6.97C Vancouver 6.97C VancouverJul 3, 2020 4:29 PM -
ਫ਼ੌਰਨ ਅਫ਼ੇਅਰਜ਼ ਮਿਨਿਸਟਰ ਫ਼੍ਰਾਂਸੂਆ-ਫ਼ੀਲੀਪ ਸ਼ੈਂਪੇਨ ਵੱਲੋਂ ਅੱਜ ਜਾਰੀ ਕੀਤੇ ਗਏ ਇੱਕ ਬਿਆਨ ਮੁਤਾਬਕ ਕੈਨੇਡਾ ਅਤੇ ਹੌਂਗ ਕੌਂਗ ਵਿਚਕਾਰ ਮੌਜੂਦਾ ਹਵਾਲਗੀ ਸਮਝੌਤੇ (extradition treaty) ਨੂੰ ਰੱਦ ਕੀਤਾ ਜਾ ਰਿਹਾ ਹੈ।
ਇਹ ਫ਼ੈਸਲਾ ਚੀਨ ਵੱਲੋਂ ਹੌਂਗ ਕੌਂਗ 'ਚ ਲਾਗੂ ਕੀਤੇ ਗਏ ਨਵੇਂ ਸੁਰੱਖਿਆ ਕਾਨੂੰਨ ਦੇ ਵਿਰੋਧ ਵਿੱਚ ਲਿਆ ਗਿਆ ਹੈ।
ਇਸ ਤੋਂ ਇਲਾਵਾ, ਹੁਣ ਕੈਨੇਡਾ, ਹੌਂਗ ਕੌਂਗ ਭੇਜੇ ਜਾਣ ਵਾਲੇ ਸੰਵੇਦਨਸ਼ੀਲ ਸਾਮਾਨ ਨੂੰ ਉਸੇ ਤਰ੍ਹਾਂ ਦੇਖੇਗਾ ਜਿਵੇਂ ਚੀਨ ਨੂੰ ਭੇਜੇ ਜਾਣ ਵਾਲੇ ਅਜਿਹੇ ਸਾਮਾਨ ਨੂੰ ਵੇਖਿਆ ਜਾਂਦਾ ਹੈ।
ਮਿਲਟਰੀ ਨਾਲ ਸੰਬੰਧਿਤ ਸੰਵੇਦਨਸ਼ੀਲ ਸਾਮਾਨ ਦੇ ਹੌਂਗ ਕੌਂਗ ਭੇਜੇ ਜਾਣ 'ਤੇ ਤੁਰੰਤ ਰੋਕ ਲਗਾਈ ਜਾ ਰਹੀ ਹੈ।
ਚੀਨ ਵੱਲੋਂ ਇਸ ਹਫ਼ਤੇ ਹੌਂਗ ਕੌਂਗ ਪ੍ਰਤੀ "ਇੱਕ ਦੇਸ਼, ਦੋ ਤੰਤਰ" ਦੇ ਸਿਧਾਂਤ ਦੀ ਉਲੰਘਣਾ ਕਰਦੇ ਹੋਏ, ਨਵਾਂ ਸੁਰੱਖਿਆ ਕਾਨੂੰਨ ਲਾਗੂ ਕੀਤਾ ਗਿਆ ਹੈ, ਜਿਸ ਤਹਿਤ ਚੀਨ ਦੀ ਸਰਕਾਰ ਦੇ ਖਿਲਾਫ਼ ਗੱਲ ਕਰਨ ਵਾਲੇ ਕਿਸੇ ਵੀ ਹੌਂਗ ਕੌਂਗ ਨਿਵਾਸੀ ਖਿਲਾਫ਼ ਚੀਨ ਵਿੱਚ ਕਾਨੂੰਨੀ ਕਾਰਵਾਈ ਹੋ ਸਕਦੀ ਹੈ।
ਇਸ ਹਫ਼ਤੇ ਅਮਰੀਕਾ ਵੱਲੋਂ ਵੀ ਹੌਂਗ ਕੌਂਗ ਨਾਲ ਵਪਾਰ ਉੱਤੇ ਅਜਿਹੀਆਂ ਪਾਬੰਦੀਆਂ ਦਾ ਐਲਾਨ ਕੀਤਾ ਗਿਆ ਸੀ।
