20.06C Vancouver 20.06C VancouverNov 3, 2023 5:02 PM - The Canadian Press
ਕੈਨੇਡਾ ਦੀ ਵਿਦੇਸ਼ ਮੰਤਰੀ ਨੇ ਇਸ ਗੱਲ ਦੀ ਮੁੜ ਪੁਸ਼ਟੀ ਕੀਤੀ ਹੈ ਕਿ ਆਉਣ ਵਾਲੇ ਦਿਨਾਂ ਵਿੱਚ ਕੈਨੇਡੀਅਨਜ਼ ਅਤੇ ਉਨ੍ਹਾਂ ਦੇ ਪਰਿਵਾਰ ਗਾਜ਼ਾ ਛੱਡਣ ਦੇ ਯੋਗ ਹੋਣਗੇ।
ਮੇਲੇਨੀ ਜੋਲੀ ਨੇ ਵੀਰਵਾਰ ਦੇਰ ਰਾਤ X 'ਤੇ ਇੱਕ ਪੋਸਟ ਅਪਡੇਟ ਕਰਕੇ ਇਹ ਜਾਣਕਾਰੀ ਸਾਂਝੀ ਕੀਤੀ ਹੈ।
ਉਨ੍ਹਾਂ ਨੇ ਕਿਹਾ ਕਿ ਇਸ ਮਾਮਲੇ ਬਾਰੇ ਇਜ਼ਰਾਈਲ ਵਿੱਚ ਆਪਣੇ ਹਮਰੁਤਬਾ ਐਲੀ ਕੋਹੇਨ ਨਾਲ ਗੱਲ ਕੀਤੀ ਹੈ।
ਜੋਲੀ ਨੇ ਕਿਹਾ ਕਿ ਉਹਨਾਂ ਨੂੰ ਮਿਸਰ ਵੱਲੋਂ ਵੀ ਸਹਿਯੋਗ ਦਾ ਭਰੋਸਾ ਮਿਲਿਆ ਹੈ।
ਜ਼ਿਕਰਯੋਗ ਹੈ ਕਿ ਬੁੱਧਵਾਰ ਤੋਂ ਰਫਾਹ ਕਰਾਸਿੰਗ ਰਾਹੀਂ ਵਿਦੇਸ਼ੀ ਨਾਗਰਿਕਾਂ ਦੇ ਗਾਜ਼ਾ ਚੋਂ ਨਿਕਲਣ ਦਾ ਸਿਲਸਿਲਾ ਸ਼ੁਰੂ ਹੋਇਆ ਹੈ, ਪਰ ਇਹ ਪ੍ਰਵਾਹ ਹੌਲੀ ਰਿਹਾ ਹੈ।
ਗਲੋਬਲ ਅਫੇਅਰਜ਼ ਕੈਨੇਡਾ ਦੇ ਅਧਿਕਾਰੀਆਂ ਦਾ ਕਹਿਣਾ ਹੈ ਕਿ ਉਹ ਜੰਗੀ ਖੇਤਰ ਤੋਂ ਕੈਨੇਡੀਅਨਜ਼ ਨੂੰ ਕੱਢਣ ਲਈ ਦਿਨ ਰਾਤ ਕੰਮ ਕਰ ਰਹੇ ਹਨ।
ਵਿਭਾਗ ਨੇ ਉੱਥੇ ਮੌਜੂਦ ਕੈਨੇਡੀਅਨਜ਼ ਨੂੰ ਆਪਣੇ ਦਸਤਾਵੇਜ਼ ਤਿਆਰ ਰੱਖਣ ਲਈ ਕਿਹਾ ਹੈ ਤਾਂ ਕਿ ਜਦੋਂ ਵੀ ਕੈਨੇਡਾ ਨੂੰ ਸੂਚਿਤ ਕੀਤਾ ਜਾਵੇਗਾ ਕਿ ਲੋਕ ਸਰਹੱਦ ਪਾਰ ਕਰ ਸਕਦੇ ਹਨ ਤਾਂ ਲੋਕ ਰਵਾਨਾ ਹੋਣ ਲਈ ਤਿਆਰ ਬਰ ਤਿਆਰ ਹੋਣ।
ਜੋਲੀ ਨੇ ਕਿਹਾ ਕਿ ਗਲੋਬਲ ਅਫੇਅਰਜ਼ ਕੈਨੇਡਾ ਨਵੀਨਤਮ ਜਾਣਕਾਰੀ ਲਈ ਕੈਨੇਡੀਅਨਜ਼ ਨਾਲ ਸਿੱਧਾ ਸੰਪਰਕ ਕਰੇਗਾ।
7 ਅਕਤੂਬਰ ਨੂੰ ਹਮਾਸ ਵੱਲੋਂ ਇਜ਼ਰਾਈਲ ‘ਤੇ ਕੀਤੇ ਸ਼ੁਰੂਆਤੀ ਹਮਲੇ ਵਿੱਚ 1,400 ਲੋਕ ਮਾਰੇ ਗਏ ਸਨ। ਇਸ ਤੋਂ ਇਲਾਵਾ ਹਮਾਸ ਵੱਲੋਂ ਲਗਭਗ 240 ਬੰਧਕਾਂ ਨੂੰ ਇਜ਼ਰਾਈਲ ਤੋਂ ਗਾਜ਼ਾ ਲਿਆਂਦਾ ਗਿਆ ਸੀ।
