ਕੈਨੇਡਾ ਦੀ ਮਾਰਕ ਕਾਰਨੀ ਸਰਕਾਰ ਨੇ ਆਪਣੇ ਪਹਿਲੇ ਫੈਡਰਲ ਬਜਟ ਲਈ ਤਿਆਰੀ ਕੀਤੀ ਸ਼ੁਰੂ

ਕੈਨੇਡਾ ਦੀ ਮਾਰਕ ਕਾਰਨੀ ਸਰਕਾਰ ਨੇ ਆਪਣੇ ਪਹਿਲੇ ਫੈਡਰਲ ਬਜਟ ਲਈ ਤਿਆਰੀ ਸ਼ੁਰੂ ਕਰ ਦਿੱਤੀ ਹੈ, ਇਹ fall ਵਿਚ ਪੇਸ਼ ਕੀਤਾ ਜਾਵੇਗਾ। ਸਰਕਾਰ ਨੇ ਕਿਹਾ ਕਿ ਬਜਟ 2025 ਪ੍ਰਾਈਵੇਟ ਨਿਵੇਸ਼ ਨੂੰ ਬੂਸਟ ਦੇਣ ਅਤੇ ਜੀ 7 ਵਿਚ ਸਭ ਤੋਂ ਮਜ਼ਬੂਤ ਅਰਥਵਿਵਸਥਾ ਬਣਾਉਣ 'ਤੇ ਕੇਂਦਰਿਤ ਹੋਵੇਗਾ।

ਵਿੱਤ ਮੰਤਰੀ ਫ੍ਰਾਂਸਵਾ-ਫਿਲਿਪ ਸ਼ੈਂਪੇਨ ਨੇ ਪ੍ਰੀ-ਬਜਟ ਸਲਾਹ-ਮਸ਼ਵਰੇ ਅੱਜ ਤੋਂ ਸ਼ੁਰੂ ਕੀਤੇ ਹਨ। ਫੈਡਰਲ ਸਰਕਾਰ ਨੇ ਕਿਹਾ ਕਿ 28 ਅਗਸਤ 2025 ਤੱਕ ਕੈਨੇਡੀਅਨ ਵੀ Canada.ca/YourBudget ਵੈੱਬਸਾਈਟ 'ਤੇ ਜਾ ਕੇ ਮੁੱਖ ਮੁੱਦਿਆਂ 'ਤੇ ਆਪਣੇ ਵਿਚਾਰ ਸਾਂਝੇ ਕਰਕੇ ਇਸ ਵਿਚ ਹਿੱਸਾ ਲੈ ਸਕਦੇ ਹਨ।

ਬਜਟ ਵਿਚ ਸਰਕਾਰ ਦਾ ਮੁੱਖ ਤੌਰ 'ਤੇ ਫੋਕਸ $1 ਮਿਲੀਅਨ ਤੱਕ ਦੇ ਨਵੇਂ ਘਰਾਂ ਲਈ ਜੀਐਸਟੀ ਹਟਾਉਣਾ ਅਤੇ ਮਿਡਲ ਕਲਾਸ ਨੂੰ ਰਾਹਤ ਦੇਣਾ ਹੋਵੇਗਾ। ਬਜਟ ਵਿਚ ਰਾਸ਼ਟਰ-ਨਿਰਮਾਣ ਪ੍ਰਾਜੈਕਟ ਦਾ ਵੀ ਖੁਲਾਸਾ ਕੀਤਾ ਜਾਵੇਗਾ। ਆਉਣ ਵਾਲੇ ਹਫ਼ਤਿਆਂ ਵਿਚ ਵਿੱਤ ਮੰਤਰੀ, ਰਾਜ ਸਕੱਤਰ ਵੇਨ ਲੌਂਗ ਅਤੇ ਸੰਸਦੀ ਸਕੱਤਰ ਰਿਆਨ ਟਰਨਬੁੱਲ ਦੇ ਨਾਲ ਪ੍ਰੀ-ਬਜਟ ਸਲਾਹ ਮਸ਼ਵਰੇ ਲਈ ਦੇਸ਼ ਭਰ ਦੇ ਕਾਰੋਬਾਰੀਆਂ ਤੇ ਸਰਕਾਰਾਂ ਦੇ ਨੁਮਾਇੰਦਿਆਂ ਨਾਲ ਵੀ ਮੁਲਾਕਾਤ ਕਰਨਗੇ।