25.09C Vancouver 25.09C VancouverMay 19, 2020 9:24 PM -
ਗ੍ਰੀਸ ਕੋਲ ਕ੍ਰੈਸ਼ ਹੋਏ ਕਨੇਡੀਅਨ ਹੈਲੀਕਾਪਟਰ ਦੀ ਭਾਲ ਲਈ ਹੁਣ ਕਨੇਡੀਅਨ ਆਰਮਡ ਫੋਰਸਿਜ਼ ਵੱਲੋਂ ਅਮਰੀਕੀ ਮਿਲਟਰੀ ਦੀ ਮਦਦ ਲਈ ਜਾਵੇਗੀ।
ਗ੍ਰੀਸ ਦੇ ਸਮੁੰਦਰੀ ਤਟਾਂ ਕੋਲ ਆਇਓਨੀਅਨ ਸਮੁੰਦਰ 'ਚ ਕਨੇਡੀਅਨ ਨੇਟੋ ਹੈਲੀਕੌਪਟਰ 29 ਅਪ੍ਰੈਲ ਨੂੰ ਕ੍ਰੈਸ਼ ਹੋ ਗਿਆ ਸੀ।
ਇਸ 'ਤੇ ਸਵਾਰ 6 ਸਰਵਿਸ ਮੈਂਬਰਾਂ ਵਿੱਚੋਂ ਸਿਰਫ ਦੋ ਦੇ ਹੀ ਅਵਸ਼ੇਸ਼ ਮਿਲ ਸਕੇ ਸਨ।
ਇਸ ਘਟਨਾ ਸੰਬੰਧੀ ਜਾਂਚ ਦੇ ਵਧੇਰੇ ਵੇਰਵੇ ਮੰਗਲਵਾਰ ਦੁਪਹਿਰ ਇੱਕ ਨਿਊਜ਼ ਬ੍ਰੀਫਿੰਗ ਦੌਰਾਨ ਸਾਂਝੇ ਕੀਤੇ ਗਏ ਹਨ।
ਜਾਣਕਾਰੀ ਦਿੱਤੀ ਗਈ ਹੈ ਕਿ ਚਾਰ ਅਫਸਰਾਂ ਦੇ ਅਵਸ਼ੇਸ਼ ਅਤੇ ਹੈਲੀਕਾਪਟਰ ਦੇ ਮਲਬੇ ਸੰਬੰਧੀ ਭਾਲ ਕੀਤੀ ਜਾ ਰਹੀ ਹੈ, ਪਰ ਇਸ ਦੇ ਵਿੱਚ ਕੋਈ ਬਹੁਤੀ ਕਾਮਯਾਬੀ ਹੱਥ ਨਹੀਂ ਲੱਗ ਸਕੀ ਹੈ।
ਚਾਰੇ ਲਾਪਤਾ ਅਫ਼ਸਰਾਂ ਨੂੰ ਮ੍ਰਿਤ ਮੰਨ ਲਿਆ ਗਿਆ ਹੈ।
ਕੈਨੇਡਾ ਅਤੇ ਅਮਰੀਕਾ ਦੀਆਂ ਨੇਵੀ ਟੀਮਾਂ ਇਸ ਭਾਲ ਅਤੇ ਜਾਂਚ ਨੂੰ ਇਕੱਠਿਆਂ ਅੱਗੇ ਵਧਾਉਣ ਜਾ ਰਹੀਆਂ ਹਨ।
ਵਾਇਸ ਅਤੇ ਫਲਾਈਟ ਡਾਟਾ-ਰਿਕਾਰਡਰ ਦੀ ਖੋਜ ਹੋ ਚੁੱਕੀ ਸੀ, ਪਰ ਹੈਲੀਕਾਪਟਰ ਦਾ ਮੁੱਖ ਮਲਬਾ, ਕਰੀਬ 3,000 ਮੀਟਰ ਡੂੰਘੇ ਪਾਣੀਆਂ 'ਚ ਕਿਸੇ ਜਗ੍ਹਾ 'ਤੇ ਪਿਆ ਹੈ, ਜਿਸ ਦੀ ਭਾਲ ਲਈ ਕੋਸ਼ਿਸ਼ਾਂ ਕੀਤੀਆਂ ਜਾ ਰਹੀਆਂ ਹਨ।
ਲੈਫਟੀਨੈਂਟ ਜਨਰਲ ਮਾਈਕ ਰੋਲੇਊ, ਜੋ ਕਿ ਦੇਸ਼ ਅਤੇ ਵਿਦੇਸ਼ ਪੱਧਰ 'ਤੇ ਕਨੇਡੀਅਨ ਮਿਲਟਰੀ ਮਿਸ਼ਨਜ਼ 'ਤੇ ਨਜ਼ਰ ਰੱਖਦੇ ਹਨ, ਉਨ੍ਹਾਂ ਦੱਸਿਆ ਕਿ ਅਮਰੀਕੀ ਨੇਵੀ ਮਾਹਿਰਾਂ ਦਾ ਮਲਬੇ ਤੱਕ ਪਹੁੰਚ ਕਰਨ 'ਚ ਮਦਦ ਦੇਣ ਲਈ ਮੌਕੇ 'ਤੇ ਪਹੁੰਚਣਾ ਸ਼ੁਰੂ ਹੋ ਚੁੱਕਿਆ ਸੀ।
ਭਾਲ ਦਾ ਪਹਿਲਾ ਮਿਸ਼ਨ ਹੈਲੀਕਾਪਟਰ ਵਿੱਚ ਮੌਜੂਦ ਕਿਸੇ ਵੀ ਮੈਂਬਰ ਦੇ ਮ੍ਰਿਤ ਸ਼ਰੀਰ ਤੱਕ ਪਹੁੰਚ ਕਰਨਾ ਦੱਸਿਆ ਗਿਆ ਹੈ।
ਜਾਨ ਗਵਾਉਣ ਵਾਲੇ ਸਰਵਿਸ ਮੈਂਬਰਾਂ 'ਚ ਕੈਪਟਨ ਕੇਵਿਨ ਹੈਗਨ, ਕੈਪਟਨ ਬ੍ਰੈਂਡਨ ਈਅਨ ਮੈਕਡੌਨਲਡ, ਕੈਪਟਨ ਮੈਕਸਿਮ ਮੈਰੀਨ-ਮੌਰੀਨ, ਸਬ ਲੈਫਟੀਨੈਂਟ ਮੈਥਿਊ ਪਾਈਕ ਅਤੇ ਮਾਸਟਰ ਕੌਰਪੋਰਲ ਮੈਥਿਊ ਕਜ਼ਨਸ ਸ਼ਾਮਿਲ ਸਨ।
ਘਟਨਾ 'ਚ ਸਭ ਤੋਂ ਪਹਿਲਾਂ ਸਬ ਲੈਫਟੀਨੈਂਟ ਐਬੀਗੇਲ ਕੌਬਰੋ (Sub. Lt. Abigail Cowborough) ਦੇ ਅਵਸ਼ੇਸ਼ ਮਿਲ ਸਕੇ ਸਨ।
