ਕੈਨੇਡਾ ਪੋਸਟ ਅਤੇ ਪੋਸਟਲ ਵਰਕਰ ਯੂਨੀਅਨ ਵਿਚਕਾਰ ਅਸਥਾਈ ਸਮਝੌਤਿਆਂ 'ਤੇ ਬਣੀ ਸਹਿਮਤੀ

ਕੈਨੇਡਾ ਪੋਸਟ ਅਤੇ ਪੋਸਟਲ ਵਰਕਰ ਯੂਨੀਅਨ ਵਿਚਾਲੇ ਲੰਮੇ ਸਮੇਂ ਤੋਂ ਰਹੀ ਖਿੱਚੋਤਾਣ ਅੱਜ ਇੱਕ ਇਤਿਹਾਸਕ ਸਮਝੌਤੇ ਨਾਲ ਖ਼ਤਮ ਹੋ ਗਈ ਹੈ। ਨਵੇਂ ਆਰਜ਼ੀ ਸਮਝੌਤੇ ਤਹਿਤ ਡਾਕ ਮੁਲਾਜ਼ਮਾਂ ਦੀਆਂ ਤਨਖ਼ਾਹਾਂ ਵਿਚ ਚੰਗਾ ਵਾਧਾ ਅਤੇ ਹੋਰ ਲਾਭ ਸ਼ਾਮਲ ਕੀਤੇ ਗਏ ਹਨ। ਕੈਨੇਡਾ ਪੋਸਟ ਮੁਤਾਬਕ, ਸਮਝੌਤੇ ਦੀਆਂ ਸ਼ਰਤਾਂ ਮੁਤਾਬਕ ਮੁਲਾਜ਼ਮਾਂ ਨੂੰ ਪਹਿਲੇ ਸਾਲ ਵਿਚ 6.5 ਫੀਸਦੀ ਦਾ ਵਾਧਾ ਮਿਲੇਗਾ, ਜਿਸ ਤੋਂ ਬਾਅਦ ਦੂਜੇ ਸਾਲ ਵਿਚ ਉਨ੍ਹਾਂ ਦੀਆਂ ਤਨਖ਼ਾਹਾਂ ਵਿਚ 3 ਫੀਸਦੀ ਦਾ ਹੋਰ ਇਜ਼ਾਫਾ ਕੀਤਾ ਜਾਵੇਗਾ।

ਇਸ ਸਮਝੌਤੇ ਦੀ ਅਹਿਮ ਗੱਲ ਇਹ ਹੈ ਕਿ ਤੀਜੇ ਸਾਲ ਤੋਂ ਲੈ ਕੇ 5ਵੇਂ ਸਾਲ ਤੱਕ ਤਨਖ਼ਾਹਾਂ ਵਿਚ ਹੋਣ ਵਾਲਾ ਵਾਧਾ ਦੇਸ਼ ਦੇ ਸਾਲਾਨਾ ਮਹਿੰਗਾਈ ਦਰ ਦੇ ਨਾਲ ਜੋੜ ਦਿੱਤਾ ਗਿਆ ਹੈ,ਜਿਸ ਨਾਲ ਡਾਕ ਮੁਲਾਜ਼ਮਾਂ ਦੀ ਤਨਖ਼ਾਹ ਮਹਿੰਗਾਈ ਦੇ ਮੁਕਾਬਲੇ ਸਥਿਰ ਰਹੇਗੀ। ਇਸ ਵਿਚ ਵੀਕੈਂਡ ਪਾਰਸਲ ਡਿਲਿਵਰੀ ਮਾਡਲ ਵੀ ਸ਼ਾਮਲ ਹੈ। ਦੋਵੇਂ ਸਮਝੌਤੇ 31 ਜਨਵਰੀ, 2029 ਤੱਕ ਲਾਗੂ ਰਹਿਣਗੇ। ਸੀ.ਯੂ.ਪੀ.ਡਬਲਿਊ .ਨੇ ਕਿਹਾ ਕਿ 2026 ਦੇ ਸ਼ੁਰੂ ਵਿਚ ਰਸਮੀ ਤੌਰ 'ਤੇ ਵੋਟਿੰਗ ਕਰਵਾਈ ਜਾਵੇਗੀ।

ਯੂਨੀਅਨ ਨੇ ਉਮੀਦ ਜਤਾਈ ਕਿ ਨਵੇਂ ਸਾਲ ਵਿਚ ਮੈਂਬਰਾਂ ਦੀ ਮੋਹਰ ਲੱਗਣ ਤੋਂ ਬਾਅਦ ਇਹ ਸਮਝੌਤਾ ਅਧਿਕਾਰਤ ਤੌਰ 'ਤੇ ਲਾਗੂ ਹੋ ਜਾਵੇਗਾ, ਜਿਸ ਨਾਲ ਲੰਬੇ ਸਮੇਂ ਤੋਂ ਚੱਲ ਰਹੀ ਅਨਿਸ਼ਚਿਤਤਾ ਖ਼ਤਮ ਹੋ ਜਾਵੇਗੀ। ਯੂਨੀਅਨ ਅਤੇ ਕੈਨੇਡਾ ਪੋਸਟ ਨੇ ਕਿਹਾ ਕਿ ਉਹ ਇਸ ਗੱਲ 'ਤੇ ਸਹਿਮਤ ਹੋਏ ਹਨ ਕਿ ਵੋਟਿੰਗ ਪ੍ਰਕਿਰਿਆ ਦੌਰਾਨ ਹੜਤਾਲ ਜਾਂ ਲੌਕਆਊਟ ਦੀ ਕਾਰਵਾਈ ਨਹੀਂ ਹੋਵੇਗੀ।