ਕੈਨੇਡਾ ਪੋਸਟ ਨੇ ਹੜਤਾਲੀ ਡਾਕ ਕਰਮਚਾਰੀਆਂ ਨੂੰ ਦਿੱਤੀਆਂ ਨਵੀਆਂ ਪੇਸ਼ਕਸ਼ਾਂ

ਕੈਨੇਡਾ ਪੋਸਟ ਨੇ ਸ਼ੁੱਕਰਵਾਰ ਨੂੰ ਪੋਸਟਲ ਵਰਕਰ ਯੂਨੀਅਨ ਨੂੰ ਭੇਜੇ ਪ੍ਰਸਤਾਵ ਵਿਚ 4 ਸਾਲਾਂ ਵਿਚ ਉਹੀ 13.59 ਫੀਸਦੀ ਤਨਖ਼ਾਹ ਵਾਧੇ ਦਾ ਔਫਰ ਦਿੱਤਾ ਹੈ, ਜਿਸ ਨੂੰ ਉਸ ਨੇ ਮਈ ਵਿਚ ਵੀ ਪੇਸ਼ ਕੀਤਾ ਸੀ। ਕੰਪਨੀ ਨੇ ਵਿੱਤੀ ਸਥਿਤੀ ਖਰਾਬ ਹੋਣ ਦਾ ਹਵਾਲਾ ਦਿੰਦੇ ਹੋਏ ਪ੍ਰਸਤਾਵ ਵਿਚ ਪਿਛਲੀ ਸਾਈਨਿੰਗ ਬੋਨਸ ਦੀ ਪੇਸ਼ਕਸ਼ ਨੂੰ ਵੀ ਹਟਾ ਦਿੱਤਾ ਹੈ।

ਕੈਨੇਡਾ ਪੋਸਟ ਨੇ ਕਿਹਾ ਕਿ ਉਸ ਲਈ ਹੁਣ ਸਾਈਨਿੰਗ ਬੋਨਸ ਦੇਣਾ ਸੰਭਵ ਨਹੀਂ ਹੈ। ਕੰਪਨੀ ਨੇ ਕਿਹਾ ਕਿ ਨਵੇਂ ਪ੍ਰਸਤਾਵ ਵਿਚ ਫੈਡਰਲ ਸਰਕਾਰ ਵਲੋਂ ਸ਼ੁਰੂ ਕੀਤੇ ਗਏ ਪੋਸਟਲ ਸਰਵਿਸ ਵਿਚ ਪਰਿਵਰਤਨ ਦਾ ਸਮਰਥਨ ਕਰਨ ਲਈ ਵੀ ਸ਼ਰਤਾਂ ਸ਼ਾਮਲ ਹਨ। ਗੌਰਤਲਬ ਹੈ ਕਿ ਸਰਕਾਰ ਵਲੋਂ ਕੈਨੇਡਾ ਪੋਸਟ ਵਿਚ ਵੱਡੇ ਬਦਲਾਅ ਦਾ ਐਲਾਨ ਕਰਨ ਦੇ ਕੁਝ ਘੰਟਿਆਂ ਮਗਰੋਂ ਹੀ ਪੋਸਟਲ ਵਰਕਰ 25 ਸਤੰਬਰ ਨੂੰ ਹੜਤਾਲ 'ਤੇ ਚਲੇ ਗਏ ਸਨ।

ਇਨ੍ਹਾਂ ਬਦਲਾਅ ਵਿਚ ਕੰਪਨੀ ਦੀ ਖਰਾਬ ਵਿੱਤੀ ਸਥਿਤੀ ਨੂੰ ਠੀਕ ਕਰਨ ਲਈ ਡੌਰ-ਟੂ-ਡੌਰ ਡਿਲਿਵਰੀ ਬੰਦ ਕਰਨਾ, ਕੁਝ ਪੇਂਡੂ ਡਾਕਘਰਾਂ ਨੂੰ ਬੰਦ ਕਰਨਾ ਅਤੇ ਮੇਲ ਬਾਕਸ ਦੀ ਵਰਤੋਂ ਵਧਾਉਣਾ ਸ਼ਾਮਲ ਹੈ। ਸੀ.ਯੂ.ਪੀ.ਡਬਲਿਊ ਨੇ ਕਿਹਾ ਕਿ ਉਹ ਤਾਜ਼ਾ ਪੇਸ਼ਕਸ਼ ਦਾ ਚੰਗੀ ਤਰ੍ਹਾਂ ਨਾਲ ਰੀਵਿਊ ਕਰਨਗੇ ਤਾਂ ਜੋ ਇਹ ਦੇਖਿਆ ਜਾ ਸਕੇ ਕਿ ਕੀ ਇਹ ਉਨ੍ਹਾਂ ਦੇ ਵਰਕਰਜ਼, ਉਨ੍ਹਾਂ ਦੇ ਪਰਿਵਾਰਾਂ ਅਤੇ ਕੈਨੇਡਾ ਪੋਸਟ 'ਤੇ ਨਿਰਭਰ ਲੋਕਾਂ ਦੀਆਂ ਜ਼ਰੂਰਤਾਂ ਨੂੰ ਪੂਰਾ ਕਰਦਾ ਹੈ।