ਕੈਨੇਡਾ ਦੇ ਵਿੱਤ ਮੰਤਰੀ ਫ੍ਰਾਂਸਵਾ-ਫਿਲਿਪ ਸ਼ੈਂਪੇਨ ਅਮਰੀਕਾ ਦੌਰੇ 'ਤੇ

ਕੈਨੇਡਾ ਦੇ ਵਿੱਤ ਮੰਤਰੀ ਫ੍ਰਾਂਸਵਾ-ਫਿਲਿਪ ਸ਼ੈਂਪੇਨ ਅਮਰੀਕਾ ਦੌਰੇ 'ਤੇ ਹਨ, ਜਿੱਥੇ ਉਹ ਵਾਸ਼ਿੰਗਟਨ ਵਿਚ ਜੀ 7 ਦੇ ਆਪਣੇ ਹਮਰੁਤਬਾ ਮੰਤਰੀਆਂ ਨਾਲ ਮੁਲਾਕਾਤ ਕਰ ਰਹੇ ਹਨ। ਇਸ ਮੀਟਿੰਗ ਦਾ ਮੁੱਖ ਏਜੰਡਾ ਟਰੇਡ ਖਾਸ ਕਰ ਮਹੱਤਵਪੂਰਨ ਖਣਿਜ ਦੀ ਸਪਲਾਈ ਚੇਨ ਨੂੰ ਚੀਨ ਦੇ ਪ੍ਰਭਾਵ ਤੋਂ ਮੁਕਤ ਰੱਖਣ ਬਾਰੇ ਰਣਨੀਤੀ ਬਣਾਉਣਾ ਹੈ।

ਇਹ ਮੀਟਿੰਗ ਅਮਰੀਕਾ ਦੇ ਖਜ਼ਾਨਾ ਸਕੱਤਰ ਸਕਾਟ ਬੇਸੈਂਟ ਦੀ ਮੇਜ਼ਬਾਨੀ ਹੇਠ ਹੋ ਰਹੀ ਹੈ। ਜੀ 7 ਦੇਸ਼ਾਂ ਤੋਂ ਇਲਾਵਾ ਭਾਰਤ ਅਤੇ ਆਸਟ੍ਰੇਲੀਆ ਵਰਗੇ ਦੇਸ਼ਾਂ ਨੂੰ ਵੀ ਇਸ ਬੈਠਕ ਲਈ ਸੱਦਾ ਦਿੱਤਾ ਗਿਆ ਸੀ ਤਾਂ ਜੋ ਇੱਕ ਵਿਆਪਕ ਗਠਜੋੜ ਬਣਾਇਆ ਜਾ ਸਕੇ। ਮੰਤਰੀ ਸ਼ੈਂਪੇਨ ਨੇ ਕਿਹਾ ਕਿ ਕੈਨੇਡਾ ਕੋਲ ਇਲੈਕਟ੍ਰਿਕ ਗੱਡੀਆਂ ਅਤੇ ਰੱਖਿਆ ਤਕਨਾਲੋਜੀ ਲਈ ਵਰਤੇ ਜਾਣ ਵਾਲੇ ਮਹੱਤਵਪੂਰਨ ਖਣਿਜ ਦਾ ਭੰਡਾਰ ਹੈ ਅਤੇ ਇਹ ਦੁਨੀਆ ਲਈ ਇੱਕ ਭਰੋਸੇਮੰਦ ਵਪਾਰਕ ਹਿੱਸੇਦਾਰ ਸਾਬਤ ਹੋ ਸਕਦਾ ਹੈ।

ਖ਼ਬਰਾਂ ਮੁਤਾਬਕ, ਪੱਛਮੀ ਦੇਸ਼ਾਂ ਵਿਚ ਮਾਈਨਿੰਗ ਪ੍ਰੋਜੈਕਟਸ ਨੂੰ ਆਰਥਿਕ ਤੌਰ 'ਤੇ ਸੁਰੱਖਿਅਤ ਬਣਾਉਣ ਲਈ ਘੱਟੋ-ਘੱਟ ਕੀਮਤਾਂ ਤੈਅ ਕਰਨ ਬਾਰੇ ਵੀ ਵਿਚਾਰ ਕੀਤਾ ਜਾ ਰਿਹਾ ਹੈ। ਗੌਰਤਲਬ ਹੈ ਕਿ ਜੂਨ ਵਿਚ ਐਲਬਰਟਾ ਦੇ ਕਾਨਾਨਾਸਕਿਸ ਵਿਚ ਜੀ-7 ਮੁਲਕਾਂ ਨੇ ਮਿਲ ਕੇ ਮਹੱਤਵਪੂਰਨ ਖਣਿਜ ਲਈ ਇੱਕ ਐਕਸ਼ਨ ਪਲੈਨ ਅਤੇ ਪ੍ਰੋਡਕਸ਼ਨ ਅਲਾਇੰਸ ਲੌਂਚ ਕੀਤਾ ਸੀ।