ਸਤੰਬਰ ਵਿੱਚ ਮਹਿੰਗਾਈ ਦਰ 2.4 ਫੀਸਦੀ ਵਧੀ

ਕੈਨੇਡਾ ਦੇ ਸੈਂਟਰਲ ਬੈਂਕ ਵਲੋਂ ਅਗਲੇ ਹਫ਼ਤੇ ਵਿਆਜ ਦਰਾਂ ਬਾਰੇ ਫੈਸਲਾ ਲੈਣ ਤੋਂ ਪਹਿਲਾਂ ਦੇਸ਼ ਦੀ ਸਾਲਾਨਾ ਮਹਿੰਗਾਈ ਦਰ ਸਤੰਬਰ ਵਿਚ ਵੱਧ ਕੇ 2.4 ਫੀਸਦੀ 'ਤੇ ਪਹੁੰਚ ਗਈ ਹੈ। ਸਟੈਟਿਸਟਿਕਸ ਕੈਨੇਡਾ ਮੁਤਾਬਕ,ਅਗਸਤ ਵਿਚ ਇਹ 1.9 ਫੀਸਦੀ ਸੀ। ਇਹ ਅਰਥਸ਼ਾਸਤਰੀ ਦੀਆਂ ਉਮੀਦਾਂ ਤੋਂ ਵੀ ਉੱਪਰ ਰਹੀ, ਅਰਥਸ਼ਾਸਤਰੀ ਪਿਛਲੇ ਮਹੀਨੇ ਦੀ ਮਹਿੰਗਾਈ ਦਰ ਵਿਚ 2.2 ਫੀਸਦੀ ਵਾਧੇ ਦੀ ਉਮੀਦ ਕਰ ਰਹੇ ਸਨ।

ਕੰਜ਼ਊਮਰ ਪ੍ਰਾਈਜ਼ ਇੰਡੈਕਸ ਵਿਚ ਇਸ ਵਾਧੇ ਨੇ ਬੈਂਕ ਔਫ ਕੈਨੇਡਾ ਵਲੋਂ 29 ਅਕਤੂਬਰ ਨੂੰ ਪੌਲਿਸੀ ਰੇਟ ਵਿਚ ਕਟੌਤੀ ਦੀ ਉਮੀਦ ਨੂੰ ਮੱਧਮ ਕਰ ਦਿੱਤਾ ਹੈ। ਸਟੈਟਿਸਟਿਕਸ ਕੈਨੇਡਾ ਨੇ ਕਿਹਾ ਕਿ ਮੁਦਰਾਸਫੀਤੀ ਵਿਚ ਵਾਧਾ ਮੁੱਖ ਤੌਰ 'ਤੇ ਗ੍ਰੋਸਰੀ ਦੀ ਮਹਿੰਗਾਈ ਕਾਰਨ ਹੋਇਆ ਹੈ,ਜੋ ਪਿਛਲੇ ਸਾਲ ਦੀ ਇਸੇ ਮਿਆਦ ਦੇ ਮੁਕਾਬਲੇ 4 ਫੀਸਦੀ ਵਧੀ ਹੈ। ਰਿਪੋਰਟ ਵਿਚ ਕਿਹਾ ਗਿਆ ਹੈ ਕਿ ਫਰੈਸ਼ ਅਤੇ ਫਰੋਜ਼ਨ ਬੀਫ ਤੇ ਕੌਫੀ ਨੇ ਕਰਿਆਨੇ ਦੀ ਮਹਿੰਗਾਈ ਵਿਚ ਯੋਗਦਾਨ ਪਾਇਆ ਹੈ।