13.27C Vancouver 13.27C VancouverFeb 7, 2024 2:58 PM - The Connect News
ਕੈਨੇਡਾ ਦੀ ਮੁੱਖ ਵਿਰੋਧੀ ਪਾਰਟੀ ਨੇ ਪ੍ਰਧਾਨ ਮੰਤਰੀ ਤੋਂ ਅਸਤੀਫ਼ੇ ਦੀ ਮੰਗ ਕੀਤੀ ਹੈ। ਕੰਜ਼ਰਵੇਟਿਵ ਲੀਡਰ ਪੀਅਰੇ ਪੋਲੀਵਰੇ ਦਾ ਕਹਿਣਾ ਹੈ ਕਿ ਇਹ ਗੱਲ ਸਾਹਮਣੇ ਆ ਚੁੱਕੀ ਹੈ ਕਿ ਯੂਕਰੇਨ ਦੇ ਰਾਸ਼ਟਰਪਤੀ ਦੇ ਕੈਨੇਡਾ ਦੌਰੇ ਦੌਰਾਨ ਹਿਟਲਰ ਦੀ ਫੌਜ ਦੇ ਸਾਬਕਾ ਸੈਨਿਕ ਨੂੰ ਟਰੂਡੋ ਵਲੋਂ ਨਿੱਜੀ ਸੱਦਾ ਭੇਜਿਆ ਗਿਆ ਸੀ।
ਪੋਲੀਵਰੇ ਨੇ ਕਿਹਾ ਕਿ ਟਰੂਡੋ ਨੇ ਪਿਛਲੇ ਸਾਲ ਸਤੰਬਰ ਵਿਚ ਹਾਊਸ ਆਫ ਕਾਮਨਜ਼ ਨੂੰ ਗੁੰਮਰਾਹ ਕੀਤਾ ਕਿ ਉਨ੍ਹਾਂ ਨੂੰ ਸਾਬਕਾ ਨਾਜ਼ੀ ਸੈਨਿਕ ਯਾਰੋਸਲਾਵ ਹੰਕਾ ਬਾਰੇ ਕੋਈ ਜਾਣਕਾਰੀ ਨਹੀਂ ਸੀ, ਜਦੋਂ ਕਿ ਟੋਰਾਂਟੋ ਵਿਚ ਜ਼ੇਲੇਨਸਕੀ ਲਈ ਰੱਖੀ ਗਈ ਰਿਸਪੈਸ਼ਨ ਵਿਚ ਹੰਕਾ ਟਰੂਡੋ ਵਲੋਂ ਨਿੱਜੀ ਤੌਰ ’ਤੇ ਸੱਦਿਆ ਸੀ।
ਕੰਜ਼ਰਵੇਟਿਵ ਲੀਡਰ ਨੇ ਕਿਹਾ ਕਿ ਟਰੂਡੋ ਨੇ ਇਸੇ ਮਾਮਲੇ ਵਿਚ ਸਾਬਕਾ ਸਪੀਕਰ ਐਂਥਨੀ ਰੋਟਾ ਦੇ ਅਸਤੀਫਾ ਦਾ ਸਮਰਥਨ ਕੀਤਾ ਸੀ, ਹੁਣ ਟਰੂਡੋ ਨੂੰ ਖੁਦ ਵੀ ਇਹ ਕਬੂਲ ਕਰਨਾ ਚਾਹੀਦਾ ਹੈ ਕਿ ਉਹ ਅਹੁਦੇ ਲਈ ਯੋਗ ਨਹੀਂ ਹਨ।
ਕੰਜ਼ਰਵੇਟਿਵ ਦੀ ਡਿਪਟੀ ਲੀਡਰ ਮੇਲਿਸਾ ਲੈਂਟਸਮੈਨ ਨੇ ਵੀ ਟਰੂਡੋ ’ਤੇ ਹਮਲਾ ਬੋਲਿਆ, ਉਨ੍ਹਾਂ ਕਿਹਾ ਕਿ ਟਰੂਡੋ ਕਈ ਮਹੀਨਿਆਂ ਤੋਂ ਸੱਚ ਲੁਕਾਉਂਦੇ ਰਹੇ, ਜਦੋਂ ਕਿ ਸੱਦੇ ’ਤੇ ਪ੍ਰਧਾਨ ਮੰਤਰੀ ਦਾ ਨਾਮ ਸੀ ਅਤੇ ਦੋਸ਼ ਸਿਰਫ ਸਪੀਕਰ ’ਤੇ ਲਗਾਉਂਦੇ ਰਹੇ।
ਗੌਰਤਲਬ ਹੈ ਕਿ ਸਾਬਕਾ ਸਪੀਕਰ ਰੋਟਾ ਨੇ ਦੂਜੇ ਵਿਸ਼ਵ ਯੁੱਧ ਦੌਰਾਨ ਨਾਜ਼ੀਆਂ ਵਲੋਂ ਲੜੇ 98 ਸਾਲਾ ਯਾਰੋਸਲਾਵ ਹੰਕਾ ਨੂੰ ਵਾਰ ਹੀਰੋ ਦੱਸਿਆ ਸੀ, ਜਿਸ ਲਈ ਹਾਊਸ ਮੈਂਬਰਸ ਨੇ ਦੋ ਵਾਰ ਖੜ੍ਹੇ ਹੋ ਕੇ ਉਸ ਦਾ ਸਨਮਾਨ ਕੀਤਾ। ਵਿਵਾਦ ਹੋਣ ’ਤੇ ਸਪੀਕਰ ਨੇ ਮਾਫੀ ਮੰਗਦੇ ਹੋਏ ਅਸਤੀਫਾ ਦੇ ਦਿੱਤਾ ਸੀ। ਦੱਸ ਦੇਈਏ ਕਿ ਨਾਜ਼ੀ ਫ਼ੌਜ ਨੇ ਯਹੂਦੀਆਂ ਦਾ ਕਤਲੇਆਮ ਕੀਤਾ ਸੀ।
