ਸਰੀ 'ਚ ਐਸਕੌਰਟ ਸੇਵਾਵਾਂ ਹਾਸਿਲ ਕਰਨ ਵਾਲੇ ਲੋਕਾਂ ਨੂੰ ਸਰੀ ਆਰ.ਸੀ.ਐਮ.ਪੀ. ਨੇ ਕੀਤਾ ਸਾਵਧਾਨ

ਸਰੀ ਆਰ.ਸੀ.ਐਮ.ਪੀ. ਨੇ ਇਲਾਕੇ ਦੇ ਲੋਕਾਂ ਨੂੰ ਅਜਿਹੀਆਂ ਘਟਨਾਵਾਂ ਬਾਰੇ ਸਾਵਧਾਨ ਕੀਤਾ ਹੈ, ਜਿੱਥੇ ਡਰੱਗਸ ਦੇ ਕੇ ਡਕੈਤੀ ਨੂੰ ਅੰਜਾਮ ਦਿੱਤਾ ਜਾ ਰਿਹਾ ਹੈ।

ਇਲਾਕੇ 'ਚ ਐਸਕੌਰਟ ਸੇਵਾਵਾਂ ਹਾਸਿਲ ਕਰਦੇ ਲੋਕਾਂ ਨਾਲ ਇਸ ਪ੍ਰਕਾਰ ਦੀਆਂ ਘਟਨਾਵਾਂ ਵਾਪਰੀਆਂ ਦੱਸੀਆਂ ਗਈਆਂ ਹਨ।

ਪੁਲਿਸ ਦਾ ਕਹਿਣਾ ਹੈ ਕਿ ਅਜਿਹੇ ਕਈ ਮਾਮਲੇ ਸਾਹਮਣੇ ਆਏ ਹਨ ਜਿੱਥੇ ਕਿਸੇ ਐਸਕੌਰਟ ਨਾਲ ਔਨਲਾਈਨ ਢੰਗ ਨਾਲ ਸੰਪਰਕ ਬਣਾਇਆ ਗਿਆ ਸੀ ਅਤੇ ਲੋਅਰ ਮੇਨਲੈਂਡ 'ਚ ਕਿਸੇ ਜਗ੍ਹਾ 'ਤੇ ਮਿਲਣ ਦਾ ਪਲੈਨ ਬਣਾਇਆ ਗਿਆ ਪਰ ਮੌਕੇ 'ਤੇ ਵਿਅਕਤੀ ਨੂੰ ਡਰੱਗਸ ਦੇ ਦਿੱਤੇ ਗਏ ਅਤੇ ਹੋਸ਼ ਆਉਣ ਤਕ ਉਨ੍ਹਾਂ ਦਾ ਕੀਮਤੀ ਸਾਮਾਨ ਚੋਰੀ ਹੋ ਚੁੱਕਿਆ ਸੀ।

ਪੁਲਿਸ ਦਾ ਕਹਿਣਾ ਹੈ ਕਿ ਇਹ ਘਟਨਾਵਾਂ ਚਿੰਤਤ ਕਰਨ ਵਾਲੀਆਂ ਹਨ ਕਿਉਂਕਿ ਇਹ ਲੋਕਾਂ ਦੀ ਸਿਹਤ ਪ੍ਰਤੀ ਖਤਰਾ ਖੜਾ ਕਰਦੀਆਂ ਹਨ।

ਲੋਕਾਂ ਨੂੰ ਅਪੀਲ ਕੀਤੀ ਗਈ ਹੈ ਕਿ ਅਜਿਹੀ ਕਿਸੇ ਘਟਨਾ 'ਚ ਜੇਕਰ ਤੁਹਾਨੂੰ ਡਰੱਗ ਕੀਤਾ ਗਿਆ ਹੈ ਤਾਂ ਤੁਰੰਤ ਮੈਡਿਕਲ ਅਸਿਸਟੈਂਸ ਹਾਸਿਲ ਕੀਤੀ ਜਾਵੇ।

ਲੋਕਾਂ ਨੂੰ ਮੰਗ ਕੀਤੀ ਗਈ ਹੈ ਕਿ ਬੰਦ ਦਰਵਾਜੇ ਪਿੱਛੇ ਕਿਸੇ ਅਣਜਾਣ ਵਿਅਕਤੀ ਨੂੰ ਮਿਲਦੇ ਹੋਏ ਆਪਣੇ ਖਾਣਪੀਣ ਦੀ ਸਮਗਰੀ ਦਾ ਧਿਆਨ ਰੱਖਿਆ ਜਾਵੇ ਕਿ ਉਸ 'ਚ ਮਿਲਾਵਟ ਤਾਂ ਨਹੀਂ ਕੀਤੀ ਹੋਈ, ਅਣਜਾਣ ਵਿਅਕਤੀ ਦੀ ਦਿੱਤੀ ਚੀਜ ਖਾਣ ਤੋਂ ਗੁਰੇਜ ਕੀਤਾ ਜਾਵੇ, ਅਜਿਹੀ ਜਗ੍ਹਾ 'ਤੇ ਡਰੱਗਸ ਜਾਂ ਸ਼ਰਾਬ ਦੇ ਸੇਵਨ ਤੋਂ ਬਚਾਅ ਕੀਤਾ ਜਾਵੇ ਅਤੇ ਆਪਣੇ ਕਿਸੇ ਅਜਿਹੇ ਟਿਕਾਣੇ 'ਤੇ ਜਾਣ ਤੋਂ ਪਹਿਲਾਂ ਜਗ੍ਹਾ ਬਾਰੇ ਕਿਸੇ ਭਰੋਸੇਯੋਗ ਵਿਅਕਤੀ ਨੂੰ ਦੱਸਿਆ ਜਾਵੇ।

ਪੁਲਿਸ ਦਾ ਮੰਨਣਾ ਹੈ ਕਿ ਅਜਿਹੀਆਂ ਘਟਨਾਵਾਂ ਦੇ ਕਈ ਹੋਰ ਪੀੜਤ ਹੋ ਸਕਦੇ ਹਨ ਜੋ ਅਜੇ ਸਾਹਮਣੇ ਨਹੀਂ ਆਏ ਹਨ।