ਕੈਨੇਡਾ ਪੋਸਟ ਨੇ ਤੀਜੀ ਤਿਮਾਹੀ ਵਿਚ $315 ਮਿਲੀਅਨ ਦਾ ਘਾਟਾ ਕੀਤਾ ਦਰਜ

ਕੈਨੇਡਾ ਪੋਸਟ ਨੇ ਤੀਜੀ ਤਿਮਾਹੀ ਵਿਚ $315 ਮਿਲੀਅਨ ਦਾ ਘਾਟਾ ਦਰਜ ਕੀਤਾ ਹੈ। ਇੱਕ ਸਾਲ ਪਹਿਲਾਂ ਇਸੇ ਕੁਆਰਟਰ ਵਿਚ ਇਹ ਘਾਟਾ $290 ਮਿਲੀਅਨ ਸੀ। ਡਿਪਾਰਟਮੈਂਟ ਨੇ ਕਿਹਾ ਕਿ ਸਿੱਧੀ ਮਾਰਕੀਟਿੰਗ ਦੇ ਆਮਦਨ ਵਿਚ ਵਾਧੇ ਨਾਲ ਵੀ ਉਸ ਦੇ ਪਾਰਸਲ ਦੀ ਆਮਦਨ ਵਿਚ ਗਿਰਾਵਟ ਦੀ ਭਰਪਾਈ ਨਹੀਂ ਹੋ ਸਕੀ। ਇਹ ਵਿੱਤੀ ਨਤੀਜੇ ਅਜਿਹੇ ਸਮੇਂ ਆਏ ਹਨ ਜਦੋਂ ਕੈਨੇਡਾ ਪੋਸਟ ਨੂੰ ਉਸ ਦੇ ਦੇਸ਼ ਭਰ ਵਿਚ ਲਗਭਗ 55,000 ਵਰਕਰਾਂ ਦੀ ਹੜਤਾਲ ਕਾਰਨ ਆਪਣਾ ਕੰਮ ਬੰਦ ਕਰਨਾ ਪਿਆ ਹੈ।

ਦੋਵੇਂ ਧਿਰਾਂ ਤਨਖਾਹਾਂ, ਨੌਕਰੀ ਦੀ ਸੁਰੱਖਿਆ, ਕੰਮ ਕਰਨ ਦੇ ਹਾਲਾਤ ਅਤੇ ਹੋਰ ਮੁੱਦਿਆਂ ’ਤੇ ਗੱਲਬਾਤ ਕਰ ਰਹੀਆਂ ਹਨ ਪਰ ਹੁਣ ਤੱਕ ਇਨ੍ਹਾਂ ’ਤੇ ਸਹਿਮਤੀ ਨਹੀਂ ਬਣ ਸਕੀ ਹੈ। ਕੈਨੇਡਾ ਪੋਸਟ ਵਿਚ ਇੱਕ ਹਫ਼ਤੇ ਤੋਂ ਹੜਤਾਲ ਚੱਲ ਰਹੀ ਹੈ।

ਇਸ ਵਿਚਕਾਰ ਕੈਨੇਡਾ ਭਰ ਵਿਚ 97,000 ਛੋਟੇ ਅਤੇ ਦਰਮਿਆਨੇ ਆਕਾਰ ਦੇ ਕਾਰੋਬਾਰ ਦੀ ਨੁਮਾਇੰਦਗੀ ਕਰਨ ਵਾਲੇ ਸੰਗਠਨ ਕੈਨੇਡੀਅਨ ਫੈਡਰੇਸ਼ਨ ਆਫ ਇੰਡੀਪੈਂਡੈਂਟ ਬਿਜ਼ਨਸ ਨੇ ਫੈਡਰਲ ਸਰਕਾਰ ਨੂੰ ਮਜ਼ਦੂਰੀ ਵਿੱਚ ਰੁਕਾਵਟ ਖਤਮ ਕਰਨ ਲਈ ਤੁਰੰਤ ਕਦਮ ਚੁੱਕਣ ਦੀ ਅਪੀਲ ਕੀਤੀ ਹੈ।