13.14C Vancouver 13.14C VancouverApr 2, 2026 7:28 PM - Pervez Sandhu - Connect Newsroom
ਵੈਨਕੂਵਰ ਦੇ ਆਈਕੌਨਿਕ ਬੀ.ਸੀ. ਪਲੇਸ ਸਟੇਡੀਅਮ ਵਿਖੇ ਇੱਕ ਵਾਰ ਫਿਰ ਤੋਂ ਯੁਵਰਾਜ ਸਿੰਘ ਵੱਲੋਂ ਕਰਵਾਇਆ ਜਾਂਦਾ ਕੈਨੇਡਾ ਸੁਪਰ 60 ਟੂਰਨਾਮੈਂਟ ਵਾਪਿਸ ਪਰਤ ਰਿਹਾ ਹੈ।
ਲੀਗ ਦੇ ਦੂਜੇ ਸੀਜ਼ਨ ਦਾ ਐਲਾਨ ਕਰ ਦਿੱਤਾ ਗਿਆ ਹੈ। ਇਸ ਵਾਰ ਇਹ ਲੀਗ 29 ਸਿਤੰਬਰ ਤੋਂ 4 ਅਕਤੂਬਰ ਤੱਕ ਖੇਡੀ ਜਾਵੇਗੀ।
ਪ੍ਰਬੰਧਕਾਂ ਦਾ ਕਹਿਣਾ ਹੈ ਕਿ ਇਹ ਲੀਗ ਇੱਕ ਵਾਰ ਫਿਰ ਤੋਂ ਕ੍ਰਿਕਟ ਦੀ ਖੇਡ ਦੇ ਨਾਲ ਐਂਟਰਟੇਨਮੈਂਟ, ਕਲਚਰਲ ਐਕਟੀਵਿਟੀਸ ਅਤੇ ਕਾਂਸਰਟਸ ਦਾ ਸੁਮੇਲ ਲੈ ਕੇ ਆਵੇਗੀ।
ਲੀਗ ਦੇ ਪ੍ਰਬੰਧਕ ਸਾਬਕਾ ਅੰਤਰਰਾਸ਼ਟਰੀ ਕ੍ਰਿਕਟਰ ਯੁਵਰਾਜ ਸਿੰਘ ਦਾ ਕਹਿਣਾ ਹੈ ਕਿ ਪਹਿਲਾ ਸੀਜ਼ਨ ਕਾਮਯਾਬੀ ਭਰਿਆ ਸੀ ਅਤੇ ਸਾਨੂੰ ਖੁਸ਼ੀ ਹੈ ਕਿ ਅਸੀਂ ਹੁਣ ਦੂਜਾ ਸੀਜ਼ਨ ਕਰਵਾਉਣ ਜਾ ਰਹੇ ਹਾਂ।
ਬੀ.ਸੀ. ਦੀ ਟੂਰਿਜ਼ਮ, ਆਰਟਸ, ਕਲਚਰ ਅਤੇ ਸਪੋਰਟ ਮਿਨਿਸਟਰ ਐਨ ਕੈਂਗ ਨੇ ਲੀਗ ਦੀ ਵਾਪਸੀ 'ਤੇ ਖੁਸ਼ੀ ਪ੍ਰਗਟਾਉਂਦਿਆਂ ਕਿਹਾ ਕਿ ਇਹ ਚੰਗਾ ਮੌਕਾ ਹੈ ਜਦ ਵਰਲਡ ਕਲਾਸ ਖਿਡਾਰੀਆਂ ਅਤੇ ਕੋਚਿਸ ਅਤੇ ਦਰਸ਼ਕਾਂ ਦੇ ਇੱਕ ਵਰਲਡ ਕਲਾਸ ਸਟੇਡੀਅਮ 'ਚ ਮੇਜ਼ਬਾਨੀ ਦਾ ਮੌਕਾ ਮਿਲੇਗਾ।
ਬੀ.ਸੀ. ਪਲੇਸ ਦੇ ਜਨਰਲ ਮੈਨੇਜਰ ਕ੍ਰਿਸ ਮੇਅ ਨੇ ਵੀ ਲੀਗ ਦੇ ਦੂਜੇ ਸੀਜ਼ਨ ਦਾ ਸਵਾਗਤ ਕੀਤਾ।
ਯਾਦ ਰਹੇ ਇਸ ਲੀਗ 'ਚ 10-10 ਓਵਰ ਦੇ ਮੁਕਾਬਲੇ ਹੁੰਦੇ ਹਨ ਅਤੇ ਬੀਤੇ ਸਾਲ ਬਰੈਂਪਟਨ ਬਲਿਟਜ਼ ਨੇ ਪੁਰਸ਼ਾਂ ਦੇ ਮੁਕਾਬਲਿਆਂ 'ਚ ਚੈਂਪੀਅਨਸ਼ਿਪ ਜਿੱਤੀ ਸੀ ਜਦਕਿ ਟੋਰੌਂਟੋ ਸਿਕਸਰਸ ਨੇ ਔਰਤਾਂ ਦੀ ਲੀਗ 'ਚ ਬਾਜ਼ੀ ਮਾਰੀ ਸੀ।
ਦੋਵੇਂ ਟੀਮਾਂ ਇਸ ਵਾਰ ਵੀ ਆਪਣੇ ਖਿਤਾਬ ਦੇ ਬਚਾਅ ਦੀ ਕੋਸ਼ਿਸ਼ ਕਰਨਗੀਆਂ। ਬੀਤੇ ਸਾਲ ਸ਼ਿਖਰ ਧਵਨ, ਸੁਰਹਿ ਰੈਨਾ, ਮਾਰਟਿਨ ਗਪਟਿਲ, ਮੋਇਨ ਅਲੀ, ਅਤੇ ਅਨੇਕਾਂ ਹੋਰ ਅੰਤਰਰਾਸ਼ਟਰੀ ਕ੍ਰਿਕਟ ਖਿਡਾਰੀ ਇਸ ਲੀਗ 'ਚ ਖੇਡਦੇ ਵਿਖਾਈ ਦਿੱਤੇ ਸਨ।
ਇੱਕ ਅਧਿਕਾਰਿਤ ਰਿਲੀਜ਼ ਵਿੱਚ ਆਖਿਆ ਗਿਆ ਕਿ ਇਸ ਸਾਲ ਬੀ.ਸੀ. ਪਲੇਸ ਸਟੇਡੀਅਮ ਵਿਖੇ ਹੀ ਫੀਫਾ ਵਰਲਡ ਕੱਪ ਦੇ ਮੁਕਾਬਲੇ ਖੇਡੇ ਜਾਣੇ ਹਨ ਅਤੇ ਇਸੇ ਮੈਦਾਨ 'ਤੇ ਕੈਨੇਡਾ ਸੁਪਰ 60 ਦੇ ਮੁਕਾਬਲੇ ਹੋਣਾ, ਇਸ ਸਟੇਡੀਅਮ ਦੇ ਮਲਟੀਪਰਪਜ਼ ਅਰੀਨਾ ਵਜੋਂ ਇਤਿਹਾਸਿਕ ਕੱਦ ਨੂੰ ਹੋਰ ਵੀ ਮਜਬੂਤ ਕਰਦਾ ਹੈ।
