ਨਨਾਈਮੋ 'ਚ ਲਾਪਤਾ ਹੋਏ ਆਦਮੀ ਦੇ ਕਤਲ ਦੇ ਮਾਮਲੇ 'ਚ ਔਰਤ 'ਤੇ ਲੱਗੇ ਦੋਸ਼

ਨਨਾਈਮੋ ਆਰ.ਸੀ.ਐਮ.ਪੀ. ਨੇ ਜਾਣਕਾਰੀ ਦਿੱਤੀ ਹੈ ਕਿ 2 ਸਾਲ ਤਕ ਚੱਲੀ ਜਾਂਚ ਤੋਂ ਬਾਅਦ ਇੱਕ 26 ਸਾਲਾ ਔਰਤ 'ਤੇ ਦੋਸ਼ ਲੱਗੇ ਹਨ।

ਮਾਮਲਾ 33 ਸਾਲਾ ਸਿਡਨੀ ਮੈਂਟੀ ਦੇ ਲਾਪਤਾ ਹੋਣ ਨਾਲ ਸੰਬੰਧਤ ਹੈ।

ਇਸ ਮਾਮਲੇ 'ਚ ਪੈਰਿਸ ਲਾਰੌਚ ਨਾਮ ਦੀ ਔਰਤ ਖਿਲਾਫ ਫਰਸਟ ਡਿਗਰੀ ਕਤਲ ਅਤੇ 'ਇਨਡਿਗਨਿਟੀ ਟੁ ਹਿਊਮ ਰਿਮੇਨਸ' ਦੇ ਦੋਸ਼ ਲੱਗੇ ਹਨ।

ਇਹ ਦੋਵੇਂ ਦੋਸ਼ ਸਿਡਨੀ ਮੈਂਟੀ ਦੇ ਕਤਲ ਅਤੇ ਉਸ ਦੇ ਲਾਪਤਾ ਹੋਣ ਨਾਲ ਸੰਬੰਧਤ ਹਨ।

ਲਾਰੌਚ ਨੂੰ ਬੁੱਧਵਾਰ ਨੂੰ ਗ੍ਰਿਫਤਾਰ ਕੀਤਾ ਗਿਆ ਸੀ।

ਪੁਲਿਸ ਵੱਲੋਂ ਜਾਰੀ ਜਾਣਕਾਰੀ 'ਚ ਘਟਨਾ ਸੰਬੰਧੀ ਬਹੁਤੇ ਵੇਰਵੇ ਜਾਰੀ ਨਹੀਂ ਕੀਤੇ ਗਏ ਹਨ ਪਰ ਇਹ ਜਰੂਰ ਦੱਸਿਆ ਕਿ ਮੈਂਟੀ ਦੇ ਲਾਪਤਾ ਹੋਣ ਮਗਰੋਂ ਲੰਮੀ ਜਾਂਚ ਜਾਰੀ ਰਹੀ ਸੀ ਅਤੇ ਕਤਲ ਦੇ ਮਾਮਲੇ 'ਚ ਕਈ ਸਬੂਤ ਜੁਟਾਏ ਗਏ ਸਨ।

ਪੁਲਿਸ ਨੇ ਆਖਿਆ ਕਿ ਪਰਿਵਾਰਾਂ ਦੀ ਪ੍ਰਾਈਵੇਸੀ ਦਾ ਧਿਆਨ ਰੱਖਿਆ ਜਾਵੇ ਅਤੇ ਮਾਮਲਾ ਕੋਰਟ ਪਹੁੰਚਣ ਕਾਰਨ ਹੋਰ ਜਾਣਕਾਰੀ ਨਹੀਂ ਦਿੱਤੀ ਜਾ ਰਹੀ।