ਨਵੰਬਰ ਵਿੱਚ ਕੈਨੇਡਾ ਦੀ ਮਹਿੰਗਾਈ ਦਰ ਰਹੀ ਸਥਿਰ , ਗ੍ਰੋਸਰੀ ਦੀਆਂ ਕੀਮਤਾਂ ਵਿੱਚ ਵਾਧਾ

ਕੈਨੇਡਾ ਦੀ ਮਹਿੰਗਾਈ ਦਰ ਇੱਕ ਵਾਰ ਫਿਰ ਅਰਥਸ਼ਾਸਤਰੀ ਦੀਆਂ ਉਮੀਦਾਂ ਤੋਂ ਖਰੀ ਉਤਰੀ ਹੈ। ਸਟੈਟਿਸਟਿਕਸ ਕੈਨੇਡਾ ਮੁਤਾਬਕ, ਨਵੰਬਰ ਵਿਚ ਸਾਲਾਨਾ ਮਹਿੰਗਾਈ ਦਰ 2.2 ਫੀਸਦੀ ਵਧਿਆ ਹੈ, ਜੋ ਕਿ ਅਕਤੂਬਰ ਵਿਚ ਦੇਖੀ ਗਈ ਦਰ ਦੇ ਹੀ ਬਰਾਬਰ ਹੈ। ਅਰਥਸ਼ਾਸਤਰੀ ਇਸ ਦੇ 2.3 ਫੀਸਦੀ ਵਧਣ ਦੀ ਉਮੀਦ ਜਤਾ ਰਹੇ ਸਨ।

ਏਜੰਸੀ ਦਾ ਕਹਿਣਾ ਹੈ ਕਿ ਪੈਟਰੋਲ ਦੀ ਵਿਕਰੀ 'ਤੇ ਕਾਰਬਨ ਲੇਵੀ ਹਟਾਏ ਜਾਣ ਨਾਲ ਅਪ੍ਰੈਲ ਤੋਂ ਹੀ ਸਾਲ-ਦਰ-ਸਾਲ ਦੇ ਆਧਾਰ 'ਤੇ ਬਾਲਣ ਦੀ ਕੀਮਤ ਘੱਟ ਬਣੀ ਹੋਈ ਹੈ, ਜਿਸ ਨਾਲ ਕੁੱਲ ਮਹਿੰਗਾਈ ਦਰ ਘੱਟ ਰੱਖਣ ਵਿਚ ਮਦਦ ਮਿਲੀ ਹੈ। ਸਟੈਟਕੈਨ ਮੁਤਾਬਕ, ਪੈਟਰੋਲ ਕੀਮਤਾਂ ਦੇ ਪ੍ਰਭਾਵ ਨੂੰ ਕੱਢ ਦਿੱਤਾ ਜਾਵੇ ਤਾਂ ਪਿਛਲੇ ਮਹੀਨੇ ਮਹਿੰਗਾਈ ਦਰ ਵਿਚ 2.6 ਫੀਸਦੀ ਦਾ ਵਾਧਾ ਹੋਇਆ ਹੈ।

ਉਥੇ ਹੀ, ਦੂਜੇ ਪਾਸੇ, ਕਰਿਆਨੇ ਦੀਆਂ ਕੀਮਤਾਂ ਵਿਚ ਵਾਧਾ ਜਾਰੀ ਹੈ। ਨਵੰਬਰ ਵਿਚ ਸਾਲਾਨਾ ਆਧਾਰ 'ਤੇ ਫੂਡ ਇਨਫਲੇਸ਼ਨ ਵਿਚ 4.7 ਫੀਸਦੀ ਦਾ ਵਾਧਾ ਹੋਇਆ ਹੈ, ਜਦੋਂ ਕਿ ਅਕਤੂਬਰ ਵਿਚ ਇਹ 3.4 ਫੀਸਦੀ ਸੀ। ਸਟੈਟਕੈਨ ਨੇ ਕਿਹਾ ਕਿ ਆਖਰੀ ਵਾਰ ਗ੍ਰੋਸਰੀ ਕੀਮਤਾਂ ਦਸੰਬਰ 2023 ਵਿਚ ਇੰਨੀਆਂ ਉੱਚੀਆਂ ਸਨ। ਹਾਲਾਂਕਿ, ਟੈਰਿਫਸ ਲਗਾਏ ਜਾਣ ਤੋਂ ਬਾਅਦ ਇਹ ਪਹਿਲਾ ਮਹੀਨਾ ਹੈ ਜਦੋਂ ਕੋਰ ਮਹਿੰਗਾਈ ਦਰ 3 ਫੀਸਦੀ ਤੋਂ ਹੇਠਾਂ ਹੈ।