ਚੀਨ ਨੇ ਅਮਰੀਕਾ ਨੂੰ ਟਿੱਕਟੌਕ ਬੈਨ ਕਰਨ ’ਤੇ ਦਿੱਤੀ ਧਮਕੀ

ਚੀਨ ਨੇ ਅਮਰੀਕਾ ਨੂੰ ਟਿੱਕਟੌਕ ਬੈਨ ’ਤੇ ਧਮਕੀ ਦਿੱਤੀ ਹੈ। ਬੀਜਿੰਗ ਦਾ ਕਹਿਣਾ ਹੈ ਕਿ ਇਸ ਦਾ ਉਲਟਾ ਅਮਰੀਕਾ ਨੂੰ ਹੀ ਨੁਕਸਾਨ ਹੋਵੇਗਾ।

ਚੀਨ ਦੇ ਵਿਦੇਸ਼ ਮੰਤਰਾਲੇ ਦੇ ਬੁਲਾਰੇ ਨੇ ਕਿਹਾ ਕਿ ਅਮਰੀਕਾ ਨੂੰ ਕਦੇ ਵੀ ਇਸ ਗੱਲ ਦਾ ਸਬੂਤ ਨਹੀਂ ਮਿਲਿਆ ਕਿ ਟਿੱਕਟੌਕ ਉਨ੍ਹਾਂ ਦੀ ਰਾਸ਼ਟਰੀ ਸੁਰੱਖਿਆ ਲਈ ਖਤਰਾ ਹੈ ਪਰ ਫਿਰ ਵੀ ਉਨ੍ਹਾਂ ਨੇ ਇਸ ਨੂੰ ਦਬਾਉਣ ਦੀ ਕੋਈ ਕਸਰ ਬਾਕੀ ਨਹੀਂ ਛੱਡੀ।

ਉਨ੍ਹਾਂ ਕਿਹਾ ਕਿ ਅਮਰੀਕਾ ਦਾ ਇਹ ਨਿਵੇਸ਼ਕਾਂ ਨੂੰ ਧਮਕਾਉਣ ਵਾਲਾ ਕਦਮ ਹੈ। ਗੌਰਤਲਬ ਹੈ ਕਿ ਅਮਰੀਕਾ ਦੇ ਹਾਊਸ ਨੇ ਟਿੱਕਟੌਕ ਨੂੰ ਬੈਨ ਕਰਨ ਲਈ ਇੱਕ ਬਿੱਲ ਪਾਸ ਕੀਤਾ ਹੈ। ਇਸ ਵਿਚ ਕਿਹਾ ਗਿਆ ਹੈ ਜਾਂ ਤਾਂ ਟਿੱਕਟੌਕ ਨੂੰ ਆਪਣੀ ਚਾਈਨਿਜ਼ ਮਾਲਕੀ ਵਾਲੀ ਬਾਈਟਡਾਂਸ ਕੰਪਨੀ ਤੋਂ ਵੱਖ ਹੋਣਾ ਹੋਵੇਗਾ ਜਾਂ ਫਿਰ ਉਸ ਨੂੰ ਅਮਰੀਕਾ ਵਿਚ ਬੈਨ ਦਾ ਸਾਹਮਣਾ ਕਰਨਾ ਪਵੇਗਾ।

ਦੱਸ ਦੇਈਏ ਕਿ ਅਮਰੀਕਾ ਦੀ ਖੁਫੀਆ ਏਜੰਸੀ ਦੀ ਰਿਪੋਰਟ ਦਾ ਕਹਿਣਾ ਸੀ ਕਿ ਚੀਨ ਆਪਣੇ ਆਲੋਚਕਾਂ ਨੂੰ ਕਿਨਾਰੇ ਕਰਨ ਅਤੇ ਅਮਰੀਕਾ ਵਿਚ ਸਮਾਜਿਕ ਵਿਭਾਜਨ ਨੂੰ ਵਧਾਉਣ ਲਈ 2024 ਦੀਆਂ ਇਲੈਕਸ਼ਨਸ ਨੂੰ ਪ੍ਰਭਾਵਿਤ ਕਰਨ ਦੀ ਕੋਸ਼ਿਸ਼ ਕਰ ਸਕਦਾ ਹੈ। ਓਧਰ, ਚੀਨ ਦੀਆਂ ਕਈ ਅਖਬਾਰਾਂ ਨੇ ਵਿਅੰਗਮਈ ਕਾਰਟੂਨ ਦਿਖਾਉਂਦੇ ਹੋਏ ਟਿਕ-ਟਾਕ ’ਤੇ ਪਾਬੰਦੀ ਲਗਾਉਣ ਦੀ ਅਮਰੀਕੀ ਕੋਸ਼ਿਸ਼ ਦਾ ਮਜ਼ਾਕ ਉਡਾਇਆ ਹੈ।