13.36C Vancouver 13.36C VancouverJun 16, 2020 4:23 PM -
ਪ੍ਰਧਾਨ ਮੰਤਰੀ ਜਸਟਿਨ ਟਰੂਡੋ ਦਾ ਕਹਿਣਾ ਹੈ ਕਿ ਕੈਨੇਡਾ ਅਤੇ ਅਮਰੀਕਾ ਦੇ ਬੌਰਡਰ 'ਤੇ ਗੈਰ-ਜ਼ਰੂਰੀ ਆਵਾਜਾਈ 'ਤੇ ਲੱਗੀਆਂ ਪਾਬੰਦੀਆਂ ਘੱਟੋ-ਘੱਟ 21 ਜੁਲਾਈ ਤੱਕ ਜਾਰੀ ਰਹਿਣਗੀਆਂ।
ਵਪਾਰਾਂ ਅਤੇ ਬੌਰਡਰ ਨੇੜਲੀਆਂ ਕਮਿਊਨਟੀਆਂ ਵੱਲੋਂ ਵੱਧ ਰਹੇ ਦਬਾਅ ਦੇ ਬਾਵਜੂਦ, ਟਰੂਡੋ ਫ਼ਿਲਹਾਲ ਇਸ ਸੰਬੰਧ ਵਿੱਚ ਕੋਈ ਜਾਣਕਾਰੀ ਨਹੀਂ ਦੇ ਰਹੇ ਕਿ ਇਹਨਾਂ ਪਾਬੰਦੀਆਂ ਵਿੱਚ ਰਾਹਤਾਂ ਕਦੋਂ ਅਤੇ ਕਿਸ ਤਰ੍ਹਾਂ ਦਿੱਤੀਆਂ ਜਾਣਗੀਆਂ।
ਮਾਰਚ ਵਿੱਚ ਪਹਿਲੀ ਵਾਰ 30 ਦਿਨਾਂ ਦੀ ਪਾਬੰਦੀ ਲੱਗਣ ਪਿੱਛੋਂ ਇਸ ਨੂੰ ਹੁਣ ਤੱਕ ਤਿੰਨ ਵਾਰ ਵਧਾਇਆ ਜਾ ਚੁੱਕਿਆ ਹੈ।
ਇਹਨਾਂ ਪਾਬੰਦੀਆਂ ਤਹਿਤ ਛੁੱਟੀ ਮਨਾਉਣ ਜਾਂ ਖਰੀਦਦਾਰੀ ਕਰਨ ਲਈ ਬੌਰਡਰ ਪਾਰ ਕਰਨ 'ਤੇ ਰੋਕ ਹੈ, ਪਰ ਅਸੈਨਸ਼ੀਅਲ ਵਰਕਰਾਂ, ਵਪਾਰਕ ਮਾਲ ਅਤੇ ਅਸਥਾਈ ਵਿਦੇਸ਼ੀ ਕਾਮਿਆਂ ਨੂੰ ਆਉਣ ਜਾਣ ਦੀ ਖੁੱਲ ਹੈ।
ਜਿਉਂ-ਜਿਉਂ ਕਨੇਡੀਅਨ ਸੂਬੇ ਅਤੇ ਅਮਰੀਕੀ ਰਾਜ ਹੌਲੀ-ਹੌਲੀ ਆਪਣੀਆਂ ਅਰਥਵਿਵਸਥਾਵਾਂ ਨੂੰ ਖੋਲ ਰਹੇ ਹਨ, ਤਿਉਂ-ਤਿਉਂ ਬੌਰਡਰ ਨੇੜਲੀਆਂ ਕਮਿਊਨਟੀਆਂ ਵੱਲੋਂ ਬੌਰਡਰ ਖੋਲ੍ਹਣ ਦੀ ਮੰਗ ਜ਼ੋਰ ਫੜ੍ਹ ਰਹੀ ਹੈ।
ਅਮਰੀਕਾ ਵਿੱਚ ਕੋਵਿਡ-19 ਦੀ ਦੂਜੀ ਲਹਿਰ ਦੀ ਸੰਭਾਵਨਾ ਬੀਤੇ ਦਿਨਾਂ ਦੌਰਾਨ ਲਗਤਾਰ ਵੱਧਦੀ ਪ੍ਰਤੀਤ ਹੋ ਰਹੀ ਹੈ ਕਿਉਂਕਿ ਹਾਲ ਵਿੱਚ ਹੀ ਮੁੜ ਖੁੱਲੇ ਰਾਜਾਂ ਵਿੱਚ ਇਸ ਵਾਇਰਸ ਦੇ ਮਰੀਜ਼ਾਂ ਦੀ ਕੁੱਲ ਸੰਖਿਆ ਅਤੇ ਹਸਪਤਾਲ ਵਿੱਚ ਭਰਤੀ ਹੋਏ ਮਰੀਜ਼ਾਂ ਦੀ ਗਿਣਤੀ ਵਿੱਚ ਵੱਡਾ ਉਛਾਲ ਵੇਖਣ ਨੂੰ ਮਿਲਿਆ ਹੈ।
