ਕਿਊਬਾ ਵਿੱਚ ਤੇਲ ਸੰਕਟ ਦੌਰਾਨ ਕੈਨੇਡੀਅਨ ਉਡਾਣਾਂ ਸਫਲਤਾਪੂਰਵਕ ਮੁਕੰਮਲ

ਕੈਨੇਡਾ ਦੀ ਵਿਦੇਸ਼ ਮੰਤਰੀ ਅਨੀਤਾ ਅਨੰਦ ਨੇ ਪੁਸ਼ਟੀ ਕੀਤੀ ਹੈ ਕਿ ਕਿਊਬਾ ਵਿਚ ਚੱਲ ਰਹੇ ਗੰਭੀਰ ਤੇਲ ਸੰਕਟ ਕਾਰਨ ਕੈਨੇਡੀਅਨ ਏਅਰਲਾਈਨਜ਼ ਦੀਆਂ ਅੰਤਿਮ ਉਡਾਣਾਂ ਕੱਲ੍ਹ ਸਫਲਤਾਪੂਰਵਕ ਮੁਕੰਮਲ ਹੋ ਗਈਆਂ ਹਨ। ਇਸ ਓਪ੍ਰੇਸ਼ਨ ਰਾਹੀਂ ਲਗਭਗ 27,900 ਕੈਨੇਡੀਅਨਜ਼ ਨੂੰ ਸੁਰੱਖਿਅਤ ਵਾਪਸ ਲਿਆਂਦਾ ਗਿਆ ਹੈ।

ਇਸ ਦੇ ਨਾਲ ਹੀ ਏਅਰ ਕੈਨੇਡਾ,ਵੈਸਟ ਜੈਟ, ਏਅਰ ਟ੍ਰਾਂਸੈਟ ਨੇ ਹੁਣ ਅਧਿਕਾਰਤ ਤੌਰ 'ਤੇ ਕਿਊਬਾ ਲਈ ਆਪਣੀਆਂ ਸੇਵਾਵਾਂ ਬੰਦ ਕਰ ਦਿੱਤੀਆਂ ਹਨ। ਕਿਊਬਾ ਵਿਚ ਏਵੀਏਸ਼ਨ ਫਿਊਲ ਦੀ ਭਾਰੀ ਕਿੱਲਤ ਹੈ, ਜਿਸ ਕਾਰਨ ਅੰਤਰਰਾਸ਼ਟਰੀ ਉਡਾਣਾਂ ਲਈ ਰਿਫਿਊਲਿੰਗ ਅਸੰਭਵ ਹੋਈ ਹੈ।

ਮੰਤਰੀ ਨੇ ਅਨੰਦ ਏਅਰਲਾਈਨ ਕਰਮਚਾਰੀਆਂ ਦਾ ਧੰਨਵਾਦ ਕਰਦਿਆਂ ਕਿਹਾ ਕਿ ਜਿਹੜੇ ਕੈਨੇਡੀਅਨ ਅਜੇ ਵੀ ਕਿਊਬਾ ਵਿਚ ਹਨ, ਉਹ ਹੋਰ ਅੰਤਰਰਾਸ਼ਟਰੀ ਏਅਰਲਾਈਨਾਂ ਦੇ ਉਪਲਬਧ ਹੁੰਦੇ ਹੋਏ ਤੁਰੰਤ ਦੇਸ਼ ਛੱਡਣ ਬਾਰੇ ਵਿਚਾਰ ਕਰਨ।

ਗੌਰਤਲਬ ਹੈ ਕਿ ਕੈਨੇਡਾ ਸਰਕਾਰ ਨੇ ਕਿਊਬਾ ਲਈ "Avoid non-essential travel" ਐਡਵਾਈਜ਼ਰੀ ਜਾਰੀ ਕੀਤੀ ਹੋਈ ਹੈ ਕਿਉਂਕਿ ਉਥੇ ਬਿਜਲੀ ਪਾਣੀ, ਖਾਣ-ਪੀਣ ਅਤੇ ਦਵਾਈਆਂ ਦੀ ਵੀ ਭਾਰੀ ਕਮੀ ਦੇਖੀ ਜਾ ਰਹੀ ਹੈ। ਸਰਕਾਰ ਨੇ ਐਡਵਾਈਜ਼ਰੀ ਵਿਚ ਸਪੱਸ਼ਟ ਕਿਹਾ ਹੈ ਕਿ ਕੈਨੇਡਾ ਦੀਆਂ ਸਾਰੀਆਂ ਪ੍ਰਮੁੱਖ ਏਅਰਲਾਈਨਸ ਨੇ ਕਿਊਬਾ ਲਈ ਆਪਣੀਆਂ ਸੇਵਾਵਾਂ ਅਗਲੇ ਹੁਕਮਾਂ ਤੱਕ ਮੁਅੱਤਲ ਕਰ ਦਿੱਤੀਆਂ ਹਨ।