ਪੀ.ਐਮ.ਕਾਰਨੀ ਦੂਜਾ ਦੌਰਾ ਅਮਰੀਕੀ ਟੈਰਿਫ ਤੋਂ ਬਿਨਾਂ ਕਿਸੇ ਰਾਹਤ ਦੇ ਹੋਇਆ ਖਤਮ

ਪੀ.ਐਮ.ਮਾਰਕ ਕਾਰਨੀ ਵਾਸ਼ਿੰਗਟਨ,ਡੀ.ਸੀ.ਦਾ ਦੌਰਾ ਖ਼ਤਮ ਕਰਦੇ ਹੋਏ ਅੱਜ ਔਟਵਾ ਵਾਪਸ ਪਰਤ ਆਏ ਹਨ। ਪ੍ਰਧਾਨ ਮੰਤਰੀ ਵਜੋਂ ਵ੍ਹਾਈਟ ਹਾਊਸ ਦਾ ਉਨ੍ਹਾਂ ਦਾ ਇਹ ਦੂਜਾ ਦੌਰਾ ਅਮਰੀਕੀ ਟੈਰਿਫ ਤੋਂ ਬਿਨਾਂ ਕਿਸੇ ਰਾਹਤ ਦੇ ਖਤਮ ਹੋਇਆ ਪਰ ਰਾਸ਼ਟਰਪਤੀ ਡੌਨਲਡ ਟਰੰਪ ਦਾ ਕਹਿਣਾ ਸੀ ਕਿ ਕੈਨੇਡਾ ਅਤੇ ਅਮਰੀਕਾ ਅਖੀਰ ਵਿਚ ਇੱਕ ਸਮਝੌਤੇ 'ਤੇ ਪਹੁੰਚਣਗੇ ਭਾਵੇਂ ਕੁਝ ਟੈਰਿਫ ਲਾਗੂ ਰਹਿ ਸਕਦੇ ਹਨ।

ਕਾਰਨੀ ਦੇ ਨਾਲ ਵ੍ਹਾਈਟ ਹਾਊਸ ਦੇ ਦੌਰੇ 'ਤੇ ਗਏ ਵਪਾਰ ਮੰਤਰੀ ਡੋਮਿਨਿਕ ਲੇਬਲੈਂਕ ਅਤੇ ਵਿਦੇਸ਼ ਮੰਤਰੀ ਅਨੀਤਾ ਆਨੰਦ ਸੈਕਟਰ ਸਪੈਸੀਫਿਕ ਟਰੇਡ ਡੀਲ ਸਬੰਧੀ ਅੱਗੇ ਦੀ ਗੱਲਬਾਤ ਲਈ ਬੁੱਧਵਾਰ ਨੂੰ ਵਾਸ਼ਿੰਗਟਨ ਵਿਚ ਹੀ ਹਨ,ਇਸ ਦੌਰਾਨ ਆਨੰਦ ਵਲੋਂ ਆਪਣੇ ਅਮਰੀਕੀ ਹਮਰੁਤਬਾ ਮਾਰਕੋ ਰੂਬੀਓ ਨਾਲ ਬੈਠਕ ਕਰਨਾ ਵੀ ਸ਼ਾਮਲ ਹੈ।

ਗੌਰਤਲਬ ਹੈ ਕਿ ਬੀਤੇ ਕੱਲ੍ਹ ਵ੍ਹਾਈਟ ਹਾਊਸ ਵਿਚ ਕਾਰਨੀ ਅਤੇ ਟਰੰਪ ਵਿਚਕਾਰ ਦੋਸਤਾਨਾ ਮਾਹੌਲ ਦੇਖਣ ਨੂੰ ਮਿਲਿਆ,ਟਰੰਪ ਨੇ ਪ੍ਰਧਾਨ ਮੰਤਰੀ ਨੂੰ ਵਿਸ਼ਵ ਪੱਧਰੀ ਨੇਤਾ ਨੇ ਕਿਹਾ ਅਤੇ ਕਾਰਨੀ ਨੇ ਟਰੰਪ ਦੀ ਟਰਾਂਸਫੋਰਮੇਟਵ ਰਾਸ਼ਟਰਪਤੀ ਵਜੋਂ ਪ੍ਰਸ਼ੰਸਾ ਕੀਤੀ। ਹਾਲਾਂਕਿ,ਦੋਹਾਂ ਵਿਚਾਲੇ ਇਹ ਦੋਸਤਾਨਾ ਗੱਲਬਾਤ ਵਪਾਰ ਸਮਝੌਤੇ ਵਿਚ ਨਹੀਂ ਬਦਲ ਸਕੀ। ਵਿਰੋਧ ਲੀਡਰ ਪੀਅਰ ਪੌਲੀਐਵ ਡੀਲ ਹਾਸਲ ਨਾ ਹੋਣ ਨੂੰ ਲੈ ਕੇ ਪ੍ਰਧਾਨ ਮੰਤਰੀ 'ਤੇ ਪਹਿਲਾਂ ਹੀ ਹਮਲਾਵਰ ਹਨ।