ਮਿਡਲ ਈਸਟ ਤਣਾਅ ਵਿਚਕਾਰ ਕੈਨੇਡਾ ਲਈ ਐਲ.ਐਨ.ਜੀ. ਨਿਰਯਾਤ ਵਧਾਉਣ ਦਾ ਮੌਕਾ: ਊਰਜਾ ਮੰਤਰੀ

ਕੈਨੇਡਾ ਨੂੰ ਮਿਡਲ ਈਸਟ ਵਿਚ ਬਣੇ ਜੰਗੀ ਹਾਲਾਤ ਵਿਚਕਾਰ ਤੇਲ ਅਤੇ ਗੈਸ ਦੀ ਸਪਲਾਈ ਵਧਾਉਣ ਦਾ ਮੌਕਾ ਮਿਲ ਰਿਹਾ ਹੈ, ਊਰਜਾ ਮੰਤਰੀ ਟਿਮ ਹਾਜਸਨ ਦਾ ਕਹਿਣਾ ਹੈ ਕਿ ਕਈ ਦੇਸ਼ਾਂ ਨੇ ਕੈਨੇਡੀਅਨ ਸਪਲਾਈ ਰਾਹੀਂ ਇਸ ਘਾਟ ਨੂੰ ਪੂਰਾ ਕਰਨ ਲਈ ਸੰਪਰਕ ਕੀਤਾ ਹੈ। ਹਾਲਾਂਕਿ, ਮੰਤਰੀ ਨੇ ਇਹ ਸਵੀਕਾਰ ਕੀਤਾ ਕਿ ਐਲ.ਐਨ.ਜੀ.ਜਾਂ ਤੇਲ ਦੇ ਉਤਪਾਦਨ ਨੂੰ ਕੁਝ ਹੀ ਦਿਨਾਂ ਵਿਚ ਵਧਾਉਣਾ ਸੰਭਵ ਨਹੀਂ ਹੈ ਪਰ ਉਨ੍ਹਾਂ ਕਿਹਾ ਕਿ ਇਹ ਹਾਲਾਤ ਦਿਖਾਉਂਦੇ ਹਨ ਕਿ ਕੈਨੇਡਾ ਦੇ ਕੁਦਰਤੀ ਸਰੋਤ ਨੂੰ ਵਿਕਸਿਤ ਕਰਨ ਦੀ ਜ਼ਰੂਰਤ ਹੈ।

ਹਾਜਸਨ ਨੇ ਇਹ ਨਹੀਂ ਦੱਸਿਆ ਕਿ ਕਿਹੜੇ ਦੇਸ਼ਾਂ ਵਲੋਂ ਕੈਨੇਡੀਅਨ ਐਲ.ਐਨ.ਜੀ. ਜਾਂ ਤੇਲ ਲਈ ਸੰਪਰਕ ਕੀਤਾ ਗਿਆ ਸੀ। ਇਸ ਤੋਂ ਪਹਿਲਾਂ ਉਨ੍ਹਾਂ ਇਸ ਮਹੀਨੇ ਦੇ ਸ਼ੁਰੂ ਵਿਚ ਸੰਸਦੀ ਕਮੇਟੀ ਨੂੰ ਕਿਹਾ ਸੀ ਕਿ ਜਾਪਾਨ, ਸਾਊਥ ਕੋਰੀਆ, ਚੀਨ ਅਤੇ ਭਾਰਤ ਵਰਗੇ ਦੇਸ਼ ਸਾਰੇ ਕੈਨੇਡੀਅਨ ਗੈਸ ਚਾਹੁੰਦੇ ਹਨ।

ਊਰਜਾ ਮੰਤਰੀ ਦਾ ਕਹਿਣਾ ਸੀ ਕਿ ਜੇ ਅਸੀਂ ਇਕ ਅਨੁਮਾਨ ਮੁਤਾਬਕ, ਡਿਲਿਵਰ ਕਰਦੇ ਹਾਂ ਤਾਂ ਕੈਨੇਡਾ ਜਲਦ ਹੀ ਸਾਲਾਨਾ 100 ਮਿਲੀਅਨ ਟਨ ਦੀ ਗੈਸ ਸਪਲਾਈ ਨਾਲ ਦੁਨੀਆ ਦੇ ਸਭ ਤੋਂ ਵੱਡੇ ਐਲਐਨਜੀ ਸਪਲਾਇਰ ਵਿਚੋਂ ਇੱਕ ਬਣ ਸਕਦਾ ਹੈ। ਉਹ ਇਹ ਵੀ ਸਪੱਸ਼ਟ ਕਰ ਚੁੱਕੇ ਹਨ ਕਿ ਕੈਨੇਡਾ ਆਪਣੇ ਸਰੋਤਾਂ ਦੀ ਵਰਤੋਂ ਕਦੇ ਵੀ ਕਿਸੇ 'ਤੇ ਮਨਮਰਜ਼ੀ ਦਾ ਜ਼ੋਰ ਪਾਉਣ ਲਈ ਨਹੀਂ ਕਰੇਗਾ ਬਲਕਿ ਵਿਸ਼ਵ ਸਪਲਾਈ ਚੇਨ ਵਿਚ ਇੱਕ ਭਰੋਸੇਯੋਗ ਵਿਕਲਪ ਹੋਵੇਗਾ।