ਕੈਨੇਡਾ ਨੇ ਯੂਰੋਪ ਨਾਲ ਨਵੀਂ ਸਕਿਓਰਟੀ ਅਤੇ ਰੱਖਿਆ ਪਾਰਟਨਰਸ਼ਿਪ 'ਤੇ ਕੀਤੇ ਦਸਤਖਤ

ਕੈਨੇਡਾ ਅਤੇ ਯੂਰਪ ਨੇ ਅੱਜ ਇਤਿਹਾਸਕ ਕਦਮ ਤਹਿਤ ਸਕਿਓਰਟੀ ਅਤੇ ਰੱਖਿਆ ਪਾਰਟਨਰਸ਼ਿਪ ਵਿਚ ਨਵੇਂ ਯੁੱਗ ਦੀ ਸ਼ੁਰੂਆਤ ਕੀਤੀ ਹੈ। ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਸੋਮਵਾਰ ਨੂੰ ਬ੍ਰਸੇਲਜ਼ ਵਿਚ ਈਯੂ-ਕੈਨੇਡਾ ਸੰਮੇਲਨ ਦੌਰਾਨ ਯੂਰਪੀ ਲੀਡਰਸ ਨਾਲ ਬੈਠਕ ਦੌਰਾਨ ਇਸ ਸਮਝੌਤੇ 'ਤੇ ਦਸਤਖ਼ਤ ਕਰਨ ਦਾ ਐਲਾਨ ਕੀਤਾ।

ਇਸ ਨੂੰ ਅਮਰੀਕਾ 'ਤੇ ਕੈਨੇਡਾ ਦੀ ਨਿਰਭਰਤਾ ਨੂੰ ਘਟਾਉਣ ਵੱਲ ਵੱਡਾ ਕਦਮ ਦੱਸਿਆ ਜਾ ਰਿਹਾ ਹੈ। ਪ੍ਰਧਾਨ ਮੰਤਰੀ ਕਾਰਨੀ ਨੇ ਇਹ ਵੀ ਕਿਹਾ ਕਿ ਕੈਨੇਡਾ ਅਤੇ ਯੂਰਪ ਜਲਦ ਹੀ ਸਬੰਧਾਂ ਨੂੰ ਮਜਬੂਤ ਬਣਾਉਣ ਲਈ ਕਈ ਖੇਤਰਾਂ ਵਿਚ ਗੱਲਬਾਤ ਸ਼ੁਰੂ ਕਰਨਗੇ, ਜਿਸ ਵਿਚ ਵਪਾਰ ਅਤੇ ਆਰਥਿਕ ਸੁਰੱਖਿਆ ਤੋਂ ਇਲਾਵਾ ਜਲਵਾਯੂ ਪਰਿਵਰਤਨ ਤੇ ਵਾਤਾਵਰਣ ਖਿਲਾਫ ਚੁਣੌਤੀਆਂ ਨਾਲ ਮਿਲ ਕੇ ਮੁਕਾਬਲਾ ਕਰਨਾ ਸ਼ਾਮਲ ਹੈ। ਉਨ੍ਹਾਂ ਕਿਹਾ ਕਿ ਇਸ ਨਾਲ ਕੈਨੇਡਾ ਅਤੇ ਯੂਰਪ ਦੋਵਾਂ ਵਿਚ ਵਰਕਰਾਂ, ਕਾਰੋਬਾਰਾਂ ਅਤੇ ਨਾਗਰਿਕਾਂ ਲਈ ਵਧੇਰੇ ਆਰਥਿਕ ਮੌਕੇ ਪੈਦਾ ਹੋਣਗੇ।