ਮੈਕਸੀਕੋ ਵਿੱਚ ਹਿੰਸਾ ਦੇ ਬਾਅਦ ਕੈਨੇਡੀਅਨ ਏਅਰਲਾਈਨਾਂ ਵੱਲੋਂ ਪਿਊਰਟੋ ਵੈਲਾਰਟਾ ਲਈ ਉਡਾਣਾਂ ਮੁੜ ਸ਼ੁਰੂ

ਕੈਨੇਡੀਅਨ ਏਅਰਲਾਈਨ ਏਅਰ ਕੈਨੇਡਾ, ਵੈਸਟ ਜੈਟ, ਏਅਰ ਟਰਾਂਸੈਟ ਅਤੇ ਪੋਰਟਰ ਏਅਰਲਾਈਨ ਨੇ ਅੱਜ ਤੋਂ ਮੈਕਸੀਕੋ ਦੇ ਪਿਊਰਟੋ ਵੈਲਾਰਟਾ ਲਈ ਆਪਣੀਆਂ ਉਡਾਣਾਂ ਦੁਬਾਰਾ ਸ਼ੁਰੂ ਕਰ ਦਿੱਤੀਆਂ ਹਨ। ਇਸ ਤੋਂ ਇਲਾਵਾ ਵੈਸਟ ਜੈਟ ਨੇ ਗੁਆਡਾਲਾਹਾਰਾ ਅਤੇ ਮੈਨਜ਼ਾਨੀਲੋ ਲਈ ਵੀ ਉਡਾਣਾਂ ਬਹਾਲ ਕਰਨ ਦੀ ਪੁਸ਼ਟੀ ਕੀਤੀ ਹੈ।

ਮੈਕਸੀਕੋ ਦੇ ਇੱਕ ਡਰੱਗ ਸਰਗਨਾ ਦੀ ਮੌਤ ਤੋਂ ਬਾਅਦ ਐਤਵਾਰ ਨੂੰ ਕਈ ਜਗ੍ਹਾ ਹਿੰਸਾ ਭੜਕ ਗਈ ਸੀ, ਜਿਸ ਕਾਰਨ ਹਜ਼ਾਰਾਂ ਕੈਨੇਡੀਅਨ ਯਾਤਰੀ ਉੱਥੇ ਫਸ ਗਏ ਸਨ। ਕਈ ਹਿੱਸਿਆਂ ਵਿਚ ਗੋਲੀਬਾਰੀ ਅਤੇ ਅੱਗਜ਼ਨੀ ਦੀਆਂ ਘਟਨਾਵਾਂ ਵੀ ਵਾਪਰੀਆਂ, ਜਿਸ ਕਾਰਨ ਸੈਲਾਨੀਆਂ ਨੂੰ ਹੋਟਲਾਂ ਦੇ ਅੰਦਰ ਹੀ ਰਹਿਣ ਦੀ ਹਦਾਇਤ ਦਿੱਤੀ ਗਈ ਸੀ।

ਗਲੋਬਲ ਅਫੇਅਰਜ਼ ਕੈਨੇਡਾ ਮੁਤਾਬਕ, ਸੋਮਵਾਰ ਤੋਂ ਕੋਈ ਨਵੀਂ ਹਿੰਸਕ ਘਟਨਾ ਸਾਹਮਣੇ ਨਹੀਂ ਆਈ ਹੈ ਪਰ ਕੈਨੇਡੀਅਨਸ ਨੂੰ ਅਜੇ ਵੀ ਬਹੁਤ ਜ਼ਿਆਦਾ ਸਾਵਧਾਨੀ ਵਰਤਣ ਦੀ ਸਲਾਹ ਹੈ ਕਿਉਂਕਿ ਆਉਣ ਵਾਲੇ ਦਿਨਾਂ ਵਿਚ ਮੁੜ ਹਿੰਸਾ ਭੜਕਣ ਦਾ ਖ਼ਤਰਾ ਬਣਿਆ ਹੋਇਆ ਹੈ। ਏਅਰਲਾਈਨ ਨੇ ਕਿਹਾ ਹੈ ਕਿ ਹਵਾਈ ਅੱਡੇ ਜਾਣ ਤੋਂ ਪਹਿਲਾਂ ਮੁਸਾਫਰਾਂ ਨੂੰ ਆਪਣੀ ਫਲਾਈਟ ਦਾ ਸਟੇਟਸ ਔਨਲਾਈਨ ਜ਼ਰੂਰ ਚੈੱਕ ਕਰਨਾ ਚਾਹੀਦਾ ਹੈ ਕਿਉਂਕਿ ਕੁਝ ਫਲਾਈਟਾਂ ਦੇ ਸਮੇਂ ਵਿਚ ਬਦਲਾਅ ਹੋ ਸਕਦਾ ਹੈ।