14.28C Vancouver 14.28C VancouverSep 5, 2025 5:13 PM - Connect Newsroom
ਕੈਨੇਡਾ ਨੂੰ ਅਗਸਤ ਵਿਚ ਕਰੀਬ 66,000 ਜੌਬਸ ਦਾ ਨੁਕਸਾਨ ਹੋਇਆ ਹੈ ਅਤੇ ਬੇਰੁਜ਼ਗਾਰੀ ਦਰ 7.1 ਫੀਸਦੀ 'ਤੇ ਪਹੁੰਚ ਗਈ ਹੈ ਜੋ ਮਹਾਂਮਾਰੀ ਸਮੇਂ ਨੂੰ ਛੱਡ ਕੇ ਨੌਂ ਸਾਲਾਂ ਵਿਚ ਸਭ ਤੋਂ ਉਚ ਦਰ ਹੈ। ਸਟੈਟਿਸਟਿਕਸ ਕੈਨੇਡਾ ਨੇ ਕਿਹਾ ਕਿ ਪਿਛਲੇ ਮਹੀਨੇ ਕੈਨੇਡੀਅਨ ਅਰਥਵਿਵਸਥਾ ਵਿਚ ਜ਼ਿਆਦਾਤਰ ਪਾਰਟ-ਟਾਈਮ ਜੌਬਸ ਵਿਚ ਗਿਰਾਵਟ ਆਈ।
ਬੇਰੁਜ਼ਗਾਰੀ ਦਰ ਵਧਣ ਨਾਲ ਇਸ ਮਹੀਨੇ ਬੈਂਕ ਔਫ ਕੈਨੇਡਾ ਵਲੋਂ ਵਿਆਜ ਦਰਾਂ ਵਿਚ ਕਟੌਤੀ ਦੀ ਸੰਭਾਵਨਾ ਵੀ ਵੱਧ ਗਈ ਹੈ। ਕੈਨੇਡਾ ਵਿਚ ਅਗਸਤ ਵਿਚ ਲਗਭਗ 1.6 ਮਿਲੀਅਨ ਲੋਕ ਬੇਰੁਜ਼ਗਾਰ ਸਨ। ਸਟੈਟਿਸਟਿਕਸ ਕੈਨੇਡਾ ਮੁਤਾਬਕ,7 ਫੀਸਦੀ ਦੇ ਆਸਪਾਸ ਬੇਰੁਜ਼ਗਾਰੀ ਦਰ ਦਾ ਪੱਧਰ ਆਖਰੀ ਵਾਰ ਮਈ 2016 ਵਿਚ ਦੇਖਿਆ ਗਿਆ ਸੀ।
ਗੌਰਤਲਬ ਹੈ ਕਿ ਕੈਨੇਡਾ ਦੀ ਆਰਥਿਕਤਾ ਨੇ ਪਿਛਲੇ ਕੁਝ ਮਹੀਨਿਆਂ ਵਿਚ ਸਟੀਲ,ਐਲੂਮੀਨੀਅਮ ਅਤੇ ਕਾਰਾਂ 'ਤੇ ਅਮਰੀਕੀ ਟੈਰਿਫਸ ਦੇ ਸਾਹਮਣੇ ਸਹਿਣਯੋਗ ਪੱਧਰ ਦਿਖਾਇਆ ਹੈ ਪਰ ਸਟੈਟਕੈਨ ਦੇ ਲੇਟਸਟ ਲੇਬਰ ਡੇਟਾ ਤੋਂ ਪਤਾ ਚੱਲਦਾ ਹੈ ਕਿ ਟੈਰਿਫਸ ਨੇ ਦੂਜੇ ਖੇਤਰਾਂ ਨੂੰ ਵੀ ਪ੍ਰਭਾਵਿਤ ਕਰਨਾ ਸ਼ੁਰੂ ਕਰ ਦਿੱਤਾ ਹੈ।
ਅਗਸਤ ਵਿਚ ਆਵਾਜਾਈ,ਪੇਸ਼ੇਵਰ ਸੇਵਾਵਾਂ ਅਤੇ ਸਿੱਖਿਆ ਖੇਤਰ ਵਰਗੇ ਸਵੈ-ਰੁਜ਼ਗਾਰ ਅਤੇ ਸਰਵਿਸ ਸਬੰਧਤ ਉਦਯੋਗ ਨੇ ਜੌਬਸ ਵਿਚ ਨੁਕਸਾਨ ਦਰਜ ਕੀਤਾ। ਨਿਰਮਾਣ ਖੇਤਰ ਵਿਚ 19 ਹਜ਼ਾਰ ਜੌਬਸ ਦੀ ਗਿਰਾਵਟ ਆਈ ਹੈ।
