ਦੇਸ਼ ਦਾ ਅਗਲਾ ਗਵਰਨਰ ਜਨਰਲ ਦੋਵੇਂ ਅਧਿਕਾਰਕ ਭਾਸ਼ਾਵਾਂ ਵਿੱਚ ਨਿਪੁੰਨ ਹੋਵੇਗਾ: ਮਾਰਕ ਕਾਰਨੀ

ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਇੱਕ ਅਹਿਮ ਐਲਾਨ ਕਰਦਿਆਂ ਕਿਹਾ ਹੈ ਕਿ ਦੇਸ਼ ਦਾ ਅਗਲਾ ਗਵਰਨਰ ਜਨਰਲ ਲਾਜ਼ਮੀ ਤੌਰ 'ਤੇ ਸਰਕਾਰੀ ਭਾਸ਼ਾ ਜਾਣਨ ਵਾਲਾ ਦੋਭਾਸ਼ੀ ਹੋਵੇਗਾ, ਯਾਨੀ ਉਸ ਦੀ ਇੰਗਲਿਸ਼ ਅਤੇ ਫਰੈਂਚ ਦੋਵਾਂ ਸਰਕਾਰੀ ਭਾਸ਼ਾਵਾਂ 'ਤੇ ਪੂਰਨ ਪਕੜ ਹੋਵੇਗੀ। ਇੱਕ ਇੰਟਰਵਿਊ ਵਿਚ ਪ੍ਰਧਾਨ ਮੰਤਰੀ ਨੇ ਕਿਹਾ ਕਿ ਨਵੀਂ ਨਿਯੁਕਤੀ ਸਮੇਂ ਭਾਸ਼ਾਈ ਮੁਹਾਰਤ ਨੂੰ ਪਹਿਲ ਦਿੱਤੀ ਜਾਵੇਗੀ।

ਇਹ ਫੈਸਲਾ ਮੌਜੂਦਾ ਗਵਰਨਰ ਜਨਰਲ ਮੈਰੀ ਸਾਈਮਨ ਦੀ ਨਿਯੁਕਤੀ ਤੋਂ ਬਾਅਦ ਪੈਦਾ ਹੋਏ ਵਿਵਾਦਾਂ ਦੇ ਮੱਦੇਨਜ਼ਰ ਲਿਆ ਗਿਆ ਹੈ। ਮੈਰੀ ਜੋ ਕੈਨੇਡਾ ਦੇ ਪਹਿਲੇ ਇਨਡੀਜਨਸ ਗਵਰਨਰ ਜਨਰਲ ਹਨ, ਉਹਨਾਂ ਨੂੰ ਫਰੈਂਚ ਨਾ ਆਉਣ ਕਾਰਨ ਭਾਰੀ ਆਲੋਚਨਾ ਅਤੇ 1,300 ਤੋਂ ਵੱਧ ਅਧਿਕਾਰਤ ਸ਼ਿਕਾਇਤਾਂ ਦਾ ਸਾਹਮਣਾ ਕਰਨਾ ਪਿਆ ਹੈ। ਉਨ੍ਹਾਂ ਦਾ ਪੰਜ ਸਾਲਾ ਕਾਰਜਕਾਲ ਸਾਲ 2026 ਵਿਚ ਪੂਰਾ ਹੋਣ ਦੀ ਉਮੀਦ ਹੈ, ਜਿਸ ਕਾਰਨ ਨਵੇਂ ਗਵਰਨਰ ਜਨਰਲ ਦੀ ਚੋਣ ਲਈ ਚਰਚਾ ਤੇਜ਼ ਹੋ ਗਈ ਹੈ।

ਹਾਲਾਂਕਿ, ਪ੍ਰਧਾਨ ਮੰਤਰੀ ਨੇ ਅਜੇ ਤੱਕ ਕਿਸੇ ਖਾਸ ਨਾਮ ਦਾ ਜ਼ਿਕਰ ਨਹੀਂ ਕੀਤਾ ਪਰ ਉਨ੍ਹਾਂ ਦੇ ਇਸ ਬਿਆਨ ਨੇ ਇਹ ਸਾਫ਼ ਕਰ ਦਿੱਤਾ ਹੈ ਕਿ ਅਗਲਾ ਗਵਰਨਰ ਚੁਣਨ ਵੇਲੇ ਕੈਨੇਡਾ ਦੀਆਂ ਦੋਵੇਂ ਅਧਿਕਾਰਤ ਭਾਸ਼ਾਵਾਂ ਦੀ ਮਰਯਾਦਾ ਨੂੰ ਮੁੱਖ ਰੱਖਿਆ ਜਾਵੇਗਾ।