ਬਿੱਲ ਪਾਸ ਹੋਏ ਤਾਂ ਫਰਸਟ ਨੇਸ਼ਨਸ ਅਤੇ ਈਬੀ ਵਿਚਾਲੇ ਦੇ ਭਰੋਸੇ 'ਤੇ ਪਵੇਗਾ ਅਸਰ: ਚੀਫ਼ ਡੌਨ ਟੌਮ

ਬੀਸੀ ਸਰਕਾਰ ਦੇ ਵਿਵਾਦਤ ਬਿੱਲ 14 ਅਤੇ ਬਿੱਲ 15 ਨੂੰ ਲੈ ਕੇ ਮਾਮਲਾ ਗਰਮਾ ਗਿਆ ਹੈ।ਫਰਸਟ ਨੇਸ਼ਨ ਲੀਡਰ ਦਾ ਕਹਿਣਾ ਹੈ ਕਿ ਅਮਰੀਕੀ ਟੈਰਿਫ ਦੀ ਆੜ ਵਿਚ ਲਿਆਂਦੇ ਗਏ ਇਹ ਦੋ ਬਿੱਲ ਜੇ ਇਸ ਹਫ਼ਤੇ ਪਾਸ ਹੋ ਜਾਂਦੇ ਹਨ ਤਾਂ ਪ੍ਰੀਮੀਅਰ ਡੇਵਿਡ ਈਬੀ ਦੀ ਸਰਕਾਰ ਨਾਲ ਫਰਸਟ ਨੇਸ਼ਨ ਦਾ ਵਿਸ਼ਵਾਸ ਦਾ ਯੁੱਗ ਸਮਾਪਤ ਹੋ ਜਾਵੇਗਾ।

ਗ੍ਰੇਟਰ ਵਿਕਟੋਰੀਆ ਵਿਚ ਸਾਰਟਲਿਪ ਫਸਟ ਨੇਸ਼ਨ ਦੇ ਪ੍ਰਮੁੱਖ ਡੌਨ ਟੌਮ ਨੇ ਕਿਹਾ ਕਿ ਫਰਸਟ ਨੇਸ਼ਨ ਵਲੋਂ ਬਿੱਲ 14 ਅਤੇ ਬਿੱਲ 15 ਖਿਲਾਫ ਹਰ ਸੰਭਵ ਕਾਨੂੰਨੀ ਕੋਸ਼ਿਸ਼ ਕੀਤੀ ਜਾਵੇਗੀ ਅਤੇ ਨਾਲ ਹੀ ਚਿਤਾਵਨੀ ਦਿੱਤੀ ਕਿ ਅਗਲੀਆਂ ਚੋਣਾਂ ਵਿਚ ਸਰਕਾਰ ਦੀਆਂ ਕਾਰਵਾਈਆਂ ਨੂੰ ਯਾਦ ਰੱਖਾਂਗੇ। ਆਰੋਪ ਹੈ ਕਿ ਸਰਕਾਰ ਵਲੋਂ ਇਨ੍ਹਾਂ ਬਿੱਲ ਵਿਚ ਵਾਤਾਵਰਣ ਸੰਬੰਧੀ ਨਿਯਮਾਂ ਨੂੰ ਦਰਕਿਨਾਰ ਕੀਤਾ ਜਾ ਸਕਦਾ ਹੈ।

ਬਿੱਲ 14 ਨਵਿਆਉਣਯੋਗ ਊਰਜਾ ਪ੍ਰਾਜੈਕਟ ਨੂੰ ਤੇਜ਼ੀ ਦੇਣ ਨਾਲ ਸਬੰਧਤ ਹੈ, ਜਿਸ ਤਹਿਤ ਬੀ.ਸੀ. ਐਨਰਜੀ ਰੈਗੂਲੇਟਰ- ਵਾਤਾਵਰਣ ਮੁਲਾਂਕਣ ਤੋਂ ਬਿਨਾਂ ਮਨਜ਼ੂਰੀ ਦੇ ਸਕਦਾ ਹੈ। ਉਥੇ ਹੀ, ਬਿੱਲ 15 ਕੈਬਨਿਟ ਨੂੰ ਪਬਲਿਕ ਤੇ ਨਿੱਜੀ ਬੁਨਿਆਦੀ ਢਾਂਚੇ ਦੇ ਪ੍ਰੋਜੈਕਟ ਨੂੰ ਮਨਜ਼ੂਰੀ ਦੇਣ ਦਾ ਅਧਿਕਾਰ ਦਿੰਦਾ ਹੈ, ਜਿਸ ਲਈ ਸਰਕਾਰ ਸੰਭਾਵੀ ਤੌਰ 'ਤੇ ਵਾਤਾਵਰਣ ਸੰਬੰਧੀ ਸਮੀਖਿਆਵਾਂ ਅਤੇ ਸਵਦੇਸ਼ੀ ਸਲਾਹ-ਮਸ਼ਵਰਾ ਨੂੰ ਬਾਈਪਾਸ ਕਰ ਸਕਦੀ ਹੈ।