ਚੀਨ ਨੇ ਕੈਨੇਡੀਅਨ ਸਟੀਲ ਟੈਰਿਫ 'ਤੇ ਵਿਸ਼ਵ ਵਪਾਰ ਸੰਗਠਨ ਕੋਲ ਦਰਜ ਕਰਵਾਈ ਸ਼ਿਕਾਇਤ

ਕੈਨੇਡਾ ਵਲੋਂ ਚੀਨੀ ਸਟੀਲ 'ਤੇ ਲਗਾਏ ਗਏ ਟੈਰਿਫ ਦਾ ਮਾਮਲਾ ਵਿਸ਼ਵ ਵਪਾਰ ਸੰਗਠਨ ਵਿਚ ਪਹੁੰਚ ਗਿਆ ਹੈ, ਬੀਜਿੰਗ ਨੇ ਅੱਜ ਡਬਲਿਊ.ਟੀ.ਓ.ਵਿਚ ਸ਼ਿਕਾਇਤ ਦਰਜ ਕਰਾਈ ਹੈ। ਪ੍ਰਧਾਨ ਮੰਤਰੀ ਮਾਰਕ ਕਾਰਨੀ ਨੇ ਪਿਛਲੇ ਮਹੀਨੇ ਰਾਸ਼ਟਰਪਤੀ ਡੌਨਲਡ ਟਰੰਪ ਦੇ ਗਲੋਬਲ ਸਟੀਲ ਟੈਰਿਫ ਦੇ ਮੱਦੇਨਜ਼ਰ ਕੈਨੇਡੀਅਨ ਇੰਡਟਸਰੀ ਦੀ ਰੱਖਿਆ ਲਈ ਚੀਨੀ ਸਟੀਲ ਪ੍ਰੋਡਕਟ 'ਤੇ 25 ਫੀਸਦੀ ਵਾਧੂ ਟੈਕਸ ਲਗਾਉਣ ਦਾ ਐਲਾਨ ਕੀਤਾ ਸੀ।

ਚੀਨ ਦਾ ਕਹਿਣਾ ਹੈ ਕਿ ਇਹ ਇੰਪੋਰਟ ਡਿਊਟੀਆਂ ਪੱਖਪਾਤੀ ਹਨ। ਚੀਨੀ ਵਣਜ ਮੰਤਰਾਲੇ ਨੇ ਬਿਆਨ ਵਿਚ ਕਿਹਾ ਕਿ ਉਹ ਕੈਨੇਡਾ ਵਲੋਂ ਟੈਰਿਫ ਲਗਾਉਣ ਦੇ ਕਦਮ ਤੋਂ ਨਿਰਾਸ਼ ਹੈ ਅਤੇ ਕੈਨੇਡਾ ਨੂੰ ਆਪਣੀਆਂ ਗਲਤ ਕਾਰਵਾਈਆਂ ਨੂੰ ਸੁਧਾਰਨ ਦੀ ਅਪੀਲ ਕਰਦਾ ਹੈ।

ਗੌਰਤਲਬ ਹੈ ਕਿ ਇਸ ਹਫ਼ਤੇ ਕੈਨੇਡੀਅਨ ਕੈਨੋਲਾ 'ਤੇ ਲਗਭਗ 76 ਫੀਸਦੀ ਵਾਧੂ ਟੈਰਿਫ ਲਗਾਉਣ ਨਾਲ ਚੀਨ ਦਾ ਕੈਨੇਡਾ ਨਾਲ ਵਪਾਰ ਵਿਵਾਦ ਹੋਰ ਵੀ ਵੱਧ ਗਿਆ ਹੈ। ਬੀਜਿੰਗ ਨੇ ਸਪੱਸ਼ਟ ਰੂਪ ਤੋਂ ਕੈਨੇਡਾ ਵਲੋਂ ਚੀਨੀ ਇਲੈਕਟ੍ਰਿਕ ਕਾਰਾਂ 'ਤੇ 100 ਫੀਸਦੀ ਟੈਰਿਫ ਲਗਾਉਣ ਦੇ ਜਵਾਬ ਵਿਚ ਕੈਨੇਡੀਅਨ ਕੈਨੋਲਾ ਨੂੰ ਐਂਟੀ ਡੰਪਿੰਗ ਡਿਊਟੀ ਨਾਲ ਨਿਸ਼ਾਨਾ ਬਣਾਇਆ ਹੈ।