ਮਾਰਕ ਕਾਰਨੀ ਅਤੇ ਲੀ ਚਾਂਗ ਅਰਬਾਂ ਡਾਲਰ ਦੇ ਵਪਾਰ ਨੂੰ ਬਹਾਲ ਕਰਨ ਸਬੰਧੀ ਗੱਲਬਾਤ ਲਈ ਹੋਏ ਸਹਿਮਤ

ਕੈਨੇਡਾ ਅਤੇ ਚੀਨ ਵਿਚਕਾਰ ਅਰਬਾਂ ਡਾਲਰ ਦੇ ਵਪਾਰ ਨੂੰ ਬਹਾਲ ਕਰਨ ਦੀ ਕੋਸ਼ਿਸ਼ ਤਹਿਤ ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਅਤੇ ਉਹਨਾਂ ਦੇ ਚੀਨੀ ਹਮਰੁਤਬਾ ਲੀ ਚਾਂਗ ਗੱਲਬਾਤ ਨੂੰ ਨਿਯਮਤ ਕਰਨ ਲਈ ਸਹਿਮਤ ਹੋਏ ਹਨ।

ਪ੍ਰਧਾਨ ਮੰਤਰੀ ਕਾਰਨੀ ਨੇ ਬੀਤੀ ਸ਼ਾਮ ਚੀਨ ਦੇ ਪ੍ਰੀਮੀਅਰ ਨਾਲ ਗੱਲ ਕੀਤੀ। ਪੀ. ਐੱਮ. ਕਾਰਨੀ ਦੇ ਦਫ਼ਤਰ ਵਲੋਂ ਜਾਰੀ ਬਿਆਨ ਵਿਚ ਇਹ ਵੀ ਕਿਹਾ ਗਿਆ ਕਿ ਦੋਵਾਂ ਨੇਤਾਵਾਂ ਨੇ ਫੈਂਟਾਨਿਲ ਸੰਕਟ ਨਾਲ ਨਜਿੱਠਣ ਲਈ ਵੀ ਮਿਲ ਕੇ ਕੰਮ ਕਰਨ ਦੀ ਵਚਨਬੱਧਤਾ ਪ੍ਰਗਟਾਈ। ਪ੍ਰਧਾਨ ਮੰਤਰੀ ਬਣਨ ਤੋਂ ਬਾਅਦ ਇਹ ਮਾਰਕ ਕਾਰਨੀ ਦੀ ਚੀਨ ਦੀ ਲੀਡਰਸ਼ਿਪ ਨਾਲ ਪਹਿਲੀ ਗੱਲਬਾਤ ਹੈ।

ਦੋਵੇਂ ਮੁਲਕ ਆਪਸੀ ਵਪਾਰ ਯੁੱਧ ਦੇ ਹੱਲ ਲਈ ਉਪ-ਮੰਤਰੀ ਪੱਧਰ 'ਤੇ ਵਾਰਤਾ ਕਰਨਗੇ। ਦੱਸ ਦੇਈਏ ਕਿ ਕੈਨੇਡਾ ਅਤੇ ਚੀਨ ਵਿਚਕਾਰ ਵਪਾਰ ਟਕਰਾਅ ਉਦੋਂ ਸ਼ੁਰੂ ਹੋਇਆ ਜਦੋਂ ਔਟਵਾ ਨੇ 2024 ਵਿਚ ਬਾਈਡਨ ਪ੍ਰਸ਼ਾਸਨ ਦੇ ਨਕਸ਼ੇ ਕਦਮਾਂ 'ਤੇ ਚੱਲਦੇ ਹੋਏ ਚੀਨ ਦੀਆਂ ਬਣੀਆਂ ਇਲੈਕਟ੍ਰਿਕ ਗੱਡੀਆਂ'ਤੇ 100 ਫੀਸਦੀ ਟੈਰਿਫ ਅਤੇ ਸਟੀਲ-ਐਲੂਮੀਨੀਅਮ 'ਤੇ 25 ਫੀਸਦੀ ਟੈਰਿਫ ਲਗਾ ਦਿੱਤਾ। ਇਸ ਦੇ ਜਵਾਬ ਵਿਚ ਚੀਨ ਨੇ ਕੈਨੇਡੀਅਨ ਕੈਨੋਲਾ ਤੇਲ, ਮਟਰ ਅਤੇ ਸਮੁੰਦਰੀ ਭੋਜਨ 'ਤੇ ਬਰਾਬਰ ਦਾ ਟੈਰਿਫ ਲਗਾਇਆ ਹੋਇਆ ਹੈ।