ਕੈਨੇਡਾ 'ਚ ਇੰਟਰਨੈਸ਼ਨਲ ਵਿਦਿਆਰਥੀਆਂ ਦੇ ਸਟਡੀ ਪਰਮਿਟ 50 ਫੀਸਦੀ ਘਟਣ ਦੀ ਉਮੀਦ

ਕੈਨੇਡਾ ਵਿਚ ਪੜ੍ਹਨ ਲਈ ਆਉਣ ਵਾਲੇ ਨਵੇਂ ਇੰਟਰਨੈਸ਼ਨਲ ਸਟੂਡੈਂਟਸ ਨੂੰ ਸਟੱਡੀ ਪਰਮਿਟਸ ਪ੍ਰਾਪਤ ਕਰਨ ਲਈ ਸ਼ੰਘਰਸ਼ ਕਰਨਾ ਪੈ ਸਕਦਾ ਹੈ। ਰਿਪੋਰਟਸ ਮੁਤਾਬਕ, ਕੈਨੇਡਾ ਵਲੋਂ 2025 ਲਈ ਮਨਜ਼ੂਰ ਕੀਤੇ ਗਏ ਸਟੱਡੀ ਪਰਮਿਟ ਦੀ ਗਿਣਤੀ ਵਿਚ ਪਿਛਲੇ ਸਾਲ ਨਾਲੋਂ 50 ਫੀਸਦੀ ਗਿਰਾਵਟ ਆਉਣ ਦੀ ਸੰਭਾਵਨਾ ਹੈ ਕਿਉਂਕਿ ਵੱਡੀ ਗਿਣਤੀ ਵਿਚ ਸਟੱਡੀ ਪਰਮਿਟ ਉਨ੍ਹਾਂ ਇੰਟਰਨੈਸ਼ਨਲ ਸਟੂਡੈਂਟਸ ਨੂੰ ਦਿੱਤੇ ਜਾ ਰਹੇ ਹਨ ਜੋ ਕੈਨੇਡਾ ਵਿਚ ਹੀ ਹਨ ਅਤੇ ਸਕੂਲ ਜਾਂ ਪ੍ਰੋਗਰਾਮ ਬਦਲ ਰਹੇ ਹਨ ਜਾਂ ਕੈਨੇਡਾ ਵਿਚ ਆਪਣੀ ਅੱਗੇ ਦੀ ਸਟੱਡੀ ਲਈ ਯੋਜਨਾ ਬਣਾ ਰਹੇ ਹਨ।

ਅਪਲਾਈ ਬੋਰਡ ਵਲੋਂ ਕੀਤੇ ਗਏ ਤਾਜ਼ਾ ਵਿਸ਼ੇਸ਼ਲਣ ਮੁਤਾਬਕ, ਨਵੇਂ ਅੰਤਰਰਾਸ਼ਟਰੀ ਵਿਦਿਆਰਥੀਆਂ ਵਿਚ ਗਿਰਾਵਟ ਪੋਸਟ ਸੈਕੰਡਰੀ ਸਿੱਖਿਆ ਖੇਤਰ ਲਈ ਮੁਸੀਬਤ ਖੜ੍ਹੀ ਕਰ ਸਕਦੀ ਹੈ ਅਤੇ ਘੱਟੋ-ਘੱਟ ਅਗਲੇ ਤਿੰਨ ਸਾਲਾਂ ਤੱਕ ਦਾਖਲੇ ਵਿਚ ਗਿਰਾਵਟ ਆਉਂਦੀ ਰਹੇਗੀ।

ਅਪਲਾਈ ਬੋਰਡ ਦੇ ਸੀ.ਈ.ਓ. ਅਤੇ ਸਹਿ-ਸੰਸਥਾਪਕ ਮੇਤੀ ਬਸੀਰੀ ਨੇ ਕਿਹਾ ਕਿ ਕੈਨੇਡਾ ਨੂੰ ਘੱਟ ਨਵੇਂ ਵਿਦਿਆਰਥੀਆਂ ਦੀ ਗਿਣਤੀ ਤੋਂ ਚਿੰਤਤ ਹੋਣਾ ਚਾਹੀਦਾ ਹੈ ਕਿਉਂਕਿ ਇਸ ਨਾਲ ਕਾਲਜ ਅਤੇ ਯੂਨੀਵਰਸਿਟੀਆਂ ਦੀ ਫੰਡਿੰਗ 'ਤੇ ਅਸਰ ਪਵੇਗਾ।