜਿਸ ਵਿਚ ਓਨਟਾਰੀਓ ਅਤੇ ਐਲਬਰਟਾ ਦੇ ਉਹ ਦੋ ਬੱਚੇ ਵੀ ਸ਼ਾਮਲ ਹਨ ਜੋ ਗਰਭ ਵਿਚ ਖਸਰੇ ਨਾਲ ਸੰਕਰਮਿਤ ਹੋਏ ਸਨ ਅਤੇ ਜਨਮ ਤੋਂ ਬਾਅਦ ਉਨ੍ਹਾਂ ਦੀ ਮੌਤ ਹੋ ਗਈ ਸੀ।

ਪਬਲਿਕ ਹੈਲਥ ਅਤੇ ਇਨਫੈਕਸ਼ਨ ਡੀਸੀਜ਼ ਦੇ ਮਾਹਰ ਖਸਰੇ ਦੀ ਵਾਪਸੀ ਦਾ ਕਾਰਨ ਘਟਦੀ ਟੀਕਾਕਰਨ ਦਰਾਂ ਨੂੰ ਮੰਨਦੇ ਹਨ। ਡਬਲਿਊ.ਐਚ.ਓ.ਮੁਤਾਬਕ,ਜਿਹੜੇ ਦੇਸ਼ ਖਾਤਮੇ ਦੀ ਸਥਿਤੀ ਗੁਆਉਣਗੇ ਉਨ੍ਹਾਂ ਨੂੰ ਇੱਕ ਸੁਧਾਰਾਤਮਕ ਐਕਸ਼ਨ ਪਲੈਨ ਸਬਮਿਟ ਕਰਨ ਲਈ ਕਿਹਾ ਜਾਵੇਗਾ।