21.02C Vancouver 21.02C VancouverJul 20, 2020 3:41 PM -
ਜਨਵਰੀ ਵਿੱਚ ਇਰਾਨ ਦੀਆਂ ਮਿਸਾਈਲਾਂ ਕਾਰਨ ਹਾਦਸਾ ਗ੍ਰਸਤ ਹੋਏ ਯੂਕ੍ਰੇਨੀਅਨ ਜਹਾਜ਼ ਦੀ ਜਾਂਚ ਦੇ ਮਾਮਲੇ ਵਿੱਚ ਫਲਾਈਟ ਰਿਕਾਰਡਰਾਂ ਤੋਂ ਡਾਟਾ ਡਾਊਨਲੋਡ ਕਰਨ ਦੀ ਪ੍ਰਕਿਰਿਆ ਵਿੱਚ ਹਿੱਸਾ ਲੈਣ ਲਈ ਕਨੇਡੀਅਨ ਜਾਂਚਕਰਤਾ ਪੈਰਿਸ ਪਹੁੰਚ ਗਏ ਹਨ।
ਕੈਨੇਡਾ ਦੇ ਟਰਾਂਸਪੋਰਟੇਸ਼ਨ ਸੇਫਟੀ ਬੋਰਡ ਵੱਲੋਂ ਇਸ ਗੱਲ ਦੀ ਪੁਸ਼ਟੀ ਕੀਤੀ ਗਈ ਕਿ ਤਕਰੀਬਨ ਚਾਰ ਮਹੀਨੇ ਦੀ ਉਡੀਕ ਤੋਂ ਬਾਅਦ ਜਹਾਜ਼ ਦੇ ਬਲੈਕ ਬਾਕਸ ਆਖਿਰਕਾਰ ਪੈਰਿਸ ਪਹੁੰਚ ਗਏ ਹਨ।
ਇਕ ਇਰਾਨੀ ਨਿਊਜ਼ ਏਜੰਸੀ ਦੀ ਰਿਪੋਰਟ ਅਨੁਸਾਰ ਬਲੈਕ ਬਾਕਸ ਸ਼ਨੀਵਾਰ ਨੂੰ ਪੈਰਿਸ ਭੇਜੇ ਗਏ ਸਨ।
ਪੀੜਤ ਪਰਿਵਾਰਾਂ ਲਈ ਅੱਜ ਦਾ ਇਹ ਕਦਮ ਬਹੁਤ ਮਹੱਤਵਪੂਰਨ ਹੈ ਜੋ ਕਿ ਕਈ ਮਹੀਨਿਆਂ ਤੋਂ ਇਨ੍ਹਾਂ ਸਵਾਲਾਂ ਦੇ ਜਵਾਬ ਲੱਭਣ ਦੀ ਕੋਸ਼ਿਸ਼ ਕਰ ਰਹੇ ਹਨ ਕਿ 8 ਜਨਵਰੀ ਨੂੰ ਤਹਿਰਾਨ ਹਵਾਈ ਅੱਡੇ ਤੋਂ ਉਡਾਣ ਭਰਨ ਤੋਂ ਕੁਝ ਸਮਾਂ ਬਾਅਦ ਹੀ ਇਰਾਨ ਦੀ ਮਿਲਟਰੀ ਨੇ ਜਹਾਜ਼ ਨੂੰ ਨਿਸ਼ਾਨਾ ਕਿਉਂ ਬਣਾਇਆ।
ਜਹਾਜ਼ ਤੇ ਸਵਾਰ ਸਾਰੇ 176 ਮੁਸਾਫ਼ਰ ਮਾਰੇ ਗਏ ਸਨ ਜਿਨਾਂ ਵਿੱਚ 55 ਕਨੇਡੀਅਨ ਸਿਟੀਜ਼ਨ, 30 ਪਰਮਾਨੈਂਟ ਰੈਜ਼ੀਡੈਂਟ ਸਨ ਅਤੇ ਦਰਜਨਾਂ ਦਾ ਸੰਬੰਧ ਕੈਨੇਡਾ ਨਾਲ ਸੀ।
ਇਰਾਨ ਨੇ ਪਹਿਲਾਂ ਹਮਲੇ ਦੀ ਜ਼ਿੰਮੇਵਾਰੀ ਲੈਣ ਤੋਂ ਇਨਕਾਰ ਕੀਤਾ ਸੀ ਪਰ ਫੇਰ ਸੋਸ਼ਲ ਮੀਡੀਆ ਉੱਤੇ ਜਹਾਜ਼ ਵਿੱਚ ਵੱਜੀ ਇਕ ਮਿਸਾਈਲ ਦੀ ਵੀਡੀਓ ਤੋਂ ਬਾਅਦ, ਈਰਾਨ ਵੱਲੋਂ ਇਹ ਗੱਲ ਸਵੀਕਾਰ ਕੀਤੀ ਗਈ।
ਅਮਰੀਕਾ ਵੱਲੋਂ ਇਰਾਨ ਦੇ ਇੱਕ ਪ੍ਰਮੁੱਖ ਜਨਰਲ ਨੂੰ ਮਾਰਨ ਤੋਂ ਬਾਅਦ ਬਦਲੇ ਵਿੱਚ ਇਰਾਨ ਵੱਲੋਂ ਇਰਾਕ ਵਿੱਚ ਅਮਰੀਕਾ ਦੇ ਦੋ ਮਿਲਟਰੀ ਬੇਸਾਂ ਤੇ ਮਿਸਾਈਲਾਂ ਚਲਾਈਆਂ ਗਈਆਂ ਸਨ।
ਪੀੜਤ ਪਰਿਵਾਰਾਂ ਵੱਲੋਂ ਇਸ ਸੰਬੰਧ ਵਿਚ ਸਵਾਲ ਚੁੱਕੇ ਗਏ ਸਨ ਕਿ ਜਹਾਜ਼ ਨੂੰ ਇਸ ਸਥਿਤੀ ਵਿੱਚ ਉੱਡਣ ਦੀ ਇਜਾਜ਼ਤ ਕਿਉਂ ਦਿੱਤੀ ਗਈ ਸੀ।
