ਕੈਨੇਡਾ ਦੇ ਇੱਕ ਸੈਲਾਨੀ ਦੀ ਡੋਮਿਨਿੱਕ ਰਿਪਬਲਿਕ ਵਿਚ ਮੌਤ

ਕੈਨੇਡਾ ਦੇ ਇੱਕ ਸੈਲਾਨੀ ਦੀ ਡੋਮਿਨਿੱਕ ਰਿਪਬਲਿਕ ਵਿਚ ਮੌਤ ਹੋਣ ਦੀ ਖ਼ਬਰ ਸਾਹਮਣੇ ਆਈ ਹੈ, ਜਿਸ ਦੀ ਪੁਸ਼ਟੀ ਉਥੋਂ ਦੀ ਸਿਵਲ ਡਿਫੈਂਸ ਏਜੰਸੀ ਨੇ ਕੀਤੀ ਹੈ। ਰਿਪੋਰਟਸ ਮੁਤਾਬਕ, ਕੈਨੇਡੀਅਨ ਟੂਰਿਸਟ 33 ਸਾਲ ਦਾ ਸੀ, ਜਿਸ ਦੀ ਪਛਾਣ ਡੋਰੀਅਨ ਕ੍ਰਿਸਚਨ ਮੈਕਡੋਨਲਡ ਵਜੋਂ ਸਾਹਮਣੇ ਆਈ, ਉਹ ਆਈਲੈਂਡ ਦੇ ਉੱਤਰੀ ਤੱਟ ਵਿਚ ਪੈਂਦੇ ਪਿਊਰਟੋ ਪਲਾਟਾ ਵਿਚ ਇੱਕ ਹੋਟਲ ਦੇ ਕਮਰੇ ਵਿਚ ਇਕੱਲਾ ਰਹਿ ਰਿਹਾ ਸੀ।

ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਉਹ ਸ਼ੁੱਕਰਵਾਰ ਯਾਨੀ 20 ਜੂਨ ਨੂੰ ਸਥਾਨਕ ਸਮੇਂ ਅਨੁਸਾਰ, ਵੱਡੇ ਤੜਕੇ 2 ਵਜੇ ਉਹ ਬੀਚ 'ਤੇ ਘੁੰਮ ਰਿਹਾ ਸੀ। ਲਗਭਗ ਇੱਕ ਘੰਟੇ ਬਾਅਦ ਪੁਲਿਸ ਨੂੰ ਇੱਕ ਵਿਅਕਤੀ ਦੇ ਬੀਚ 'ਤੇ ਲਾਪਤਾ ਹੋਣ ਦੀ ਸੂਚਨਾ ਦਿੱਤੀ ਗਈ।

ਸਿਵਲ ਡਿਫੈਂਸ ਅਤੇ ਪੁਲਿਸ ਕਰਮਚਾਰੀ ਬੀਚ 'ਤੇ ਪਹੁੰਚੇ ਅਤੇ ਉਸ ਦਿਨ ਸਵੇਰੇ 4:15 ਵਜੇ ਤੇਜ਼ ਲਹਿਰਾਂ ਦੌਰਾਨ ਉਸ ਦੀ ਲਾਸ਼ ਪਾਣੀ ਵਿਚ ਮਿਲੀ।

ਗਲੋਬਲ ਅਫੇਅਰਜ਼ ਕੈਨੇਡਾ ਨੇ ਕਿਹਾ ਕਿ ਉਹ ਲੋਕਲ ਅਧਿਕਾਰੀਆਂ ਦੇ ਸੰਪਰਕ ਵਿਚ ਹੈ ਅਤੇ ਪਰਿਵਾਰ ਨੂੰ ਕੌਂਸਲਰ ਸਹਾਇਤਾ ਪ੍ਰਦਾਨ ਕੀਤੀ ਜਾ ਰਹੀ ਹੈ। ਕੈਨੇਡਾ ਵਿਚ ਉਹ ਕਿੱਥੋਂ ਦਾ ਰਹਿਣ ਵਾਲਾ ਸੀ ਇਸ ਬਾਰੇ ਫਿਲਹਾਲ ਜਾਣਕਾਰੀ ਸਾਂਝੀ ਨਹੀਂ ਕੀਤੀ ਗਈ।