ਕੈਨੇਡਾ ’ਚ ਮਹਿੰਗਾਈ ਦਰ ਵਧ ਕੇ 3.1% ਹੋਈ, ਪੈਟਰੋਲ-ਡੀਜ਼ਲ ਦੀਆਂ ਕੀਮਤਾਂ ਨੇ ਪਾਇਆ ਅਸਰ

ਕੈਨੇਡਾ ਦੀ ਸਾਲਾਨਾ ਮਹਿੰਗਾਈ ਦਰ ਸਤੰਬਰ ਵਿਚ ਵੱਧ ਕੇ 3.1 ਫੀਸਦੀ ਹੋ ਗਈ ਹੈ, ਜਿਸ ਨਾਲ ਇਹ ਬੈਂਕ ਔਫ ਕੈਨੇਡਾ ਦੇ ਟੀਚੇ ਤਿੰਨ ਫੀਸਦੀ ਦੀ ਉੱਪਰਲੀ ਸੀਮਾ ਤੋਂ ਥੋੜ੍ਹੀ ਉੱਪਰ ਚਲੀ ਗਈ ਹੈ। ਅਗਸਤ ਵਿਚ ਇਹ ਤਿੰਨ ਫੀਸਦੀ 'ਤੇ ਹੀ ਸਥਿਰ ਰਹੀ ਸੀ। ਸੋਮਵਾਰ ਨੂੰ ਸਟੈਟਿਸਟਿਕਸ ਵਿਭਾਗ ਵਲੋਂ ਜਾਰੀ ਰਿਪੋਰਟ ਮੁਤਾਬਕ, ਪੈਟਰੋਲ ਅਤੇ ਡੀਜ਼ਲ ਦੀਆਂ ਵਧੀਆਂ ਕੀਮਤਾਂ ਨੇ ਪਿਛਲੇ ਮਹੀਨੇ ਮਹਿੰਗਾਈ ਦਰ ਨੂੰ ਵਧਾਉਣ ਵਿਚ ਪ੍ਰਮੁੱਖ ਯੋਗਦਾਨ ​ਪਾਇਆ।

ਇਸ ਦੌਰਾਨ ਭੋਜਨ ਦੀਆਂ ਕੀਮਤਾਂ ਵਿਚ ਵੀ ਵਾਧਾ ਹੋਇਆ ਪਰ ਇਹ ਵਾਧਾ ਇਸ ਤੋਂ ਪਿਛਲੇ ਮਹੀਨੇ ਦੇ ਮੁਕਾਬਲੇ ਘੱਟ ਰਿਹਾ। ਸਟੈਟਿਸਟਿਕਸ ਕੈਨੇਡਾ ਮੁਤਾਬਕ, ਸਤੰਬਰ ਵਿਚ ਗ੍ਰੋਸਰੀ ਕੀਮਤਾਂ ਵਿਚ ਸਾਲ ਪਹਿਲਾਂ ਦੇ ਮੁਕਾਬਲੇ 1.7 ਫੀਸਦੀ ਦਾ ਵਾਧਾ ਦੇਖਣ ਨੂੰ ਮਿਲਿਆ, ਜੋ ਅਗਸਤ ਵਿਚ 2.8 ਫੀਸਦੀ ਸੀ।

ਇਹ ਮਈ 2024 ਤੋਂ ਬਾਅਦ ਸਭ ਤੋਂ ਸਲੌ ਸਾਲਾਨਾ ਵਾਧਾ ਹੈ ਅਤੇ ਨਾਲ ਹੀ ਇਹ ਲਗਾਤਾਰ ਦੂਜਾ ਮਹੀਨਾ ਹੈ ਜਦੋਂ ਗ੍ਰੋਸਰੀ ਕੀਮਤਾਂ ਵਿਚ ਵਾਧਾ ਓਵਰਆਲ ਮਹਿੰਗਾਈ ਦਰ ਨਾਲੋਂ ਹੇਠਾਂ ਰਿਹਾ। ਗੌਰਤਲਬ ਹੈ ਕਿ ਸਤੰਬਰ ਦੀ ਇਹ ਮਹਿੰਗਾਈ ਰਿਪੋਰਟ ਇਸ ਮਹੀਨੇ ਦੇ ਅੰਤ ਵਿਚ ਸੈਂਟਰਲ ਬੈਂਕ ਦੇ ਵਿਆਜ ਦਰਾਂ ਬਾਰੇ ਫੈਸਲੇ ਤੋਂ ਪਹਿਲਾਂ ਆਖਰੀ ਮਹੱਤਵਪੂਰਨ ਡੇਟਾ ਹੈ।