13.79C Vancouver 13.79C VancouverFeb 17, 2026 2:38 PM - Connect Newsroom - Ramandeep Kaur with files from The Canadian Press
ਕੈਨੇਡਾ ਵਿਚ ਜਨਵਰੀ ਮਹੀਨੇ ਦੌਰਾਨ ਸਾਲਾਨਾ ਮਹਿੰਗਾਈ ਦਰ ਵਿਚ ਉਮੀਦ ਨਾਲੋਂ ਵੱਧ ਗਿਰਾਵਟ ਦਰਜ ਹੋਈ ਹੈ। ਸਟੈਟਿਸਟਿਕਸ ਕੈਨੇਡਾ ਅਨੁਸਾਰ, ਗੈਸੋਲੀਨ ਕੀਮਤਾਂ ਵਿਚ ਆਈ ਕਮੀ ਨੇ ਖਾਣ-ਪੀਣ ਦੀਆਂ ਚੀਜ਼ਾਂ ਅਤੇ ਕੱਪੜਿਆਂ ਦੀਆਂ ਵਧੀਆਂ ਕੀਮਤਾਂ ਦੇ ਪ੍ਰਭਾਵ ਨੂੰ ਕਾਫ਼ੀ ਹੱਦ ਤੱਕ ਘੱਟ ਕੀਤਾ। ਦਸੰਬਰ ਵਿਚ ਮਹਿੰਗਾਈ ਦਰ 2.4 ਫੀਸਦੀ ਸੀ, ਜੋ ਜਨਵਰੀ ਵਿਚ 2.3 ਫੀਸਦੀ ਦਰਜ ਹੋਈ ਹੈ। ਇਹ ਅਰਥਸ਼ਾਸਤਰੀਆਂ ਦੇ ਅਨੁਮਾਨ ਤੋਂ ਬਿਹਤਰ ਨਤੀਜਾ ਹੈ, ਜਿਨ੍ਹਾਂ ਨੂੰ ਇਸ ਦੇ ਸਥਿਰ ਰਹਿਣ ਦੀ ਉਮੀਦ ਸੀ।
ਮਹਿੰਗਾਈ ਦਰ ਨੂੰ ਘਟਾਉਣ ਵਿਚ ਵੱਡਾ ਯੋਗਦਾਨ ਪਾਉਣ ਵਾਲੀਆਂ ਤੇਲ ਦੀਆਂ ਕੀਮਤਾਂ ਵਿਚ 16.7 ਫੀਸਦੀ ਗਿਰਾਵਟ ਦੇਖੀ ਗਈ। ਹਾਲਾਂਕਿ, ਇਸ ਦੇ ਬਾਵਜੂਦ ਆਮ ਆਦਮੀ ਦੇ ਫੂਡ ਬਜਟ 'ਤੇ ਮਹਿੰਗਾਈ ਦੀ ਮਾਰ ਜਾਰੀ ਹੈ। ਸਟੈਟਿਸਟਿਕਸ ਕੈਨੇਡਾ ਮੁਤਾਬਕ, ਭੋਜਨ ਦੀਆਂ ਕੀਮਤਾਂ ਵਿਚ 7.3 ਫੀਸਦੀ ਦਾ ਵਾਧਾ ਦਰਜ ਕੀਤਾ ਗਿਆ ਹੈ, ਜਿਸ ਵਿਚ ਰੈਸਟੋਰੈਂਟ ਦਾ ਖਾਣਾ ਮੁੱਖ ਤੌਰ 'ਤੇ ਮਹਿੰਗਾ ਹੋਇਆ ਹੈ।
ਪਿਛਲੇ ਸਾਲ ਸੇਲ ਟੈਕਸ ਵਿਚ ਮਿਲੀ ਛੋਟ ਖ਼ਤਮ ਹੋਣ ਕਾਰਨ ਇਸ ਵਾਰ ਇਹ ਚੀਜ਼ਾਂ ਮਹਿੰਗੀਆਂ ਮਹਿਸੂਸ ਹੋ ਰਹੀਆਂ ਹਨ। ਤਾਜ਼ਾ ਮਹਿੰਗਾਈ ਰਿਪੋਰਟ ਦੇ ਬਾਵਜੂਦ ਇਹ ਸੰਭਾਵਨਾ ਬਹੁਤ ਘੱਟ ਹੈ ਕਿ ਬੈਂਕ ਔਫ ਕੈਨੇਡਾ ਆਪਣੀ ਮੌਜੂਦਾ ਨੀਤੀ ਵਿਚ ਕੋਈ ਵੱਡੀ ਤਬਦੀਲੀ ਕਰੇਗਾ। ਬੈਂਕ ਦੀ ਨਜ਼ਰ ਫਿਲਹਾਲ ਕੁਸਮਾ ਵਪਾਰ ਸਮਝੌਤੇ 'ਤੇ ਟਿਕੀ ਹੋਈ ਹੈ।
