19.53C Vancouver 19.53C VancouverJan 12, 2026 2:47 PM - Connect Newsroom - Ramandeep Kaur with files from The Canadian Press
ਕੈਨੇਡਾ ਸਰਕਾਰ ਨੇ ਸਪੱਸ਼ਟ ਕੀਤਾ ਹੈ ਕਿ ਉਹ ਦੇਸ਼ ਵਿਚ ਸੋਸ਼ਲ ਮੀਡੀਆ ਪਲੇਟਫਾਰਮ ਐਕਸ 'ਤੇ ਪਾਬੰਦੀ ਲਗਾਉਣ ਬਾਰੇ ਕੋਈ ਵਿਚਾਰ ਨਹੀਂ ਕਰ ਰਹੀ। ਇਹ ਬਿਆਨ ਆਰਟੀਫੀਸ਼ੀਅਲ ਇੰਟੈਲੀਜੈਂਸ ਅਤੇ ਡਿਜੀਟਲ ਇਨੋਵੇਸ਼ਨ ਮਿਨਿਸਟਰ ਈਵਾਨ ਸੋਲੋਮਨ ਵਲੋਂ ਐਤਵਾਰ ਰਾਤ ਨੂੰ ਜਾਰੀ ਕੀਤਾ ਗਿਆ। ਐਲੋਨ ਮਸਕ ਦੀ ਮਾਲਕੀ ਵਾਲੇ ਪਲੇਟਫਾਰਮ ਐਕਸ ਦੇ ਏਆਈ ਚੈਟਬੋਟ ਗ੍ਰੋਕ ਰਾਹੀਂ ਬਣਾਈਆਂ ਜਾ ਰਹੀਆਂ ਇਤਰਾਜ਼ਯੋਗ ਡੀਪਫੇਕ ਤਸਵੀਰਾਂ ਨੂੰ ਲੈ ਕੇ ਫਰਾਂਸ, ਭਾਰਤ ਅਤੇ ਬ੍ਰਾਜ਼ੀਲ ਸਮੇਤ ਦੁਨੀਆ ਭਰ ਵਿਚ ਚਰਚਾ ਛਿੜੀ ਹੋਈ ਹੈ।
ਸ਼ਨੀਵਾਰ ਨੂੰ ਰਿਪੋਰਟਸ ਆਈਆਂ ਸਨ ਯੂ. ਕੇ. ਸਰਕਾਰ ਵਿਵਾਦ ਦਾ ਜਵਾਬ ਦੇਣ ਲਈ ਅੰਤਰਰਾਸ਼ਟਰੀ ਸਮਰਥਨ ਜੁਟਾ ਰਹੀ ਹੈ, ਜਿਸ ਵਿਚ ਕੈਨੇਡਾ ਨੇ ਵੀ ਬ੍ਰਿਟੇਨ ਦੇ ਪ੍ਰਧਾਨ ਮੰਤਰੀ ਕੀਰ ਸਟਾਰਮਰ ਸਰਕਾਰ ਦੀਆਂ ਚਿੰਤਾਵਾਂ ਨਾਲ ਸਹਿਮਤੀ ਜਤਾਈ ਹੈ। ਹਾਲਾਂਕਿ, ਇਨ੍ਹਾਂ ਮੀਡੀਆ ਰਿਪੋਰਟਸ ਦਾ ਖੰਡਨ ਕਰਦੇ ਹੋਏ ਈਵਾਨ ਸੋਲੋਮਨ ਨੇ ਸੋਸ਼ਲ ਮੀਡੀਆ 'ਤੇ ਪੋਸਟ ਕਰਦਿਆਂ ਕਿਹਾ ਕਿ ਕੈਨੇਡਾ ਵਿਚ ਐਕਸ 'ਤੇ ਪਾਬੰਦੀ ਲਗਾਉਣ ਦਾ ਕੋਈ ਇਰਾਦਾ ਨਹੀਂ ਹੈ। ਉਨ੍ਹਾਂ ਕਿਹਾ ਕਿ ਸਰਕਾਰ ਅਜਿਹੀਆਂ ਗਤੀਵਿਧੀਆਂ ਨੂੰ ਰੋਕਣ ਲਈ ਕਾਨੂੰਨ 'ਤੇ ਕੰਮ ਕਰ ਰਹੀ ਹੈ।
ਬਿੱਲ ਸੀ-16 ਇਸੇ ਲਈ ਲਿਆਂਦਾ ਗਿਆ ਹੈ, ਜਿਸ ਤਹਿਤ ਬਿਨਾਂ ਸਹਿਮਤੀ ਦੇ ਡੀਪਫੇਕ ਤਸਵੀਰਾਂ ਬਣਾਉਣਾ ਜਾਂ ਸਾਂਝੀਆਂ ਕਰਨ ਨੂੰ ਕ੍ਰਿਮੀਨਲ ਓਫੈਂਸ ਮੰਨਿਆ ਜਾਵੇਗਾ। ਗੌਰਤਲਬ ਹੈ ਕਿ ਡੀਪਫੇਕ ਨੂੰ ਲੈ ਕੇ ਗ੍ਰੋਕ ਏ.ਆਈ. ਖਿਲਾਫ ਬ੍ਰਿਟੇਨ ਦੇ ਮੀਡੀਆ ਰੈਗੂਲੇਟਰ ਵਲੋਂ ਜਾਂਚ ਸ਼ੁਰੂ ਕੀਤੀ ਗਈ ਹੈ।
