ਪੀ.ਐਮ.ਮਾਰਕ ਕਾਰਨੀ ਨੇ ਚੀਨ ਦੇ ਰਾਸ਼ਟਰਪਤੀ ਨਾਲ ਕੀਤੀ ਮੁਲਾਕਾਤ

ਪੀ.ਐਮ.ਮਾਰਕ ਕਾਰਨੀ ਅਤੇ ਚੀਨ ਦੇ ਰਾਸ਼ਟਰਪਤੀ ਸ਼ੀ ਜਿਨਪਿੰਗ ਨੇ ਸ਼ੁੱਕਰਵਾਰ ਨੂੰ ਸਾਊਥ ਕੋਰੀਆ ਵਿਚ ਏਸ਼ੀਆ-ਪ੍ਰਸ਼ਾਂਤ ਆਰਥਿਕ ਸਹਿਯੋਗ ਦੀ ਬੈਠਕ ਦੀ ਸਾਇਡਲਾਈਨ 'ਤੇ ਮੁਲਾਕਾਤ ਕੀਤੀ। ਇਹ ਦੋਵਾਂ ਦੇਸ਼ਾਂ ਦੇ ਲੀਡਰਾਂ ਵਿਚਕਾਰ 8 ਸਾਲਾਂ ਵਿਚ ਪਹਿਲੀ ਉੱਚ-ਪੱਧਰੀ ਗੱਲਬਾਤ ਹੈ, ਕਾਰਨੀ ਨੇ ਇਸ ਮੁਲਾਕਾਤ ਨੂੰ ਲੰਬੇ ਸਮੇਂ ਤੋਂ ਤਣਾਅਪੂਰਨ ਰਹੇ ਦੁਵੱਲੇ ਸਬੰਧਾਂ ਵਿਚ ਇੱਕ ਮਹੱਤਵਪੂਰਨ ਟਰਨਿੰਗ ਪੁਆਇੰਟ ਕਰਾਰ ਦਿੱਤਾ।

ਗਯੋਂਗਜੂ ਵਿਚ ਦੋਵਾਂ ਨੇਤਾਵਾਂ ਦੀ ਬੈਠਕ 40 ਮਿੰਟ ਚੱਲੀ, ਇਸ ਵਿਚ ਮੁੱਖ ਤੌਰ 'ਤੇ ਟੈਰਿਫ ਬਾਰੇ ਗੱਲਬਾਤ ਹੋਈ, ਜਿਸ ਵਿਚ ਕੈਨੇਡਾ ਵਲੋਂ ਚੀਨੀ ਇਲੈਕਟ੍ਰਿਕ ਵਾਹਨ 'ਤੇ 100 ਫੀਸਦੀ ਅਤੇ ਇਸ ਦੇ ਜਵਾਬ ਵਿਚ ਚੀਨ ਵਲੋਂ ਕੈਨੇਡੀਅਨ ਕੈਨੋਲਾ, ਸਮੁੰਦਰੀ ਭੋਜਨ ਅਤੇ ਸੂਰ ਦੇ ਮਾਸ 'ਤੇ ਟੈਰਿਫ ਲਗਾਏ ਹੋਏ ਹਨ। ਕਾਰਨੀ ਨੇ ਗੱਲਬਾਤ ਨੂੰ ਸਾਕਾਰਾਤਮਕ ਦੱਸਿਆ ਅਤੇ ਕਿਹਾ ਕਿ ਉਨ੍ਹਾਂ ਨੇ ਮੌਜੂਦਾ ਮੁੱਦਿਆਂ ਨੂੰ ਹੱਲ ਕਰਨ ਲ਼ਈ ਇੱਕ ਰਾਹ ਬਣਾਇਆ ਹੈ।

ਸਭ ਤੋਂ ਵੱਡੀ ਸਫਲਤਾ ਇਹ ਰਹੀ ਕਿ ਰਾਸ਼ਟਰਪਤੀ ਸ਼ੀ ਨੇ ਪ੍ਰਧਾਨ ਮੰਤਰੀ ਕਾਰਨੀ ਨੂੰ ਚੀਨ ਆਉਣ ਲਈ ਸੱਦਾ ਦਿੱਤਾ, ਜਿਸ ਨੂੰ ਕਾਰਨੀ ਨੇ ਸਵੀਕਾਰ ਕੀਤਾ ਹੈ। ਇਹ ਦੋਵਾਂ ਦੇਸ਼ਾਂ ਵਿਚਾਲੇ ਸਬੰਧਾਂ ਨੂੰ ਅੱਗੇ ਵਧਾਉਣ ਦੀ ਇੱਛਾ ਨੂੰ ਦਰਸਾਉਂਦਾ ਹੈ। ਪ੍ਰਧਾਨ ਮੰਤਰੀ ਨੇ ਦੱਸਿਆ ਕਿ ਉਹ ਸ਼ੀ ਦੇ ਸੱਦੇ 'ਤੇ ਚੀਨ ਜਾਣ ਦੀ ਯੋਜਨਾ ਬਣਾ ਰਹੇ ਹਨ। ਇਹ ਦੌਰਾ ਕਦੋਂ ਹੋ ਸਕਦਾ ਹੈ, ਇਸ ਬਾਰੇ ਅਜੇ ਕੋਈ ਵੇਰਵਾ ਉਪਲਬਧ ਨਹੀਂ ਹੈ।