ਕੈਨੇਡੀਅਨ ਅਰਥਵਿਵਸਥਾ ਨੂੰ ਜਨਵਰੀ ਮਹੀਨੇ 25,000 ਨੌਕਰੀਆਂ ਦਾ ਨੁਕਸਾਨ, ਬੇਰਜ਼ੁਗਾਰੀ ਦਰ ਵੀ ਘਟੀ

ਕੈਨੇਡੀਅਨ ਅਰਥਵਿਵਸਥਾ ਨੂੰ ਜਨਵਰੀ ਮਹੀਨੇ ਵਿਚ ਵੱਡਾ ਝਟਕਾ ਲੱਗਾ ਹੈ। ਸਟੈਟਿਸਟਿਕਸ ਕੈਨੇਡਾ ਦੀ ਤਾਜ਼ਾ ਲੇਬਰ ਫੋਰਸ ਰਿਪੋਰਟ ਅਨੁਸਾਰ ਦੇਸ਼ ਵਿਚ ਕਰੀਬ 25,000 ਨੌਕਰੀਆਂ ਦੀ ਗਿਰਾਵਟ ਆਈ ਹੈ, ਜਿਨ੍ਹਾਂ ਵਿਚੋਂ ਸਭ ਤੋਂ ਵੱਧ ਰੁਜ਼ਗਾਰ ਦਾ ਨੁਕਸਾਨ ਨਿਰਮਾਣ ਖੇਤਰ ਵਿਚ ਹੋਇਆ ਹੈ ਕਿਉਂਕਿ ਅਮਰੀਕੀ ਟੈਰਿਫ ਨੇ ਇਸ ਖੇਤਰ ਨੂੰ ਲਗਾਤਾਰ ਪ੍ਰਭਾਵਿਤ ਕੀਤਾ ਹੈ।

ਹਾਲਾਂਕਿ, ਨੌਕਰੀਆਂ ਜਾਣ ਦੇ ਬਾਵਜੂਦ ਬੇਰੁਜ਼ਗਾਰੀ ਦਰ ਦਸੰਬਰ ਦੇ 6.8 ਫੀਸਦੀ ਤੋਂ ਘੱਟ ਕੇ 6.5 ਫੀਸਦੀ 'ਤੇ ਆ ਗਈ ਹੈ। ਏਜੰਸੀ ਮੁਤਾਬਕ, ਇਸ ਦਾ ਕਾਰਨ ਇਹ ਹੈ ਕਿ ਬਹੁਤ ਸਾਰੇ ਲੋਕਾਂ ਨੇ ਕੰਮ ਲੱਭਣਾ ਹੀ ਬੰਦ ਕਰ ਦਿੱਤਾ ਹੈ, ਜਿਸ ਕਾਰਨ ਉਹ ਸਰਕਾਰੀ ਅੰਕੜਿਆਂ ਵਿਚ ਬੇਰੁਜ਼ਗਾਰ ਵਜੋਂ ਨਹੀਂ ਗਿਣੇ ਗਏ। ਪਿਛਲੇ ਮਹੀਨੇ ਨੌਕਰੀਆਂ ਜਾਣ ਦਾ ਸਭ ਤੋਂ ਵੱਧ ਅਸਰ ਪ੍ਰਾਈਵੇਟ ਸੈਕਟਰ, ਪਾਰਟ ਟਾਈਮ ਵਰਕ ਅਤੇ 25 ਤੋਂ 54 ਸਾਲ ਦੀ ਉਮਰ ਦੀਆਂ ਔਰਤਾਂ 'ਤੇ ਪਿਆ ਹੈ।

ਸਟੈਟਕੈਨ ਮੁਤਾਬਕ,15 ਸਾਲ ਜਾਂ ਇਸ ਤੋਂ ਵੱਧ ਉਮਰ ਦੇ ਲਗਭਗ 12 ਮਿਲੀਅਨ ਲੋਕ ਲੇਬਰ ਫੋਰਸ ਤੋਂ ਬਾਹਰ ਹਨ, ਜਿਨ੍ਹਾਂ ਵਿਚੋਂ ਕਈ ਅਜਿਹੇ ਹਨ ਜੋ ਕੰਮ ਲੱਭਣ ਤੋਂ ਨਿਰਾਸ਼ ਹੋ ਚੁੱਕੇ ਹਨ ਕਿਉਂਕਿ ਉਨ੍ਹਾਂ ਨੂੰ ਲੱਗਦਾ ਹੈ ਕਿ ਉਨ੍ਹਾਂ ਦੇ ਹੁਨਰ ਮੁਤਾਬਕ ਕੰਮ ਉਪਲਬਧ ਨਹੀਂ ਹੈ। ਅਗਸਤ ਤੋਂ ਬਾਅਦ ਇਹ ਪਹਿਲੀ ਵਾਰ ਹੈ ਕਿ ਕੈਨੇਡਾ ਵਿਚ ਨੌਕਰੀਆਂ ਦੀ ਗਿਣਤੀ ਵਿਚ ਨੈਟ ਲੌਸ ਦਰਜ ਕੀਤੀ ਗਈ ਹੈ। ਮਨੀ ਮਾਰਕਿਟ ਦਾ ਮੰਨਣਾ ਹੈ ਕਿ ਲੇਬਰ ਮਾਰਕੀਟ ਦੀ ਇਸ ਸਥਿਤੀ ਕਾਰਨ ਬੈਂਕ ਔਫ ਕੈਨੇਡਾ ਵਿਆਜ ਦਰਾਂ ਨੂੰ ਇਸ ਸਾਲ ਸਥਿਰ ਰੱਖ ਸਕਦਾ ਹੈ।