9.71C Vancouver 9.71C VancouverJan 9, 2026 4:33 PM - Connect Newsroom - Jasmine Singh with files from The Canadian Press
ਕੈਨੇਡਾ ਵਿਚ ਰੁਜ਼ਗਾਰ ਵਧਣ ਦੇ ਬਾਵਜੂਦ ਬੇਰੁਜ਼ਗਾਰੀ ਦਰ 6.8 ਫੀਸਦੀ 'ਤੇ ਪਹੁੰਚੀ ਗਈ ਹੈ। ਸਟੈਟਿਸਟਿਕਸ ਕੈਨੇਡਾ ਵੱਲੋਂ ਸ਼ੁੱਕਰਵਾਰ ਨੂੰ ਜਾਰੀ ਤਾਜ਼ਾ ਅੰਕੜਿਆਂ ਨੇ ਕੈਨੇਡੀਅਨ ਲੇਬਰ ਬਜ਼ਾਰ ਦੀ ਇੱਕ ਗੁੰਝਲਦਾਰ ਤਸਵੀਰ ਪੇਸ਼ ਕੀਤੀ ਹੈ। ਰਿਪੋਰਟ ਮੁਤਾਬਕ, ਦਸੰਬਰ ਵਿਚ ਲਗਾਤਾਰ ਚੌਥੇ ਮਹੀਨੇ ਰੁਜ਼ਗਾਰ ਦੇ ਮੌਕੇ ਵਧੇ ਹਨ ਪਰ ਇਸ ਦੇ ਨਾਲ ਹੀ ਬੇਰੁਜ਼ਗਾਰਾਂ ਦੀ ਗਿਣਤੀ ਵਿਚ ਵੀ ਤਿੰਨ ਸਾਲਾਂ ਦਾ ਵੱਡਾ ਉਛਾਲ ਦੇਖਣ ਨੂੰ ਮਿਲਿਆ ਹੈ।
ਸਟੈਟਕੈਨ ਮੁਤਾਬਕ, ਦਸੰਬਰ ਮਹੀਨੇ ਵਿਚ ਕੁੱਲ 8,200 ਨਵੀਆਂ ਨੌਕਰੀਆਂ ਪੈਦਾ ਹੋਈਆਂ, ਜਿਸ ਨਾਲ ਪਿਛਲੇ ਚਾਰ ਮਹੀਨਿਆਂ ਵਿਚ ਕੁੱਲ 1,88,800 ਨੌਕਰੀਆਂ ਦਾ ਵਾਧਾ ਹੋਇਆ ਹੈ। ਹਾਲਾਂਕਿ, ਲੇਬਰ ਫੋਰਸ ਵਿਚ ਸ਼ਾਮਲ ਹੋਏ ਲੋਕਾਂ ਦੀ ਗਿਣਤੀ ਨੌਕਰੀਆਂ ਦੇ ਵਾਧੇ ਨਾਲੋਂ ਕਿਤੇ ਜ਼ਿਆਦਾ ਸੀ,ਜਿਸ ਕਾਰਨ ਬੇਰੁਜ਼ਗਾਰ ਲੋਕਾਂ ਦੀ ਗਿਣਤੀ 72,900 ਵੱਧ ਗਈ। ਇਹ ਅਗਸਤ 2022 ਤੋਂ ਬਾਅਦ ਬੇਰੁਜ਼ਗਾਰੀ ਵਿਚ ਸਭ ਤੋਂ ਵੱਡਾ ਮਹੀਨਾਵਾਰ ਵਾਧਾ ਹੈ। ਗੌਰਤਲਬ ਹੈ ਕਿ ਨਵੇਂ ਸਾਲ ਵਿਚ ਵੀ ਰੁਜ਼ਗਾਰ ਦੇ ਮੌਕੇ ਘਟਣ ਦੇ ਅਨੁਮਾਨ ਹਨ।
ਡੇਲੋਇਟ ਕੈਨੇਡਾ ਦੀ ਹਾਲ ਦੀ ਰਿਪੋਰਟ ਅਨੁਸਾਰ, 2026 ਦੇ ਪਹਿਲੇ ਛੇ ਮਹੀਨਿਆਂ ਵਿਚ ਕਾਰੋਬਾਰ ਨਵੀਆਂ ਭਰਤੀਆਂ ਦੀਆਂ ਯੋਜਨਾਵਾਂ ਨੂੰ ਸੀਮਤ ਕਰ ਸਕਦੇ ਹਨ ਕਿਉਂਕਿ ਟੈਰਿਫਸ ਕਾਰਨ ਮੰਗ ਘਟਣ ਦੀ ਸੰਭਾਵਨਾ ਹੈ। ਉਥੇ ਹੀ, ਮਨੀ ਮਾਰਕਿਟ ਨੇ ਫਿਲਹਾਲ ਦੇ ਅਨੁਮਾਨ ਵਿਚ ਬੈਂਕ ਔਫ ਕੈਨੇਡਾ ਵਲੋਂ ਵੀ ਵਿਆਜ ਦਰਾਂ ਸਾਲ ਦੇ ਬਾਕੀ ਸਮੇਂ ਲਈ ਸਥਿਰ ਰੱਖੇ ਜਾਣ ਦੀ ਸੰਭਾਵਨਾ ਜਤਾਈ ਹੈ।
