ਕੈਨੇਡਾ ਨੇ ਪਿਛਲੇ 12 ਮਹੀਨਿਆਂ ਵਿਚ 22,000 ਤੋਂ ਵੱਧ ਲੋਕਾਂ ਨੂੰ ਦਿੱਤਾ ਦੇਸ਼ ਨਿਕਾਲਾ

ਕੈਨੇਡਾ ਨੇ ਪਿਛਲੇ 12 ਮਹੀਨਿਆਂ ਵਿਚ 22,000 ਤੋਂ ਵੱਧ ਲੋਕਾਂ ਨੂੰ ਦੇਸ਼ ਨਿਕਾਲਾ ਦਿੱਤਾ ਹੈ, ਜੋ ਕਿ ਇੱਕ ਰਿਕਾਰਡ ਗਿਣਤੀ ਹੈ। ਸੀ.ਬੀ.ਐਸ.ਏ.ਦੇ ਉਪ-ਰਾਸ਼ਟਰਪਤੀ ਐਰੋਨ ਮੈਕਰੋਰੀ ਮੁਤਾਬਕ, ਏਜੰਸੀ ਹਰ ਹਫ਼ਤੇ ਲਗਭਗ 400 ਲੋਕਾਂ ਨੂੰ ਡਿਪੋਰਟ ਕਰ ਰਹੀ ਹੈ।

ਹਾਲਾਂਕਿ, ਰੀਮੂਵਲ ਦੀ ਗਿਣਤੀ ਆਲ-ਟਾਈਮ ਹਾਈ 'ਤੇ ਪਹੁੰਚਣ ਦੇ ਬਾਵਜੂਦ ਕੈਨੇਡਾ ਬਾਰਡਰ ਸਰਵਿਸਿਜ਼ ਏਜੰਸੀ ਕੋਲ ਇਸ ਸਮੇਂ 33,000 ਦੇ ਕਰੀਬ ਲੋਕ ਦੇਸ਼ ਨਿਕਾਲੇ ਦੇ ਵਾਰੰਟ ਨਾਲ ਪੈਂਡਿੰਗ ਲਿਸਟ ਵਿਚ ਹਨ। ਇਨ੍ਹਾਂ ਵਿਚੋਂ 10,000 ਤੋਂ ਵੱਧ ਵਾਰੰਟ ਇੱਕ ਸਾਲ ਤੋਂ ਵੀ ਪੁਰਾਣੇ ਹਨ।

ਮੈਕਰੋਰੀ ਨੇ ਕਿਹਾ ਕਿ ਜ਼ਿਆਦਾਤਰ ਲੋਕ ਹਟਾਉਣ ਦੇ ਹੁਕਮ ਦੀ ਪਾਲਣਾ ਕਰਦੇ ਖ਼ੁਦ ਹੀ ਦੇਸ਼ ਛੱਡ ਦਿੰਦੇ ਹਨ ਪਰ ਜਿਹੜੇ ਅਜਿਹਾ ਨਹੀਂ ਕਰਦੇ, ਉਨ੍ਹਾਂ ਲਈ ਸੀ.ਬੀ.ਐਸ.ਏ. ਵਾਰੰਟ ਜਾਰੀ ਕਰਦੀ ਹੈ। ਏਜੰਸੀ ਸਭ ਤੋਂ ਪਹਿਲਾਂ ਉਨ੍ਹਾਂ ਲੋਕਾਂ 'ਤੇ ਕਾਰਵਾਈ ਕਰਦੀ ਹੈ ਜੋ ਰਾਸ਼ਟਰੀ ਸੁਰੱਖਿਆ, ਸੰਗਠਿਤ ਅਪਰਾਧ ਜਾਂ ਹੋਰ ਗੰਭੀਰ ਮਾਮਲਿਆਂ ਵਿਚ ਸ਼ਾਮਲ ਹੁੰਦੇ ਹਨ, ਫਿਰ ਰਫਿਊਜੀ ਦਾ ਦਾਅਵਾ ਰੱਦ ਹੋਣ ਵਾਲਿਆਂ ਅਤੇ ਹੋਰ ਇਮੀਗ੍ਰੇਸ਼ਨ ਉਲੰਘਣਾ ਕਰਨ ਵਾਲਿਆਂ ਨੂੰ ਵਾਪਸ ਉਨ੍ਹਾਂ ਦੇ ਦੇਸ਼ ਭੇਜਿਆ ਜਾਂਦਾ ਹੈ।

ਸੀ.ਬੀ.ਐਸ.ਏ. ਤੋਂ ਇਹ ਤਾਜ਼ਾ ਜਾਣਕਾਰੀ ਕੰਜ਼ਰਵੇਟਿਵ ਦੀ ਇਮੀਗ੍ਰੇਸ਼ਨ ਆਲੋਚਕ ਮਿਸ਼ੇਲ ਰੇਂਪਲ-ਗਾਰਨਰ ਵਲੋਂ ਸਬਮਿਟ ਕੀਤੇ ਗਏ ਇੱਕ ਆਰਡਰ ਪੇਪਰ ਸਵਾਲ ਦੇ ਜਵਾਬ ਵਿਚ ਸਾਹਮਣੇ ਆਈ ਹੈ।