ਕੈਨੇਡੀਅਨ ਏਅਰਲਾਈਨ ਦੇ ਹੈਡ ਨੂੰ ਹਾਦਸੇ ਦੇ ਹਮਦਰਦੀ ਸੰਦੇਸ਼ ਕਾਰਨ ਕੀਤਾ ਗਿਆ ਤਲਬ

ਕੈਨੇਡਾ ਦੀ ਸਭ ਤੋਂ ਵੱਡੀ ਏਅਰਲਾਈਨ ਦੇ ਹੈੱਡ ਨੂੰ ਨਿਊ ਯਾਰਕ ਸਿਟੀ ਏਅਰਪੋਰਟ 'ਤੇ ਹੋਏ ਕ੍ਰੈਸ਼ ਦੇ ਪੀੜਤਾਂ ਲਈ ਦਿੱਤੇ ਗਏ ਹਮਦਰਦੀ ਸੰਦੇਸ਼ ਦੌਰਾਨ ਸਿਰਫ਼ ਇੰਗਲਿਸ਼ ਭਾਸ਼ਾ ਦੀ ਵਰਤੋਂ ਕਰਨ ਲਈ ਔਟਵਾ ਤਲਬ ਕੀਤਾ ਗਿਆ ਹੈ। ਏਅਰ ਕੈਨੇਡਾ ਦੇ ਸੀਈਓ ਮਾਈਕਲ ਰੂਸੋ 'ਤੇ ਇਲਜ਼ਾਮ ਹਨ ਕਿ ਉਨ੍ਹਾਂ ਐਤਵਾਰ ਰਾਤ ਨੂੰ ਵਾਪਰੇ ਦਰਦਨਾਕ ਹਾਦਸੇ ਦੇ ਪੀੜਤ ਪਰਿਵਾਰਾਂ ਨਾਲ ਹਮਦਰਦੀ ਪ੍ਰਗਟਾਉਣ ਵੇਲੇ ਫ੍ਰੈਂਚ ਭਾਸ਼ਾ ਨੂੰ ਅੱਖੋਂ-ਪਰੋਖੇ ਕੀਤਾ। ਉਨ੍ਹਾਂ ਦੀ ਚਾਰ ਮਿੰਟ ਦੀ ਵੀਡੀਓ ਵਿਚ ਸਿਰਫ਼ ਦੋ ਸ਼ਬਦ ਹੀ ਫ੍ਰੈਂਚ ਦੇ ਸਨ।

ਕੈਨੇਡਾ ਵਿਚ ਦੋਹਾਂ ਭਾਸ਼ਾਵਾਂ ਦੇ ਬਰਾਬਰ ਸਤਿਕਾਰ ਦੇ ਨਿਯਮਾਂ ਕਾਰਨ ਇਹ ਮਾਮਲਾ ਕਾਫੀ ਗਰਮਾ ਗਿਆ ਹੈ। ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਵੀ ਅੱਜ ਪੱਤਰਕਾਰਾਂ ਨਾਲ ਗੱਲਬਾਤ ਕਰਦਿਆਂ ਇਸ 'ਤੇ ਸਖ਼ਤ ਨਾਰਾਜ਼ਗੀ ਜਤਾਈ, ਉਹਨਾਂ ਕਿਹਾ ਕਿ ਕੈਨੇਡਾ ਅਧਿਕਾਰਤ ਤੌਰ 'ਤੇ ਦੋਭਾਸ਼ੀ ਦੇਸ਼ ਹੈ ਅਤੇ ਖਾਸ ਤੌਰ 'ਤੇ ਇਸ ਹਾਲਾਤ ਵਿਚ ਅਜਿਹਾ ਨਹੀਂ ਹੋਣਾ ਚਾਹੀਦਾ ਸੀ।

ਗੌਰਤਲਬ ਹੈ ਕਿ ਪਾਰਲੀਮੈਂਟ ਦੀ Official Languages ​​Committee ਕਮੇਟੀ ਦੇ ਸਾਰੇ 10 ਐਮ.ਪੀ.ਐਸ. ਨੇ ਸਰਬਸੰਮਤੀ ਨਾਲ ਮਤਾ ਪਾਸ ਕਰਕੇ ਏਅਰ ਕੈਨੇਡਾ ਦੇ ਸੀ.ਈ.ਓ. Rousseau ਨੂੰ ਆਪਣਾ ਪੱਖ ਪੇਸ਼ ਕਰਨ ਲਈ ਕਿਹਾ ਹੈ। ਉਹਨਾਂ ਨੂੰ 1 ਮਈ ਤੱਕ ਐਮ.ਪੀ.ਐਸ. ਸਾਹਮਣੇ ਪੇਸ਼ ਹੋ ਕੇ ਇਸ ਬਾਰੇ ਸਪੱਸ਼ਟੀਕਰਨ ਦੇਣਾ ਹੋਵੇਗਾ ਕਿ ਉਹਨਾਂ ਵਲੋਂ ਫ੍ਰੈਂਚ ਭਾਸ਼ਾ ਨੂੰ ਬਰਾਬਰ ਦੀ ਮਾਨਤਾ ਕਿਉਂ ਨਹੀਂ ਦਿੱਤੀ ਗਈ।