10.94C Vancouver 10.94C VancouverSep 11, 2025 11:55 AM - The Canadian Press
ਪੀ.ਐਮ.ਮਾਰਕ ਕਾਰਨੀ ਅੱਜ ਐਡਮਿੰਟਨ ਵਿਚ ਆਪਣੀ ਸਰਕਾਰ ਦੇ ਵੱਡੇ ਪ੍ਰੋਜੈਕਟ ਦੀ ਸੂਚੀ ਦਾ ਐਲਾਨ ਕਰਨਗੇ, ਜਿਨ੍ਹਾਂ ਨੂੰ ਦੇਸ਼ ਦੀ ਆਰਥਿਕਤਾ ਨੂੰ ਬੂਸਟ ਦੇਣ ਲਈ ਫਾਸਟ-ਟਰੈਕ ਮਨਜ਼ੂਰੀ ਦਿੱਤੀ ਜਾਵੇਗੀ। ਪਹਿਲੇ ਗੇੜ ਵਿਚ 5 ਪ੍ਰਮੁੱਖ ਪ੍ਰੋਜੈਕਟ ਦੇ ਵਿਸਥਾਰ ਦੀ ਉਮੀਦ ਹੈ,ਜਿਸ ਵਿਚ ਬੀ.ਸੀ.ਵਿਚ ਤਰਲ ਕੁਦਰਤੀ ਗੈਸ ਉਤਪਾਦਨ ਨੂੰ ਵਧਾਉਣਾ ਅਤੇ ਮਾਂਟਰੀਅਲ ਵਿਚ ਪੋਰਟ ਨੂੰ ਅਪਗ੍ਰੇਡ ਕਰਨਾ ਸ਼ਾਮਲ ਹੈ।
ਬੀ.ਸੀ.ਦੇ ਕਿਟੀਮਟ ਵਿਚ ਸਥਿਤ ਐਲ.ਐਨ.ਜੀ.ਕੈਨੇਡਾ ਦੇ ਵਿਸਥਾਰ ਨਾਲ ਕੈਨੇਡਾ ਦੇ ਕੁਦਰਤੀ ਗੈਸ ਦਾ ਉਤਪਾਦਨ ਦੁੱਗਣਾ ਹੋਵੇਗਾ। ਕਾਰਨੀ ਸਰਕਾਰ ਦਾ ਮਕਸਦ ਜਰਮਨੀ ਵਰਗੇ ਨਵੇਂ ਬਾਜ਼ਾਰਾਂ ਵਿਚ ਕੈਨੇਡੀਅਨ ਐਲਐਨਜੀ ਨਿਰਯਾਤ ਨੂੰ ਜੋੜਨਾ ਹੈ। ਹੋਰ ਪ੍ਰੋਜੈਕਟਸ ਵਿਚ ਕਿਫਾਇਤੀ ਪਾਵਰ ਜਨਰੇਸ਼ਨ ਲਈ ਓਨਟਾਰੀਓ ਵਿਚ ਡਾਰਲਿੰਗਟਨ ਨਿਊ ਨਿਊਕਲੀਅਰ ਪ੍ਰੋਜੈਕਟ ਸ਼ਾਮਲ ਹੈ, ਇਸ ਨਾਲ ਕੈਨੇਡਾ ਜੀ-7 ਦਾ ਪਹਿਲਾ ਅਜਿਹਾ ਮੁਲਕ ਬਣ ਰਿਹਾ ਹੈ ਜਿਸ ਕੋਲ ਇੱਕ ਓਪਰੇਸ਼ਨਲ ਸਮਾਲ ਮਾਡਿਊਲਰ ਰਿਐਕਟਰ ਹੋਵੇਗਾ।
ਇਸ ਤੋਂ ਇਲਾਵਾ ਸੂਚੀ ਵਿਚ ਸਸਕੈਚਵਨ ਵਿਚ ਕਾਪਰ ਮਾਈਨ ਪ੍ਰੋਜੈਕਟ ਅਤੇ ਬੀ.ਸੀ.ਵਿਚ ਰੈੱਡ ਕ੍ਰਿਸ ਮਾਈਨ ਦਾ ਵਿਸਥਾਰ ਸ਼ਾਮਲ ਹੈ। ਪਹਿਲੇ ਫੇਜ਼ ਵਿਚ ਕੋਈ ਪਾਈਪਲਾਈਨ ਨਹੀਂ ਹੈ ਕਿਉਂਕਿ ਕੋਈ ਵੀ ਨਿੱਜੀ ਕੰਪਨੀ ਹੁਣ ਤੱਕ ਇਸ ਨੂੰ ਡਿਵੈਲਪ ਕਰਨ ਲਈ ਅੱਗੇ ਨਹੀਂ ਆਈ ਹੈ।
